1 मिनु मेकोमी आं कली पूर्ब ङा लाप्‍चो आ नेक्‍था चाक्‍ती। 2 मिनु इस्राएली आन परमप्रभु आ छेङछेङ पूर्ब रे जाक्‍त। मेको आ रेयके ठेयब समुन्‍द्र आ रेयके खोदेंशो नेंसाक्‍व। मिनु रागी नेल्‍ल मेको आ छेङछेङम हाम्‍सो दुम्‍त। इजीकीएल १:२८ 3 मेको आं ङोंइती तशो परमप्रभु यावेमी सहर कली खतम सेल्‍ची ना जाक्‍मेनु, कोंइतीक खोदेंशो बाक्‍त। मेको केबार खोला आ नेक्‍थाम तशो कोंइतीके खोदेंशो बाक्‍त। मिनु गो खुम्‍की पा बाप्‍ती। इजीकीएल ८:-११:-; इजीकीएल १:- 4 मिनु परमप्रभु यावे आ छेङछेङ मेको पूर्ब ङा लाप्‍चो रे पा आ खिं ओव़त। इजीकीएल १०:१९ 5 मिनु सोक्‍तीम आं कली क्‍युक्‍शा, आगा ङा लाङगाम ओंइताक्‍यी। मिनु परमप्रभु यावे आ खिं छेङछेङम ब्रीत। इजीकीएल १:२८; प्रस्‍थान ४०:३४; १राजा ८:१०-११

6 मिनु मेको मुर आं नेक्‍था राप्‍शा बाक्‍मेनु, गो परमप्रभु यावे आ खिं रे आं कली लोव़ पशो नेंता। 7 मार लोव़ पाप्‍तु देंशा हना “ए मुर, एको दा आं ठेयब नित्‍तीक बाक्‍ब। मिनु एको आं खोइल नाइक्‍तीक यो बाक्‍ब। गो इस्राएल ङा मुर आन दातेम गेना हना यो बाक्‍नुङ। मुल रे इस्राएल आ खिं ङा मुरुम आं नें कली मरिम्‍शो मसेल्‍नीम। मेको नु आन पिपम आन मूर्ति पूजा नु आन बेक्‍शो पिप आन पर्बम पतीके आं नें मरिम्‍शो मसेल्‍नीम। भजन संग्रह १३२:७-८ 8 मेकोपुकीम आं खिं आ नेक्‍था आन खिं सेल्‍तेक्‍म। आं लाप्‍चो आ ङोंइती आन लाप्‍चो सेल्‍तेक्‍म। मिनु गो नु मेको आन दातेमी गारो का ला लीत। मिनु मेको आन ग्रांग्रा दिशो गेयम, आं नें ग्रांग्रा दिशो सेल्‍तेक्‍म। मोपतीके गो गाइश्‍शा मेको आन कली साइक्‍तामी। इजीकीएल ८:७-१८ 9 मुल मेकोपुकीम आन मूर्ति पूजा पतीक प्रोन्‍मेक्‍ल। मेको आन बेक्‍शो पिप आन पर्बम पतीके प्रोन्‍मेक्‍ल। मिनु गो मेको आन दातेमी गेना हना यो बाक्‍नुङ।

10 ए मुर, इस्राएल आ खिं ङा मुर आन कली आं खिं आ पर्बम शेंदीमी। मिनु मेको दोपा सेल्‍सीशो बाक्‍मे, मेको पुक्‍पतो। मिनु मेको आन मरिम्‍शो पशो आ पर्बम मुने दोक्‍मल। इजीकीएल ३६:३२ 11 मिनु मेकोपुकीम आन पशो आ पर्बम मुने पाम्‍तेक्‍म हना, मेको आन कली आं खिं दोपा सेल्‍सीशो बाक्‍मे, मेको तुइक्‍पतो। मेको आ लाङगा लतीके, खिंङगा ओव़तीके, मेको दोदेंशो तांइसीबा, आं देंशो पतीक लोव़, आं अरेशो लोव़ नु शेंतीक नेल्‍ले मेको आन ङोंइती ब्रेक्‍तो। मोपा मेको नेल्‍ले अरेशो होस पा टीब दुम्‍मल। 12 परमप्रभु यावे आ खिं आ पर्बम आ अरेशो लोव़ मार बाक्‍त देंशा हना, मेको डांडा आ एर ओंथ नेल्‍ल आं के बाक्‍तीक बाक्‍ब। मेको परमप्रभु यावे आ खिं आ पर्बम आ अरेशो लोव़ बाक्‍ब” देंत।

13 चढ़ेतीके गिश ठेयब बाक्‍त देंशा हना, मेको नेल्‍ल पा कुबीतम पुक्‍शोनु, कुबीत का नु गुइ का ब्रेम्‍शो बाक्‍त। मेको आ एर ओंथ दोशो जग कुबीत का लुक्‍च नु कुबीत का ब्रेम्‍शो बाक्‍त। मिनु आ एर ओंथ नेल्‍ल ङा सुर बित्‍ता का ब्रेम्‍शो बाक्‍त। मिनु मेको चढ़ेतीक आ राप्‍तीके दोदेंशो बाक्‍त देंशा हना, कुबीत का ०.५ मिटर बाक्‍ब। इजीकीएल ४०:४७; प्रस्‍थान ४७:१-८ 14 मेको चढ़ेतीक खपीम बाक्‍शो जग रे आइदी ङा सुर सम्‍म कुबीत निक्‍शी लाइश्‍शो नु कुबीत का ब्रेम्‍शो बाक्‍त। मेको आ आइक्‍च सुर रे ठेयब सुर सम्‍म ४ कुबीत लाइश्‍शो नु कुबीत का ब्रेम्‍शो बाक्‍त। 15 मिनु मेको चढ़ेशो चोतीक ४ कुबीत ग्‍येत्‍थ लाइश्‍शो बाक्‍त। मेकेर रे मेको आ ४ सुर रे ४ ओटा ग्रोव़ सेल्‍शो बाक्‍तेक्‍म। 16 मेको चढ़ेशो थोव़क चोतीक १२ कुबीत लाइश्‍शो नु १२ कुबीत ब्रेम्‍शो, ४ पाटे बाक्‍त। 17 मेको चढ़ेतीक आ ठेयब सुर १४ कुबीत लाइश्‍शो नु १४ कुबीत ब्रेम्‍शो बाक्‍त। मेको ४ पाटे बाक्‍त। मेको आ सुर एर ओंथ आधा कुबीत बाक्‍त। मिनु आ एर ओंथ दोशो जग कुबीत का ब्रेम्‍शो बाक्‍त। मेको चढ़ेतीक आ क्रेसी पूर्ब गे कोव़शो बाक्‍त।

18 मिनु मेकोम आं कली “ए मुर, परमप्रभु, परमप्रभु यावेमी ‘मेको चढ़ेतीके सेल्‍ने थुम्‍शो नाक्‍ती चोशा चढ़ेतीके चढ़ेचा नु हुश ब्रुइक्‍चा कली मेको चढ़ेतीके आ पर्बम पचा माल्‍शो गेय मार बाक्‍त देंशा हना, 19 गेपुकीम आं कली चढ़ेब सादोक आ खिं ङा लेवी आन कली पाप आ पर्बम चढ़ेचा कली बोहोर का गेचा माल्‍नीनी। मेकोपुकी आं गेय पचा कली आं नेक्‍था जाक्‍नीम’ दे परमप्रभु, परमप्रभु यावेमी देंशो बाक्‍ब। इजीकीएल ४०:४६; लेवी ४:१-१२ 20 मेकोपुकीमी मेको आ हुश इच्‍का चाक्‍शा चढ़ेतीक आ ४ ओटा ग्रोव़ नु आइक्‍था ङा सुर आन ४ कुना नेल्‍लेम ख्रेक्‍तमेक्‍ल। मोपा गे चढ़ेतीक ग्रांग्रा मदिशो सेल्‍शा पाप क्‍याम्‍तीक गेय पचा माल्‍नीनी। 21 मिनु नोले गेपुकीम मेको पाप आ पर्बम चढ़ेशो बोहोर चाक्‍शा, परमप्रभु यावे आ खिं ङा देंशो बाक्‍तीकेम चोने।

22 मिनु गेपुकीम आ दीसा नाक्‍ती मारेइ मदुम्‍शो बोका का पाप आ पर्बम चढ़ेने। गेपुकीम बोहोर चढ़ेशोम चढ़ेतीक ग्रांग्रा मदिशो सेल्‍शो खोदेंशो पा मेकोम यो चढ़ेतीक कली ग्रांग्रा मदिशो सेलल। 23 मिनु गेपुकीम चढ़ेतीक नेल्‍ल ग्रांग्रा मदिशो सेल्‍ने थुम्‍तीनी हना, मारेइ मदुम्‍शो बोहोर का नु बगाल रे मारेइ मदुम्‍शो सांड का चढ़ेने। 24 गेपुकीम मेको आस कली परमप्रभु यावे आ ङोंइती वोइक्‍चा माल्‍नीनी। मिनु चढ़ेबपुकीम मेको तारी हिक्‍सी वोइश्‍शा, परमप्रभु यावे आ ङोंइती चोशा चढ़ेतीक सेल्‍शा चढ़ेचा माल्‍नीम। 25 गेपुकीम पाप आ पर्बम चढ़ेचा कली ७ नाक्‍त सम्‍म नाक्‍त किंत किंत क्‍यारश का, बोहोर का नु बगाल रे मारेइ मदुम्‍शो सांड का चाक्‍चा माल्‍नीनी। 26 मिनु मेकोपुकी ७ नाक्‍त सम्‍म चढ़ेतीक कली पाप क्‍याम्‍तीक गेय पचा नु ग्रांग्रा मदिशो सेल्‍चा माल्‍नीम। मो पशा मेको चढ़ेतीके चढ़ेचा कली जिम्‍मा गेचा माल्‍नीम। 27 मिनु मेको नाक्‍त नुम्‍मेनु, ८ नाक्‍त रे चढ़ेबपुकीम इन चोशा चढ़ेतीक नु दुशा बाक्‍चा आ पर्बम चढ़ेतीक चढ़ेचा माल्‍नीम। मिनु गो इन कली ब्राइनुङ” दे परमप्रभु, परमप्रभु यावेमी देंत।