2
Selxatien ba mi sias te hal Efeses
1 Iesu biteni minou bit, “Utis sepinien ak iha mi masxaxa xa di miketeh xol sias te hal Efeses uhit: ✡ Rev 1:16,20; 3:1
“Ngan ak be selxatien xa nggo visal ngan xa nggur xat hitu lu e he sav (7) di e hen matu e di mikakao e hilaep te laet lu e he sav (7) xa be gol. 2 Di napus kil polien te xeih namim e napus kila xa midep iaxa di mubisu ni melele te xeih xil del nenemien xa be teviei. Nakila xa di musin ngan xil xa di langgusil tesaen. E di mulepis rin na ngan xil xa labit labe eloheoh navan xil, e mupus kila xa labe moletin te luvosen xil tang. ✡ Rev 3:1,8,15; 1Sion 4:1 3 Nakila xa di mubisu ni melele te xeih xil del nenemien xa be teviei, e midep iaxa di munggur longpangasien xil holu ve hisok. E neta sav xa mak, di musokil e neketen namim, e vemim tavuol ti.
4 “E ngan ak nangguri ba xat rin namim: taxeak, di mustokovein eheien xa mutepisen ni minou e mi moletin sav xil tetiamu. 5 Ma ihos xa munem xat sexien te eheien xa di mutepisen ni tetiamu, e mupus kila xa mudi sotin ranou xosali. Muhiles ra sexien tesa namim e mupol ni sexien hos xil ixoni ngan xa mutepol ni tetiamu. Xosxa munapol ni ti, ma nimei visal xamim e nihur rat laet namim ihe reling voninen. ✡ Rev 2:16,22; 3:3,19 6 E ngan ak napusi xa mupol ni momal: iemim nggat sexien xil na ngan xil xa langgusil pispisien na Nikolai* Nikolai di tepispisi mi moletin xil xa tenbe moletin e ninin xa da en, lusav. Mak, ma bit tesaen xil vus xa moletin di pol ni del tenben misakras vapurun ninin xa da en. nggoni ngan taxa inou mun ieok di nggati. ✡ Sam 139:21
7 “!Xosxa vurangemim di, ma muteong kuhi ni naha xa Ninin di biteni ba mi sias xil! E vaeen te neketen, ngan xil xa lasoh nggeih, nimaen xil lia huit vatiei te meulien sal xa di meul e naho na Hi.” ✡ Sen 2:9; 3:22,24; Rev 22:2,14; Sen 2:8; Esek 28:13; 31:8,9
Selxatien ba mi sias te hal Samerna
8 Di, Iesu bit rilomun ni minou bit, “Utis sepinien ak iha mi masxaxa xa di miketeh xol sias te hal Samerna uhit: ✡ Aes 44:6; 48:12; Rev 1:17; 22:13
“Ngan ak be selxatien na ngan xa be vatite te holesok xil vus xa ladi, e be hoxalite teni mun; ngan xa temat e temea rilomun ra maten. 9 Nakila xa di munggur longpangasien xil holu e holesok namim tovuol e ut etan vengan xa di munggusil xat inou. E, e rin te neketen namim, holesok namim be holu. Nakila xa vanut moletin tei xa labit labe Siu reitin di laseputut ni xamim. E inou napus xil nggoni ngan xa latave Siu reitin ti. E‑e, xil labe vanut moletin tei na Temat tang. ✡ Tem 2:5; 2Kor 11:14,15; Rev 3:9 10 Ulimim nakan ni longpangasien xil ti xa sangas ti muhisu ni. !Muteong kuhi! Nave nousav ti, Temat isak ni rut xamim muhe nim te xeih tengan muvur sakpisien xil, e mulonge isa melengien ihe he xalu (10). E nenemien namim namot ti. Musoh ixeih venou, tave ti neta xa ti lisak purun xamim ha vuma … rut xamim lilel. Imak, ma inou nisa huit neketen mi xamim xa be meulien sal. ✡ Dan 1:12,14; Tem 1:12
11 “!Xosxa vurangemim di, ma muteong kuhi ni naha xa Ninin di biteni ba mi sias xil! E vaeen te neketen, ngan xil xa lasoh nggeih, xil linamat ti e maten xa be lu nen xa be te nousav.” ✡ Rev 20:14; 21:8
Selxatien ba mi sias te hal Pegamam
12 Di, Iesu bit rilomun ni minou bit, “Utis sepinien ak iha mi masxaxa xa di miketeh xol sias te hal Pegamam uhit: ✡ Aes 49:2; Hib 4:12; Rev 1:16; 2:16; 19:5
“Ngan ak be selxatien na ngan xa tiei xa mikan e rin xalu vus nggo vulongen. 13 Nakil rute xa xamim mudi en, e taon xa Temat di pol pupu e meulien na moletin xil en. Tave ti neta xa mak, e xamim di tamu mube reitin minou e mutastokovein neketen namim ti. Reitin, di musomal nggeih e rute xa Temat nggur xeihen en, e melengien xil mun xa latehas vin Antipas xa tehusil xat inou e vehakut tehithiten longeongen hos usil inou mi mosav xil.
14 “E ngan ak nangguri ba xat rin namim: mumaen rut xamim di langgusil xat hisit pispisien xa nggoni pispisien na provet Balam tetiamu. Vengan xa xi tepispisi mi suv toto Balak xa tetep iaxa xi tetel mol‑Isrel xil ba latemot e tesaen texo sexien xa latea anien xa latesa ni tuei teha mi nanao xil e latepol tesa mi atou xil.✡ Nam 31:16; 25:1-2; Siud 1:11 15 E rut xamim mun di langgusil hisit sexien tesa xil ak melele xa di langgusil pispisien xil na Nikolai✡ Rev 2:6 e pispisien sav xil mun xa langgoni. 16 !Mak iaxa, taxeak, muhiles ra tesaen namim xil! Xosxa munaviles ti ra pispisien xil ak, ma, nave nousav ti, inou nimei visal xamim e nivae iha xat xamim itel tiei xa mahulong xa di mistal nggo vulongok. ✡ Rev 3:11; 22:7,12,20; Aes 49:2; Rev 1:16; 2:12; 19:15
17 “!Xosxa vurangemim di, ma muteong kuhi ni naha xa Ninin di biteni ba mi sias xil! E vaeen te neketen, ngan xil xa lasoh nggeih, nisa ti manna xa di minggus† Siu xil lanemi labit melele xa Hi isak ni lelaxatien nan mei istal e ut etan, isa manna xa Mosis teling xuxus ni teti valite tei tengan moletin nan xil lia ni. mi xil. E nisa hat tei xa mieh mi xil kekes xa ladis hisexil hu di en, hisexil xa moletin sav xil linakil ti.” ✡ Sam 78:24; Aes 62:2; 65:15; Rev 3:12
Selxatien ba mi sias te hal Taeatira
18 Di, Iesu bit rilomun ni minou bit, “Utis sepinien ak iha mi masxaxa xa di miketeh xol sias te hal Taeatira uhit: ✡ Dan 10:6; Rev 1:14-15; 19:12
“Ngan ak be selxatien mi xamim xa nggo Nat Hi xa meten minehin pupu nggoni upang e kaelen minehin nggoni oei te venu.✡ Rev 1:14-15 19 Nakil naha xa xamim di mupol ni. Napus kil eheien namim, neketen namim, polien namim, e midep iaxa di mubisu ni melele te xeih xil del nenemien xa be teviei. E napus kila mun xa, xosali, di mupol holu mak mu mili holesok xil xa mutepol kokot ni e melele xa mutehur kokot ni neketen namim.
20 “E ngan ak nangguri di xat rin namim: di mumaen atou xa sexien nan nggoni Sesebel tetiamu tengan mei vamos e xamim. Xi di mikes tasen ni xi bit be provet tei na Hi. E pispisien nan di miluvos moletin te polien navan xil xa bos tang tengan ti lipol ni sexien te hoeasoen e ti lia anien xa latesa ni tuei teha mi nanao xil. ✡ 1King 16:31; 2King 9:22; Nam 25:1-2; Rev 2:14 21 Inou natesa mesal mini tuei tengan vahiles ra tesaen nan xil, e xi ien ti tenavei tengan vahiles ra sexien te hoeasoen nan. 22 Muxuxou kuhi, vengan xa inou nisa mesien tei xa mahulong mi atou ak xa isak ni ita kat tang e rong man. E xosxa ngan xil xa lapol misa dela linaviles ti ra sexien nae xil, ma xil mun lilonge isa pupu itela. 23 Reitin, inou nihas vin moletin xil xa di langgusili. Isak ni, moletin xil te sias xil vus likila sung xa inou iaxa nakil naha xa di e nenemien e tin moletin xil vus, e nisak ni moletin xil kekes ti lia huit polien nae. ✡ Sam 7:9; Pro 24:12; Ser 11:20; 17:10; Sam 62:12; Pro 24:12; Ser 17:10; Rom 2:6; 2Tim 4:14; Rev 18:6; 20:12,13
24 “E xamim tesav xil te hal Taeatira, mutnahusil pispisien xil ak ti. Xamim mutesin pispisien ak xa mosav xil lakesi ni ‘kilakilen xil xa tellep na Temat.’ Ma, mi xamim, ninaling rae ti mun xa meas nata xat xamim. 25 Muhur xat rae xil kestang xa mutehuri tuei ituxoh melele xa nimei rilomun en. ✡ Rev 3:11
26 “E vaeen te neketen, ngan xil xa lasoh nggeih e tit lipol ni polien navan xil ituxoh melele xa nimei rilomun en, inou nisa xeihen mi xil tengan ti lilaxat kantri xil. ✡ Sam 2:8,9; Rev 12:5
27 “Reitin, nisa xeihen te lelaxatien mi xil xa ixoni ngan xa Tata navan tesa ni minou, nggoni sepinien xa biteni bit,
‘Lelaxatien nae ixeih mak mu.
Lihu len ngan xil vus xa ti livae itel xil,
ixoni ngan xa langgu papas valoei xil xa be kilas mei be saxute xil.’ (Sam 2:9)
28 E nisa Melan mun mi xil xa be hitu te makoe.‡ Hitu xa lakesi ni Melan di pili nggeih e melele xa sangas ut da miluv. Ngan ak be vole tei mi Kristin xil xa lisoh ixeih e maluxoluken te melele te xeih xil vengan xa laet te mei rilomunen na Iesu Kristo di bemei sangas. ✡ Rev 22:16 29 !Xosxa vurangemim di, ma muteong kuhi ni naha xa Ninin di biteni ba mi sias xil!”
*2:6: Nikolai di tepispisi mi moletin xil xa tenbe moletin e ninin xa da en, lusav. Mak, ma bit tesaen xil vus xa moletin di pol ni del tenben misakras vapurun ninin xa da en.
✡2:6: Sam 139:21
✡2:7: Sen 2:9; 3:22,24; Rev 22:2,14; Sen 2:8; Esek 28:13; 31:8,9
✡2:8: Aes 44:6; 48:12; Rev 1:17; 22:13
✡2:9: Tem 2:5; 2Kor 11:14,15; Rev 3:9
✡2:12: Aes 49:2; Hib 4:12; Rev 1:16; 2:16; 19:5
✡2:14: Nam 31:16; 25:1-2; Siud 1:11
✡2:16: Rev 3:11; 22:7,12,20; Aes 49:2; Rev 1:16; 2:12; 19:15
†2:17: Siu xil lanemi labit melele xa Hi isak ni lelaxatien nan mei istal e ut etan, isa manna xa Mosis teling xuxus ni teti valite tei tengan moletin nan xil lia ni.
✡2:17: Sam 78:24; Aes 62:2; 65:15; Rev 3:12
✡2:18: Dan 10:6; Rev 1:14-15; 19:12
✡2:20: 1King 16:31; 2King 9:22; Nam 25:1-2; Rev 2:14
✡2:23: Sam 7:9; Pro 24:12; Ser 11:20; 17:10; Sam 62:12; Pro 24:12; Ser 17:10; Rom 2:6; 2Tim 4:14; Rev 18:6; 20:12,13
‡2:28: Hitu xa lakesi ni Melan di pili nggeih e melele xa sangas ut da miluv. Ngan ak be vole tei mi Kristin xil xa lisoh ixeih e maluxoluken te melele te xeih xil vengan xa laet te mei rilomunen na Iesu Kristo di bemei sangas.