1 Yesu ipainzi ne pâri-tamâta mine tu, “Miki ma kalomi loko ku ilomi rârâ ndimo. Miki kao nemi kalo tawana ilâ pa Maro Kindeni, aku kalomi tawana naŋa mine nâ.

2 Naŋa Mama ne luma nde ilo kisiŋa pwapwataki rârâ keno, aku naŋa alâ ŋana aveta nia sondo pami. Ambo kelekele ikeno mine tia, ande naŋa ma aporo ŋgua mine pami, ande tia. Andeta mao nâ, kelekele ikeno mine. 3 Naŋa ma alâ aveta miki niami sondo lâ ŋga, ŋineŋga ma ataulo amâ kilo ku akaimi kamâ kamo kuku naŋa. Mine kala nia naŋa amo ŋinde, ande miki kala ma kamo ndaina kuku naŋa. 4 Miki kasama nzâla ŋinde kala ilâ pa nia naŋa alâ papa ŋinde.”

5 Andeta Tomas iporo tu, “Maro Ŋalae, maka kazizâla ŋana nia noko kulâ papa ŋinde. Mine kala maka ma kakura tu kasama nzâla ŋinde mâsi mana.” 6 Aku Yesu ipai mine tu, “Naŋa warakâŋgu nde nzâla, aku naŋa nde ŋgua mao tamwatâŋgu wa via tamwatâŋgu wa. Kinzi tamâta sikura ŋana silâ pa Mama lâ nzâla toŋge, ande tia ndo.” 7 Yesu iporo ŋgua ŋine pa Tomas, ŋineŋga ipainzi ne pâri-tamâta mine tu, “Ambo miki ma kasama naŋa kilalâŋgu sondo, ande miki ma kasama naŋa Mama kilala mine nâ. Kala ŋine ŋga miki kasama i kilala, aku kamora i marumbu lâ.”

8 Andeta Pilip ipai Yesu tu, “Maro Ŋalae, kutula Tama pa maka kamora ŋga. Maka iloma pa ŋinde nâ.” 9 Aku Yesu iporo taulo tu, “Pilip, naŋa amo kumi ikura zo luandondo lâ, andeta noko kusama kilalâŋgu tia, a? Tamâta ea imora naŋa, ande imora Mama tona. Mine nde ŋana sâ kâ ŋga noko kuporo tu, ‘Kutula Tama pa maka’, a? 10 Tiambo noko ŋandai kalo tawana tu naŋa apaipa kuku Mama, aku Mama kala ipaipa kuku naŋa, a? Naŋa muŋga akai ŋgua lâ warakâŋgu nâ iloŋgu ŋineŋga aporo atula pami, ande tia. Andeta Mama ipaipa kuku naŋa, aku iveta tamwata ne wurâta. 11 Ara ŋana miki ma kalomi tawana ŋgua ŋine: naŋa apaipa kuku Mama, aku Mama kala ipaipa kuku naŋa. Ambo miki tinimi pwâka tu kalomi tawana naneŋgu ŋgua, ande ara ŋana miki ma kalomi ŋgere ŋana mâsi rârâni naŋa aveta ŋinde, ŋana ŋinde ma ipaŋo nemi kalo-tawana kâ. 12 Naŋa aporo ŋgua mao nâ pami; tamâta ea kalo tawana naŋa, ande i kala ma iveta mâsi kie-kie, itogo naŋa aveta mine. Aku i ma iveta mâsi pinde ipole mâsi naŋa muŋga aveta ŋinde, ŋana tu naŋa ma ataulo alâ pa Mama kilo.

13 Miki kapaipa kuku naŋa lâ. Mine kala vetâŋa ndia miki kano pa naŋa tu aveta, ande ma naveta, ŋana tu ŋinde ma iveta Mama ŋa ipâŋga ŋalae. 14 Mao nâ, miki kapaipa kuku naŋa lâ. Mine kala vetâŋa ndia miki kano pa naŋa tu aveta, ande ma naveta.”

15 Yesu iporo ŋgua kilo panzi ne pâri-tamâta tu, “Ambo miki ilomi ndo keno pa naŋa, ande miki ma kapaveta sondo kuku naneŋgu ŋgua. 16 Aku naŋa ma ano pa Mama, ku Mama ma isupwa Pavilâŋa Tamwata toŋge imâ pami. Aku Pavilâŋa Tamwata ŋinde ma imo kumi mine ku imo nâ. 17 Pavilâŋa Tamwata ŋinde nde Koroani Sapâŋa. I uru itula ŋgua mao ŋana Maro Kindeni kâ. Kinzi tâno tamâta sikura tu simora i ku sisama i, ande tia. Mine kala i ma imo kinzi nenzi Pavilâŋa Tamwata, ande tia. Aŋga miki nde kasama i lâ, ŋana tu i uru imo kumi, aku ma imo ilomi. 18 Naŋa ma alâ, andeta naŋa ma apilemi kamo simbomi nâ, katogonzi mundoro mine, ande tia. Naŋa ma ataulo amâ pami kilo. 19 Zo laiti lâ ŋana kinzi tâno tamâta ma simora naŋa naoŋgu kilo tia. Aŋga miki nde ma kamora naoŋgu kilo. Naŋa ma amo viâŋgu kilo, aku ŋana duvi ŋine kâ miki kala ma kamo viami mine nâ. 20 Lâ zo ŋinde, ande miki nemi ilo-kalo ma ipâŋga, kala ma kasama tu naŋa apaipa kuku Mama, aku miki kapaipa kuku naŋa, itogo naŋa kala apaipa kuku miki mine nâ. 21 Tamâta ea ikai naneŋgu ŋgua ku ipaveta kuku, ande tamâta ŋinde ilo ndo keno pa naŋa. Aku tamâta ea ilo ndo keno pa naŋa, ande naŋa Mama kala ma ilo ndo keno pa i mine nâ. Aku naŋa kala ma iloŋgu ndo keno pa i, ku ma apatua warakâŋgu papa.”

22 Ŋineŋga Judas, i Judas Iskariot nuwaka, ande ikasoŋa Yesu mine tu, “Maro Ŋalae, mana mana ŋga noko ma kupatua pa maka nâ, andeta ma kupatua panzi tâno tamâta tia.” 23 Yesu nde itu lâ i kawa tu, “Ambo tamâta toŋge ilo ndo keno pa naŋa, ande i ma ipaveta kuku naneŋgu ŋgua. Aku Mama ma ilo ndo keno pa tamâta ŋinde, aku maka rua Mama rua ma kamâ kamo kuku i. 24 Ambo tamâta toŋge ilo ndo keno pa naŋa tia, ande i ma ipaveta kuku naneŋgu ŋgua tia. Miki kaloŋo naŋa atula ŋgua pami, andeta naŋa ŋandai akai ŋgua ŋine lâ warakâŋgu nâ iloŋgu ŋineŋga aporo ŋga. Ŋinde nde Mama ne ŋgua, ina isupwana kala amâ.

25 Naŋa amo kuku miki yo, kala ŋine aporo atula ŋgua ŋainani pami lâ. 26 Andeta muli ŋga Mama ma isupwa Pavilâŋa Tamwata ikai naŋa ndamwâŋgu imâ pami. I nde Koroani Sapâŋa. I ma ipananami ŋana naneŋgu ŋgua rârâni kâ, aku ma ipaŋo ilomi kalomi tu ma kalomi ŋgere kilo ŋana ŋgua rârâni naŋa muŋga atula pami ŋinde.

27 Naŋa ao wisi-pisi imo miki taitu-taitu ilomi kalomi, itogo wisi-pisi uru imo warakâŋgu iloŋgu kaloŋgu mine. Andeta wisi-pisi ŋinde ŋandai irerege kuku tâno ŋine ne wisi-pisi ŋga. Mine nde miki ma kalomi loko ku karuru ndimo. 28 Miki muŋga kaloŋo naŋa apaimi tu, ‘Naŋa ma apilemi ku alâ, andeta muli, ŋineŋga ma ataulo amâ pami kilo’. Ambo miki ilomi ndo keno mao pa naŋa, ande miki ma kandeka, ŋana tu naŋa alâ pa Mama, aku Mama ŋa nde ipole naŋa ŋâŋgu. Andeta miki ilomi ŋandai ikeno mine ŋga. 29 Vetâŋa rârâni ŋinde nde ipâŋga tia yo, kala ŋine atula pwataki pami kaloŋo lâ. Mine kala muli, lâ zo ŋana vetâŋa ŋinde ma ipâŋga, ande miki ma kalomi tawana naneŋgu ŋgua. 30 Naŋa ma aporo ŋgua rârâ kilo pami tia, ŋana tu tâno ŋine ne maro, i ŋa Sadana, ande ma imâ. I ne walo toŋge keno ŋana iveta sâ toŋge pa naŋa, ande tia ndo. 31 Taitu naŋa iloŋgu tu kinzi tâno tamâta ma sisama ŋine; naŋa iloŋgu ndo keno pa Mama. Ŋana ŋine kâ, naŋa uru aveta vetâŋa rârâni ikura Mama itula pana mine. Mine nde ara, miki kamandi, aku toka.”