1 ती ज्‍युक्‍ला येशू यहूदी ल्‍हङाङ नेमा थेन्‍नी फेपिन कितुप पेला खोकी लोमातिवा खोकी चिप्‍ला वानी ती ल्‍हङाङकी खाङ्‍बातिवा छासे ल्‍यामु वे सिनी खोला छ्‍या तेन्‍सुङ। 2 यिने येशूकी तिवाला सुङ्‍सुङ, “तन्‍दा ख्‍यिरा दी तेरी थोङ्‍सुङ? ङ ख्‍यिराङला टेङ्‍बो सिरिन, देकी दोतिवा च्‍यिक साङ यम्‍बा दोकी खला मालुवा क्‍यानी तेरी र्‍होम्‍गिवी।”

3 तेसुर येशू जैतुन पम्‍दोकला ज्‍यु वोतुप पेला लोमातिवा खरक्‍पा सोक सिरा खोकी चाला वानी, “ओ चोवो, ङि्‍यराङला सुङ्‍नी, ती ताम्‍ङे नम पेला च्‍युङ्‍गिवी? तमा चोवो फेवु तुजे ताङ जम्‍बुलिङकी तिङ्‍मी तुजेला चुका ततिवा च्‍युङ्‍गिवी?” सिनी खोला टिसुङ। 4 तमा येशूकी तिवाला सुङ्‍सुङ, “च्‍याङ्‍से क्‍यानी देता, सी साङ ख्‍यिराङला मुलुशी। 5 च्‍यिलासिसिन मी बङीकी ङे मिङ लानी ‘ङ ख्रीष्‍ट यिन।’ सिनी मी बङीला लुकितो। 6 तमा ख्‍यिरा मक ग्‍यकुप ताम्‍ङे ताङ मक ग्‍यकिवी सिरुप ताम्‍ङे थोकितो। यिने ख्‍यिराङ ति यर्मिन मर्मिन मोडोवुला च्‍याङ्‍से क्‍यानी देता। च्‍यिलासिसिन दी तेरी ताम्‍ङेतिवा वुङ राङ गोकिवी, यिने तन्‍दा राङ जम्‍बुलिङ तेरी ना डोप तिङ्‍मी तुजे ति मिन। 7 ग्‍येल्‍खाप ग्‍येल्‍खापकी तेन्‍दोकला ताङ मिरिक मिरिककी तेन्‍दोकला लङ्‍गितो, तमा दासा दासाला ङ्‍यिमा मर्वु शरुप ताङ सयीतिवा ग्‍यकितो। 8 यिने दिवा ति दुक्‍पाकी थल्‍मा तिराङ यिन।

9 ती पेला मीतिवी ख्‍यिराङला जिम्‍नी छेटाङ तेरुपतिवी लकला चेक तेनी सेकितो। तमा ख्‍यिरा ङला तेपा क्‍यावु तप्‍की तेरी मिरिककी मीतिवी ख्‍यिराङला ङ्‍यिङ्‍मर किवितो। 10 तमा मीतिवा बङीकी ङला तेपा कितुप क्‍युर्नी ज्‍योकितो। तिवा च्‍यिककी च्‍यिकला क्‍येन तेरुप ताङ ङ्‍यिङ्‍मर कितो। 11 तमा लुङ्‍तेम्‍बा मेटेङ्‍बुतिवा बङी वानी मीतिवा बङीला लुकितो। 12 दुक्‍टा कितुप मीतिवा मङ बङी गलुप तप्‍की मीतिवा बङीकी ङि्‍यङ्‍ज्‍ये अला मिकिवी। 13 यिने चो दुक्‍पा ख्‍येल्‍सिनाङ ज्‍युक्‍ला सेक डेकला देतुप तीला कोन्‍छ्‍योककी र्‍होकितो। 14 तमा दी कोन्‍छ्‍योककी ग्‍येल्‍खापकी लेन ल्‍यामु ति तेरी जम्‍बुलिङला ख्‍याप्‍टाक क्‍यानी तेरी मिरिककी मीतिवाला पङ्‍बु तेर्किवी। ती ज्‍युक्‍ला दी जम्‍बुलिङकी तिङ्‍मी तुजे गिवी।”

15 “तुक क्‍यानी ख्‍यिरा कोन्‍छ्‍योककी लुङ्‍तेम्‍बा दानिएलकी सिक्‍यावु दोके क्‍युक्‍टो लङ्‍गुप च्‍यालक ति चाङ्‍मा वोतुप कोन्‍छ्‍योककी ल्‍हङाङला लानी वोतुप थोङ्‍सिन (लोपुप तीकी दीकी तेन्‍दोक हाक्‍कोशी)* २४:१५ दानिएल ९:२७; ११:३१; १२:११ 16 ती पेला यहूदियाला वोतुपतिवा री नेवा टोनी डोशी। 17 खाङ्‍बी खाते खला वोतुपतिवा खाङ्‍बी नाङ्‍ला वोतुप समा च्‍यालक थेन्‍दुपला मर मपप्‍शी। 18 शिङ खला वोतुपतिवा खोरो खयिटो लङ्‍गुपला लोक्‍नी मोडोशी। 19 ती तुजेला जु च्‍येन्‍दी वोतुप पुम्‍पेजातिवा ताङ आङाला नुम तेरुप आमातिवाला मङ कले ख्‍येल्‍गिवी। 20 ख्‍यिरा टो डोप तुजे ति गुन्‍बी ल ताङ ङासोप ङ्‍यिमाला मेख्‍येल्‍शी सिनी मोपोर की। 21 च्‍यिलासिसिन ती पेला कशेन छेटाङ ग्‍येर्पु ख्‍येल्‍गितो। तुका छेटाङ याङ कोन्‍छ्‍योककी जम्‍बुलिङ थल्‍मा ज्‍येङ्‍गुप पे नेज्‍युन तन्‍दा सेक नाम्‍साङ माच्‍युङ वे, तिङ्‍ला साङ मेङ्‍गिवी। 22 कोन्‍छ्‍योककी ती छेटाङकी तुजेतिवा ङ्‍युङ्‍मु माजोवु यिन्‍सिन सु साङ सेन्बु लु मुथुपी। यिने खोरे पेतुप मीतिवी थोक्‍ला खोकी ती तुजेतिवा ङ्‍युङ्‍मु जेवी।

23 ती पेला सी ख्‍यिराङला ‘ल्हो ताङ, ख्रीष्‍ट ति दे वे।’ याङ्‍ना ‘खो ते वे।’ सिक्‍यासिन ख्‍यिराङ ती ताम्‍ङेला तेपा माकी। 24 च्‍यिलासिसिन ख्रीष्‍ट जुमातिवा ताङ लुङ्‍तेम्‍बा मेटेङ्‍बुतिवा वानी त ग्‍येर्पु ताङ हलेवु लाकातिवा छ्‍या देनिन सिरा कोन्‍छ्‍योककी पेतुपतिवाला साङ अछ्‍योता सेक लुकिवी। 25 ङ्‍येना, ङ दी ताम्‍ङे ति गोमाला के ख्‍यिराङला सिरिन वे। 26 तुक क्‍यानी तिवी ख्‍यिराङला ‘ल्‍होसा, ख्रीष्‍ट याङ दासा पाङ्‍थेरीला वे।’ सिक्‍यासिनाङ ख्‍यिराङ ते माडो। याङ्‍ना तिवी ‘खो खाङ्‍बी नाङ्‍ला राङ वे।’ सिक्‍यासिनाङ ती ताम्‍ङेला तेपा माकी। 27 च्‍यिलासिसिन शरकी थाकाला चिलाम ग्‍यप्‍सिन नुपकी थाकाला सेक ठछ्‍येली थोङ्‍गुप दोके मी पुज्‍युङ वुङ्‍गुप साङ तुकै राङ डितो। 28 तमा कनी शेप सेम्‍ज्‍येन नोके, ते गिक्‍तातिवा जोम्‍गिवी।”

29 “ती छेटाङ वालुङ्‍मेताला ङ्‍यिमा डिप्‍किवी, उलाकी वो माग्‍यकिवी, कर्मातिवा नाम नेवा लुम्‍गिवी, तमा नामला वोतुपतिवा तेरी योकिवी। 30 ती पेला राङ ङ मी पुज्‍युङ वुङ्‍गुप त ति नामला छ्‍या देन्‍गिवी, तमा जम्‍बुलिङकी तेरी मिरिककी मीतिवा ज्‍यिवा लानी ङुप्‍राङ कियी सिरा ङ मी पुज्‍युङ ओङ ताङ छासे मोवा थोप्‍नी मुक्‍पी खला वुङ्‍गुप ति थोङ्‍गिवी। 31 ती पेला ङ मी पुज्‍युङकी ग्‍येलिङ पुतुप वोरु ताङ मुला ङे देवाच्‍येनकी लेन क्‍योलुप थुतिवा तोङ्‍गिवी। तमा तिवी जम्‍बुलिङ तेरी नेमा ङे पेतुप मीतिवाला जोम ज्‍यिकिवी।”

32 “अन्‍जीरकी दोङ्‍बुला ल्‍हानी येन्‍देन च्‍यिक लोप। तीकी येल्‍कातिवा च्‍योक च्‍योक गल्‍नी ती नेमा ज्‍योक थेन्‍सिन येर्वु थेन्‍दुप छाल्‍नोक सिनी ख्‍यिरा हाक्‍कोकिवी। 33 तुक राङ क्‍यानी ख्‍यिरा दी तेरी ताम्‍ङेतिवा च्‍युङ्‍गुप थोङ्‍सिमा ङ मी पुज्‍युङ छासे चिप्‍ला राङ लेप्‍नी वे सिरुप ति हाक्‍कोवा की। 34 वुतुङ के ङ ख्‍यिराङला सिरिन, दी तेरी ताम्‍ङेतिवा माच्‍युङ्‍वा सेक्‍ला दी गिपा ना मोडोवी। 35 स ताङ नाम ति तोर्नी डिवी, यिने ङे सिक्‍यावु ताम्‍ङेतिवा ति नाम्‍साङ तोर्नी मोडोवी।”

36 “यिने ती ङ्‍यिमा ताङ तुजे ति नम गिते सिनी सुला साङ छ्‍या मे, देवाच्‍येनकी लेन क्‍योलुप थुतिवाला साङ छ्‍या मे, पुज्‍युङला साङ छ्‍या मे, ती ति पपाला तिराङ छ्‍या वे। 37 तमा नोआकी ङोला चुकै च्‍युङ वे, ङ मी पुज्‍युङ वुङ्‍गुप तुजेला साङ तुकै राङ च्‍युङ्‍गितो। 38 तोजो पेला छ्‍यर्वा ग्‍येर्पु ग्‍यकुप सिनाङ गोमाला नोआ टी नाङ्‍ला शुकुप तुजे सेक मीतिवा साप ताङ थुङ्‍गुप ताङ जेन्‍दी कियी वोतुप्‍जा। 39 तमा छ्‍यर्वा ग्‍येर्पु ग्‍यप्‍नी तेरीला ज्‍यानी मागल्‍वा सेक्‍ला मीतिवाला काङ च्‍युङ्‍गिवी सिनी काङ साङ छ्‍या मिन्‍दुक। तमा ङ मी पुज्‍युङ वुङ्‍गुप तुजेला साङ तुकै राङ डितो। 40 ती पेला शिङ खला वोतुप मिरा ङ्‍यीकी नाङ्‍ला मिरा च्‍यिक ति टिनी डिवी, तमा मिरा च्‍यिक ति ते राङ क्‍युर्नी ज्‍योकिवी। 41 पुम्‍पेजा मिरा ङ्‍यी मुला राङ फे तकिन वोतुप पेला मिरा च्‍यिक ति टिनी डिवी, तमा मिरा च्‍यिक ति ते राङ क्‍युर्नी ज्‍योकिवी। 42 ती तप्‍की च्‍याङ्‍से देता, च्‍यिलासिसिन ख्‍यिरा चोवो चुका छेर्मु फेप्‍किवी सिरुप ति ख्‍यिराङला छ्‍या मे। 43 दी ताम्‍ङे हाक्‍कोवा किसा। खाङ्‍बी ज्‍यिन्‍दाकला कुर्मेन नुपला छ्‍युजी चोला गिवी सिरुप छ्‍या वोसिन तीकी ङ्‍यी मालोका क्‍यानी ती कुर्मेनला खोरो खाङ्‍बाला शुक मिज्‍यिवुजा। 44 तुक क्‍यानी ख्‍यिराङ टडिक क्‍यानी देता, च्‍यिलासिसिन ङ मी पुज्‍युङ ति ख्‍यिरा नासाम मातङ्‍गुप तुजेला वुङ्‍गितो।”

45 “सु खोङ्‍तेर्मु ताङ रिक्‍पा वोतुप लावा वोज्‍यिवी? ज्‍यिन्‍दाककी तीला खोरो खाङ्‍बी लावातिवाला टेके तुजेला समा तेरुपला चेक तेसिन तीकी चुक कि गोकिवी? 46 ज्‍यिन्‍दाक लोक्‍नी वुङ्‍गुप पेला तीकी ज्‍यिन्‍दाककी लो तेन्‍दुप दोके कियी वोतुप ठेसिन ती लावाला ल्‍यामु गिवी। 47 वुतुङ के ङ ख्‍यिराङला सिरिन, ज्‍यिन्‍दाक तीकी खोरो तेरी टोङ्‍बा ति ती लावाला लो तेन्‍नी चेक तेकिवी। 48 यिने दोजो ती लावा ति मेलोवा वे, तमा तीकी खोरो सेमला ‘ङे ज्‍यिन्‍दाक याङ फिमु गिते।’ सिनी नासाम तोङ्‍यिन सिरा 49 खोरो दाल्‍जा लावातिवाला दुङ्‍गुप ताङ छ्‍याङ्‍गेलेतिवी मुला छ्‍याङ थुनी देसिन 50 ती लावाकी नासाम मातङ्‍गुप ङ्‍यिमा ताङ छ्‍या मेतुप तुजेला ज्‍यिन्‍दाक लोक्‍नी गिवी। 51 तमा ती ज्‍यिन्‍दाककी ती लावा तीला छेटाङ बिन्‍नी खोनक्‍पुतिवा डो गोवु ङ्‍येलाला क्‍युर्किवी, तमा ते ती ति ङुप्‍राङ कियी सिरा स मुर्किवी।”