1 यरूशलेमला वोतुप तेपा कितुपतिवी थोक्‍ला दाल्‍जा किटे क्‍यावु बुल्‍वाकी कोर्ला याङ ख्‍यिराङला ङे यिकी टिक मोगोवी। 2 च्‍यिलासिसिन ख्‍यिराङ दाल्‍जा किटे कितुपला छासे सेम वे सिरुप ति ङला छ्‍या वे। तीकी कोर्ला माकेडोनियाकी तेपा कितुप मीतिवी चिप्‍ला “ननिङगी लो नेज्‍युनी ख्‍यिराङ अखैयाकी* ९:२ कोरिन्‍थ ग्‍येसा ति अखैया अंचल नाङ्‍ला वे। मीतिवी बुल्‍वा तेरुपला टडिक क्‍या वे।” सिनी ङे तेके क्‍यानी सिक्‍या वे। ख्‍यिरा सेमला छासे दाल्‍जा किटे कितुप नो वोतुप तप्‍की तिवी पर्ला मी बङीकी सेमला ङाडेङ ङ्‍येनी वे। 3 यिने नुपतिवाला ङे ख्‍यिरा ते तङ्‍गुप तेन्‍दोक ति ङ्‍यिरा ख्‍यिरा थोक्‍ला तेके क्‍यावु ति तेर्मेला मोडोशी, तमा ङे सिक्‍यावु दोके ख्‍यिराङ टडिक क्‍यानी देशी सिनी यिन। 4 दोजो ललाइ माकेडोनियाकी तेपा कितुप मीतिवा ङ ताङ मुला ख्‍यिरा ते वुङ्‍गुप पेला ख्‍यिराङ बुल्‍वा दुतुप टडिक मेतुप हाक्‍कोसिन ख्‍यिराङ ङोछाला ख्‍येल्‍गितो, ङ्‍यिराङ साङ ङोशी मारेला ख्‍येल्‍गितो। च्‍यिलासिसिन ङ्‍यिरा ख्‍यिराङला छासे रेवा ग्‍येर्पु क्‍या वे। 5 तुक क्‍यानी ख्‍यिरा तेर्सा क्‍यानी थाक्‍छ्‍येतुप बुल्‍वा ति गोमाला के च्‍योम च्‍योम कि ज्‍यितुपला ङ सिनाङ गोमाला राङ ती नुपतिवाला ख्‍यिरा ते तोङ्‍गुप ल्‍यामु यिन सिरुप ङला नासाम शार्सुङ। तुक क्‍यासिन ती बुल्‍वा ति करखापकी दुवु मिन्‍दाला सेम्‍बा सेमगी पुलुप बुल्‍वा च्‍युङि्‍गवी।

6 दी ताम्‍ङे ति टोक माज्‍येता, “सेन चेयी राङ देपुप तीकी डुप्‍सेन साङ चेयी राङ रुकिवी, यिने सेन बङी देपुप तीकी डुप्‍सेन साङ बङी रुकिवी।”* ९:६ हितोपदेश ११:२४ 7 चुका मी तीकी साङ खोरो सेम्‍बा सेमगी बिन। तेरुप सेम मेता क्‍यानी मिन, याङ्‍ना करखापला ख्‍येल्‍नी साङ मिन। च्‍यिलासिसिन सेम गा क्‍यानी तेरुप तीला कोन्‍छ्‍योककी ङ्‍यिङ्‍ज्‍ये किवी। 8 कोन्‍छ्‍योककी ख्‍यिराङला तेरी मोलाम ति छासे क्‍यानी नङ्‍गिवी। तुक क्‍यानी ख्‍यिराङला तेरी गोवु च्‍यालकतिवा छासे क्‍यानी च्‍युङ्‍नी गोवु सिनाङ मङ छाछिङी डिवी, तमा ख्‍यिरा मी यम्‍बाला ल्‍यामु कितुपला तेर थुप्‍किवी। 9 ती तप्‍की कोन्‍छ्‍योककी सुङला साङ दुक सिनी टि वे,

10 देपुपतिवाला सेन ताङ सापला समा नङ्‍गुप कोन्‍छ्‍योककी ख्‍यिराङला गोवु तेरी सेन नङ्‍गिवी, तमा तीला फेल ज्‍यिकिवी। तुक क्‍यासिन ख्‍यिरा मीतिवाला मङ दाल्‍जा किटे कि थुप्‍किवी।* ९:१० यशैया ५५:१० 11 तमा कोन्‍छ्‍योककी ख्‍यिराङला काङ क्‍यासिनाङ तेरी ताम्‍ङेला मोलाम नङ्‍गिवी, तुक क्‍यासिन ख्‍यिरा नरी सेम्‍बा सेमगी बुल्‍वा तेर थुप्‍किवी। तमा दाक्‍पी ती बुल्‍वा ति गोवु मीतिवाला तेरुप पेला तिवी कोन्‍छ्‍योकला थुचिछे बुल्‍गिवी। 12 ती ख्‍यिरा बिन्‍दुप बुल्‍वा तीकी यरूशलेमला वोतुप कोन्‍छ्‍योककी पुज्‍युङपुमतिवी कतुकार क्‍योङ्‍गिवी। तोजो तिराङ मिन, तिवा बङीकी कोन्‍छ्‍योकला मङ थुचिछे बुल्‍गिवी। 13 ख्‍यिरा तिवी थोक्‍ला बुल्‍वा बिन्‍नी ख्रीष्‍टकी लेन ल्‍यामुला वोतुप सुङला युसुङ, तमा ख्‍यिरा सेम पेनी कोन्‍छ्‍योकला तेपा कितुप मीतिवा ताङ मी बङीकी थोक्‍ला दाल्‍जा किटे क्‍यानी पङ्‍बु छ्‍या तेन्‍दुप तप्‍की मीतिवी कोन्‍छ्‍योकला मोवा किवी। 14 तन्‍दा कोन्‍छ्‍योककी ख्‍यिराङला छासे कटिन नङ्‍गुप तप्‍की तिवी ख्‍यिराङला ङ्‍यिङ्‍ज्‍ये क्‍यानी ख्‍यिरा थोक्‍ला मोपोर किवी। 15 कोन्‍छ्‍योककी नङ्‍गुप ग्‍यक्‍चेकी ङ्‍येम्‍बाकी थोक्‍ला खोला थुचिछे।