1 Nyamfo eto kamaa, Onanto eto ɔtɔnkpe ǝmǝ áte mɛ ketu ka lǝǝtǝ nkpǝ eto ntu. Ketu kamǝ aabɔdi ketsyi lǝ Onanto ku Lesamubi nǝmǝ eto lekankpomɛ ǝsuǝ. Ntu bomǝ akpa kɛnkɛnkɛ fe ahuhuɛ. 2 Nya bɔnlɛ bɔbɔdi lǝ umǝnkplɛ ǝmǝ eto obia kplɛ. Nya lǝ ke etukpenkpe ǝnuǝ nyamǝ ǝsuǝǝ, nkpǝ eto kuyi ńyǝ, nya kuanwɔ kofa saa kofa. Ko afanto eyifo afantosi itǝ ese ese eto betidi kenke. 3 Bembunyǝ kulesa nǝ Onanto díkudi lǝ umǝnkplɛ ǝmǝ. Onanto ku Lesamubi nǝmǝ eto lekankpomɛ ebɔkɛ lǝ umǝnkplɛ ǝmǝ, nya wǝ beyifoyifo luusumu wǝ. 4 Boonyǝ wǝ ǝnǝmi nya wǝ diye luutǝkǝ lǝ mǝ nto. 5 Kale ensi embolo mfó. Nya bembohiã kakandiɛ nye kofe, itsyise Bonamute Onanto ebudi mǝ diyǝnde nya boodi seka isu manlo manlo.

6 Mfó nya Onanto eto ɔtɔnkpe ǝmǝ lɛtɛyi mɛ nkǝ, “Ɔnukualɛ eto etiki ni nyamfo nya boofo nya bofo kanɔ sitiniti. Nya Bonamute Onanto wǝ leefi wǝ Lɛwɔnɔ kǝtǝ wǝ bǝnyɛlǝkǝtidi, wǝ ni létsyese wǝ ɔtɔnkpe nkǝ ote wǝ beyifoyifo asa nnya lǝǝbǝ bubǝ lǝ lefe kliminti ǝsuǝ.”

7 “Bebe! Muubǝ lǝ lefe kliminti ǝsuǝ. Disuǝyuǝ itǝ mba leetsyue etiki nnya bábe letsya lǝ kukue komfo kǝmiǝ koto.”

8 Mɔ Yohanes, mɔ ni nwǝ lɛnɔ nya mínyǝ asa nyamfo kenke. Nya lefe nǝ mínyǝ nya mínɔ nnya mínlosǝǝ, nse akonki lǝ Onanto eto ɔtɔnkpe wǝ dílǝkǝ asa nyamfo óte mɛ eto akɔ miǝ lǝ nsumu wǝ. 9 Fɛɛ ɔ́tɛyi mɛ nkǝ, “Menyifo nko! Mintsyaa, uyifotsyuǝ mini fe fǝ ku fǝ bayimi ba ni Onanto eto bǝnyɛlǝkǝtidi ku mba kenke leetsyue etiki nnya nkpe lǝ kukue komfo koto. Onanto mate ete ele bǝ sumu.”

10 Mfó nya ɔ́tɛyi mɛ nkǝ, “Menfi bǝnyɛlǝkǝtidi eto etiki nnya báwɔni bákpe lǝ kukue komfo akula, itsyise lefe nǝmǝ eboyo lelo nyamfo kenke luubǝ itǝ. 11 Utsyuǝ saa ke leeyifo asa buaa, sukosǝ lǝ ukeyifo asa bua, nwǝ ke leeyifo asinsa sukosǝ lǝ ukeyifo asinsa, nwǝ kee leeyifo kasɛɛ, sukosǝ lǝ ukeyifo kasɛɛ, nwǝ kee diyifo kɛnkɛ, usukosǝ lǝ uyifo nwǝ diyifo kɛnkɛ.”

12 Yesu nkǝ, “Bebe! Muubǝ lǝ lefe kliminti ǝsuǝ! Muubǝ ku kayofofo ka dińyǝ kǝtǝ utsyuǝ saa lǝ keyifo ka úyifo kumǝ. 13 Mɔ ni Ututɛ ku Ɔfɛfɛ, Kasɔ Ketsyikokɔ ku Kaalosǝkɔ.

14 “Disuǝyuǝ itǝ betidi ba dumuǝ ǝsuǝ bǝtsyǝ fe kase bǝǝflǝ bikǝ kɛnkɛ kǝtsyǝ. Mǝǝ dunyǝ kusu bedi nkpǝ eto kuyi komǝ eto eyibibi nɛ, nya bɔɔyɛ lǝ kesie kamǝ bedufǝ lǝ kato eto umǝnkplɛ ǝmǝ lafo. 15 Nya mba luunyǝ lǝ ɔkpɔ ǝmǝ kama ba ni mba leeyifo afanisa, mǝ ni betidi ba ni bafate, mba ni batsyetɔ, mba laalo betidi, mba lǝǝtǝ bǝfiǝ kedi ku betidi ba ni badia ba laawɛ betidi kakpe lǝ etiki ku lǝ eyifosa ǝsuǝ.

16 “Mɔ, Yesu, ni nwǝ létsyese mɔ ɔtɔnkpe miǝ lǝ ubǝ ulǝkǝ asa nyamfo ote mi bafokanɔfɔ eto etsyukpa kenke. Mɔ ni kuyi eto ote kplɛ ǝmǝ wǝ ni Oka David eto ufluflu. Mɔ ni kolensiǝnto eto sefandebi sia lǝǝyǝnde.”

17 Lɛwɔnɔ nǝmǝ ku okafɔ ǝmǝ nkǝ, “Bǝ!”

Nya nwǝ ke nlɛ nnya bɔnɔ tsya tɛyi nkǝ, “Bǝ!”

Nya nwǝ ke utukɔɛ nlɛɛ, ubǝ. Nya nwǝ ke nlɛ ntu bo lǝǝtǝ nkpǝ bɔbɛbɛɛ, ubǝ ofo mu unǝ, kayo saa mamfo mamfo.

18 Mɔ Yohanes lɛ utsyuǝ saa wǝ laanɔ etiki nnya nkpe lǝ kukue komfo kafoo ato bukǝ kekleke miǝ utsyuǝ saa ke luufi lesatsyuǝ okpé lǝ nnya ǝsuǝǝ, Onanto ebufi kanyinyǝnyǝ ka báwɔni bakpé lǝ kukue komfo utǝkǝ wǝ lǝ ǝsuǝ fe kotonǝnǝ. 19 Nya lǝ utsyuǝ tsya ǝlǝkǝ lesatsyuǝ utsyiko lǝ nnya ǝsuǝǝ, Onanto embutǝ unyǝ kayofofo ka báwɔni bákpe lǝ kukue komfo ǝsuǝ. Weebunyǝ kedikɔ ka untǝnyǝ lǝ nkpǝ eto kudiyi komǝ ǝsuǝ ku lǝ umǝ kɛnkɛ ǝmǝ tsya ǝsuǝ.

20 Nwǝ nlɛ adansiɛ budi lǝ nyamfo ǝsuǝ lǝ bɔtɛyi nkǝ, “Ee, muubǝ lǝ leefe kliminti ǝsuǝ!”

Ibǝ itǝ. Bonamute Yesu, bǝ!

21 Bonamute Yesu eto lefonǝ lǝ disiǝko utsyuǝ saa.