10
Yesu Ǝtǝ Wǝ Batɔnkpe Lefosi Inuǝ Bamǝ Ǝsuǝale.
1 Yesu ákpadi wǝ batɔnkpe lefosi inuǝ bamǝ ɔ́kɔ nya útǝ mǝ ǝsuǝale nkǝ bala awɔnɔ bua bǝlǝkǝlǝ betidi ǝsuǝ nya lǝ batsya mǝ efimbi, efimbi saa tsya.
2 Batɔnkpe lefosi inuǝ bamǝ eto aye ni
Simon wǝ bensi baakpo Petro ku wǝ ɔyimi Andrea
ku Yakobo ku wǝ ɔyimi wǝ baakpo Yohanes baa ni Sebedeo eto bebi
3 ku Filipo ku Bartolomeo ku Toma
ku Mateo wǝ laafo umǝnko
ku Yakobo wǝ ni Alfeo eto ubi ku Tadeo
4 ku Simon wǝ ditsyi Kana
ku Yuda Iskariot wǝ dídu Yesu útǝ.
Bisu Bebe Ditiki Sɛɛ Nǝmǝ Letsya.
5 Yesu ǝtsyǝ lefosi betidi inuǝ bamfo kusu nya ótsyese mǝ nya úkǝ mǝ ato nkǝ, “Biensu betidi ba lenni Yudafɔ eto kasɔ nye bidufǝ Samariafɔ eto umǝ saa tsya kafo. 6 Bomu bisu Israel bebi ba diyifo fe basamu ba lénya kusu ɔflɔ. 7 Bisu bebe letsya biǝnkǝ, ‘Onanto eto Sekakedidi eboyo selo.’ 8 Betsya befimfi lǝ betakasǝ mba díkpǝ. Betsya mba nlɛ bufisia bufi, lǝ bela awɔnɔ bua bitsyiko lǝ betidi ǝsuǝ. Bíanya ǝsuǝale nyamfo bitsyiko mɔ ɔflɔ nyaso mi tsya biemfi nnya bete befo atabi. 9 Bientsyi atabi saa lǝ mi katobe. 10 Mi kuutsyuǝ mentsyi otobe fe mba laatɔ asa, awu nuǝfǝ, afɔkpa nye ɔlɛ uyi ɔyɛ kusu. Uyifoyifo ǝńyǝ utǝ lesa nǝ wuudi.
11 “Lǝ bidufǝ umǝ nye kebuto kǝtsyuǝǝ, bɛbɛbɛ utidi sɛɛ wǝ loola nkǝ woafo mi. Bɛsɔnɔ lǝ wǝ ɔflɔ lǝ bɛkɛ mfo isu ese lefe nǝ biudu. 12 Lǝ bidufǝ diyo ditsyuǝ, bisiǝsǝ mǝ biǝnkǝ, ‘Diyuǝ itǝ mi.’ 13 Lǝ báfo mi ku kafo faa, bitǝ lǝ mi diyuǝ eto kǝsiǝ kamfó lǝ kǝsiǝ ku diyo nǝmfó kenke eto utsyuǝ saa. Nya lǝ bamfo mii, diyuǝ eto kǝsiǝ kamfó bǝ mi ɔflɔ. 14 Nya lǝ diyo nye umǝ ǝmǝ eto betidi mámfo mi nye báni bámfo mi ditikii, nyalɛ bidu mfó lǝ bɛflɛ mi nkpafo eto site bekpo lǝ umǝ ǝmǝ. 15 Nlɛ mi bɔtɛyi sitinti minkǝ lǝ diyi fɛfɛ nǝ Onanto lookponko kawunsiǝ eto betidi lekpo ǝsuǝǝ, wuunyǝ Sodom ku Gomora eto betidi kaminsǝ kulaa tsya oso umǝ ǝmfo eto bale.
Betidi Bǝtsyuǝ Ǝǝbɔkpɔ Mi Bǝńyǝ Mi Lǝ Ǝsuǝ.
16 “Bɛlɔ bɛnɔ! Nlɛ mi botsyese fe basamu lǝ bekiti eto nti. Bitǝkǝ ǝnǝ fe bawa seka, nya bɛlɛ mi ǝsuǝ kukɔnɔ fe ablonima. 17 Bebe mi ǝsuǝ kukɔnɔ, itsyise betidi ebumuǝ mi, bakpa mi besuko akpokakpokɔ. Bɔɔblɛ mi lǝ Yudafɔ eto ntsyakɔ. 18 Lǝ mɔ disi esoo, bookponko mi akpo lǝ Aba eto beninǝ ku baka eto ǝnǝmi. Lǝ mfóo, bɛtɛyi mǝ ku mba lenni Yudafɔ Ditiki Sɛɛ nǝmǝ. 19 Lǝ bákpa mi bésuko lekpokakpokɔɔ, biembu disi lǝ lesa nǝ biɔtɛyi, nye kase biɔtɛyi nnya. Lǝ lefe nǝmfo ayoo, boote mi lesa nǝ biɔtɛyi. 20 Itsyise inni mi loote etiki nnya buidi, bomu mi Anto Onanto eto Lɛwɔnɔ luudi etiki ɔyɛ lǝ mi ǝsuǝ.
21 “Betidi ebudu mǝ bayimi bǝtǝ bǝ balo. Nya antomǝ tsya luuyifo nko ke ku mǝ bebi. Bebi ebotaka bǝńyǝ lǝ mǝ antomǝ ǝsuǝ bedu mǝ bǝtǝ bǝ balo. 22 Utsyuǝ saa ebukisi mi lǝ mɔ disi eso. Fɛɛ utsyuǝ saa wǝ luuńyǝ kekleke lǝ wǝ bofokanɔ ǝsuǝ isu ese kalosǝkɔɔ, boofo wǝ lǝ nkpǝ. 23 Lǝ bati mi kama lǝ umǝ ɔnii, bitsyetsyi bisu umǝ bamba. Nya nlɛ mi bɔtɛyi sitinti minkǝ, biembuyifo mi keyifo belosǝ lǝ Israel eto kǝmǝ ka kenke fɛ mɔ, Utidi Eto Ubi luubǝ.
24 “Okasebi saa aanso wǝ oteasa. Odomunyǝ saa tsya aanso wǝ onamute. 25 Nyasoo, ele bǝ imi, okasebi saa nkǝ wuubǝ utsyǝ fǝ wǝ oteasa seka. Nya ndomunyǝ tsya luubǝ utsyǝ fe wǝ onamute. Nya lǝ bákpadi oyosate utsyuǝ bǝ Awɔnɔ bua eto ɔtɔnkotɔnko nyaalɛ nte aye bua nya eto okle bembokpo diyo nǝmǝ eto bebi?
Mante Betidi Sikpi.
26 “Nyaso biante betidi sikpi, itsyise lesa saa nǝ ǝsuǝ béti asa bakulaa, bɔɔsini asa lǝ nnya ǝsuǝ, nya asakulakula saa ebɔbɔɔ lekple banɔ. 27 Lesa nǝ minlɛ mi bɔtɛyi lǝ ketuntu lefee, bɛtɛyi nnya lǝ kalekpakpa ǝsuǝ. Nya lesa nǝ batɛyi mi lǝ kawɛ ǝsuǝ, bebe nya letsya lǝ utsyuǝ saa lǝ ɔnɔ. 28 Biante mba ini etidisuǝ ete boofo bolo fɛ bembofo okla bolo sikpi. Bomu bete Onanto wǝ loofo utidi eto ǝsuǝ eto sinǝ ku lɛwɔnɔ bolo lǝ ute wǝ laatonsǝ asa sikpi. 29 Lǝ efi kablɛ kanii, foofo ntsyuɛ nnuǝ boya tsyaa, ke kani kplo embukpǝ lǝ inni Boanto Onanto eto lelabi. 30 Nya mimii, Onanto yi mi disi eto sɛwɔni eto leklabi kenke. 31 Nyaso biante sikpi, itsyise befo koya beso baklɔbɛ kpǝ.
Kɛnyɛbulǝkǝ Kate Lǝ Yesu Eto Dikiti Sɛɛ Ǝsuǝ Ku Wǝ Bɔni.
32 “Utsyuǝ saa wǝ luulǝkǝ kɛnyɛ lǝ betidi nti ɔtɛyi nkǝ uyifo mɔ olee, mintsya ebofo wǝ fe moole lǝ mɔ Anto Onanto eto ǝnǝmi kato. 33 Fɛɛ lǝ utsyuǝ áni mɛ lǝ betidi ba tã eto ǝnǝmii, mintsya ebɔni wǝ lǝ mɔ Anto wǝ kato eto ǝnǝmi.
Betidi Ebusǝnsǝ Lǝ Mɔ Disi.
34 “Biembu biǝ mbǝ diyuǝ kabokokɔ lǝ kawunsiǝ. Owo lo! Mǝmbǝ diyuǝ kabokokɔ, bomu kabia! 35 Mbǝ miǝ mǝǝnǝ kabia nkpe
‘lǝ bebisaibi ku mǝ antomǝ lenti,
lǝ bebisiobi ku mǝ ambemǝ lenti,
lǝ bebisiǝ ku mǝ bese ambe mǝ lenti.
36 Nya utidi eto olo sitintii, ebutsyi wǝ kosate eto diyo kafo.’
37 “Nya utsyuǝ saa wǝ laala wǝ anto nye ambe oso mɛɛ, mǝńyǝ itǝ bǝ uyifo mɔ okasebi. Nko ke ini bǝ utsyuǝ saa ke laala wǝ ubisaibi nye ubisiobi kulaa tsya oso mɛɛ, yǝnńyǝ itǝ bǝ uyifo mɔ okasebi. 38 Utsyuǝ saa ke dímentsyi wǝ uyikabie ɔyɛ mɔ kayɛkɔ utǝkǝko mɛɛ, mǝnńyǝ utǝ bǝ uyifo mɔ okasebi. 39 Utsyuǝ saa ke lela nkǝ waata wǝ nkpǝ eto disii, ebonyansǝ mu. Fɛɛ utsyuǝ saa ke loonyansǝ wǝ nkpǝ lǝ mɔ butǝkǝko esoo, wuunyǝ nkpǝ manlo sitinti.
Onanto Ebofo Betidi Ba Lefo Yesu Banɔ Kayo.
40 “Utsyuǝ saa ke loofo mii, mɔ ofo. Nya utsyuǝ saa ke loofo mɛɛ, ofo nwǝ létsyese mɛ tsya. 41 Utsyuǝ saa ke loofo Onanto eto unyɛlǝkǝtidi nkǝ uyifo Onanto eto unyɛlǝkǝtidi esoo, ebunyǝ kedikɔ lǝ unyɛlǝkǝtidi eto kayofofo ka woofo lǝ nnya ǝsuǝ. Utsyuǝ saa ke loofo utidi wǝ ni ɔsɛɛ itsyise uyifo ɔsɛɛnyǝ esoo, wǝ ku utidi ǝmǝ ebofo kayofofo itsyi lǝ keyifo ka úyifo eso. 42 Bebe nyamfo kukɔnɔ bǝ utsyuǝ saa wǝ luutǝ ntu yududu eto lɛkɔbetɔ mɔ bakasebi bamfo eto utsyuǝ lǝ mǝ nti lǝ mɔ disii, ebunyǝ kayofofo lǝ nnya eso kokooko.”