3
Ntuflǝsǝtidi Yohanes Ábe Letsya.
1 Lǝ lefe nǝmfó ǝsuǝǝ, Ntuflǝsǝtidi Yohanes ésu mfiminti lǝ Yudea eto kasɔ, nya útsyiko letsya bobe katɛyi 2 nkǝ, “Bítsyi mi akɔɛsi bɛwuninsǝ lǝ abuayifoyifo ǝsuǝ, itsyise Onanto eto Sekadidi eboyo selo.” 3 Yohanes ǝmfo ni utidi wǝ Onanto eto Unyɛlǝkǝtidi Yesaya lɛtɛyi útsyǝ nkǝ,
“Utidi utsyuǝ lɛ bofa bembembe lǝ mfiminti katɛyi nkǝ,
‘Bɛlɔ Bonamute eto kusu bitsyǝ.
Bɛtsyɔnsǝ wǝ kusu bitsyǝ itǝ wǝ bɔyɛ!’ ”
4 Nya awu nnya Yohanes lékpee, ɔtɔmini ku lekoko eto bise béfi bédi nnya. Nya úfi kubukikue eto abɔsu ókle nkɛ. Nya wǝ didisa dídi bekpǝsǝ ku bablɔ. 5 Nya betidi dítsyi Yerusalem eto umǝ ku Yudea eto kasɔ ku Yordan eto Ketu eto lekpake mfó kenke bǝbǝ wǝ ɔflɔ. 6 Bǝlǝkǝ mǝ asa bua kasɔ nya úflǝsǝ mǝ ntu lǝ Yordan eto ketu kafo.
7 Se Yohanes dínyǝ Farisifɔ ku Sadukifɔ kpǝ ba díbǝ wǝ ɔflɔ bǝ lǝ uflǝsǝ mǝ ntuu, ɔ́tɛyi mǝ nkǝ, “Mi mba nte fe bawa eto befluflu! Owoe lɛlɛ mi kɔlɛ nkǝ bitsyetsyi lǝ Onanto eto kotonǝnǝ ko nlɛ bubǝ eto kɛnyɛ? 8 Beté lǝ mi eyifosa ǝsuǝ biǝnkǝ bɛtsyi bɛwuninsǝ lǝ mi abua ǝsuǝ. 9 Nya biembu biǝ se ini Abraham eto befluflu bini esoo, Onanto embunǝ mi koto. Bɛlɔ bɛnɔ biǝ Onanto ebofo befluflu bulǝkǝ ketsyiko aba nyamfo ǝsuǝ kǝtǝ Abraham.
10 “Bebe se banlɛ kefiebi bǝńyǝ bǝ baala eyi nyamǝ taa keyudu ke. Kuyi saa ko laanwɔ ebibi sɛɛ, boola ko befi bakpe lǝ ditefɛnku kǝmiǝ.
11 “Mɔɔ, ntu mǝǝflǝsǝ mi nnya nlɛ bote bǝ bɛtsyi bɛwuninsǝ lǝ mi abuayifoyifo ǝsuǝ. Fɛɛ nwǝ ntǝkǝ mɛ kama ɔnlɛ bubǝǝ, wǝ ebufi Onanto eto Lɛwɔnɔ ku ute uflǝsǝ mi ntu. Ɔmɔ oso mɛ, nya mǝnńyǝ ntǝ bǝ nyifo wǝ keyifo kulaa tsya. 12 Utsyi wǝ kɔfɛ ko wuufi ɔflɛ wǝ kamɔ ulǝkǝ kofo fɛ lǝ ufi ke okpo lǝ unwu. Fɛɛ kofo ko luubuu, wootonsǝ ko lǝ utǝ wǝ laanni kulefe kulefe, kǝmiǝ!”
Yohanes Ǝflǝsǝ Yesu Ntu.
13 Lefe nǝmfoó, Yesu etsyi Galilea eto kasɔ úbǝ Yohanes ɔflɔ lǝ Yordan eto Ketu nkǝ lǝ Yohanes lǝ uflǝsǝ wǝ ntu. 14 Fɛɛ se Yohanes mánla nkǝ lǝ uflǝsǝ Yesu ntu esoo, ɔ́tɛyi wǝ nkǝ, “Mɔ bomu ele bǝ mbǝ fǝ ɔflɔ, nya inni fǝ ele bǝ bǝ mɔ ɔflɔ fǝ mflǝsǝ fǝ ntu.”
15 Fɛɛ Yesu ǝtǝ wǝ mbuayɛ nkǝ, “Fǝǝ, tɔnɔ lǝ eyifo nnya nko te mɔmɔ. Itsyise nko fɛ yuutǝ buyifo lesa nǝ ni Onanto eto lelabi nɛ.” Nyaso Yohanes átɔnɔ útǝ wǝ.
16 Nya se Yohanes díflǝsǝ Yesu ntu ólosǝ koo, ɔ́bɔ lǝ ntu bomǝ ǝsuǝ, nya mfó ǝmǝ kato léna nwaa nya úńyǝ Onanto eto Lɛwɔnɔ nlɛ bɔyifǝ kǝbǝ kasɔ fe lɛblɛkpa seka díbǝ dísiǝ lǝ wǝ ǝsuǝ. 17 Nya bánɔ ɔkɔɛ dítsyi kato ɔnlɛ bɔtɛyi nkǝ, “Nwǝmfo ni mɔ Ubi Lala wǝ mankeko, wǝ eto asa leedufǝ mɛ ǝnǝ tinti nɛ.”