1 Ditsyǝfǝ ni nǝmfo se minlɛ mi ɔflɔ bubǝ nɛ. Bawɔni bákpe lǝ Awɔnisa Kɛnkɛ eto Kukue ǝsuǝ bǝnkǝ, “Lǝ befi etiki lǝ utidi ǝsuǝǝ, ele bǝ bǝnyǝ badansiɛ inuǝ nye itsyǝ lǝ etiki nyamǝ ǝsuǝ fɛ lǝ balo wǝ dikpi.” 2 Se mímbǝ mi ɔflɔ dinuǝfǝǝ, nnkǝ mba díyifo abua kɔ ku babamba saa ato. Mɔmɔɔ, minsibǝ mi lǝ ɔflɔ mfó, nya nsi nlɛ mǝ ato bukǝ bio, bɔtɛyi minlɛ miǝ lǝ nsi mbǝ mi ɔflɔɔ, mǝmbɔni mba kenke diyifo asa bua koto bunǝ. 3 Nyamfo ebuyifo uyibose itǝ mi se bela biǝ biate biǝ Kristo eedi etiki ɛyɛ lǝ mɛ ǝsuǝ. Wǝǝnyuǝsǝ ǝsuǝ lǝ nnya weeyifo ku mi kulaa, bomu wǝǝlǝkǝ wǝ ǝsuǝale kate lǝ mi nti sitinti. 4 Ite bǝ bɔyɔkpɔ ǝsuǝ básɔ wǝ bámanklasǝ lǝ uyikabie ǝsuǝǝ, tsya eyɛ lǝ Onanto eto ǝsuǝale ǝsuǝǝ, ótaka úbǝ nkpǝ. Nko esoo, bo mba tsya diyifo bani ku wǝǝ, ayɔkpɔ. Fɛɛ Onanto ebokpe bo nkɛale nya otakasǝ bo bǝ bo tsya bofo lesa nǝ ele bǝ buyifo lǝ mi nti buyifo, itsyise bo ku wǝ si nkpǝ lǝ Onanto eto ǝsuǝale ǝsuǝ.

5 Beto mi ǝsuǝ bebe lǝ bisi nkpǝ lǝ bofokanɔ bomǝ ǝsuǝ. Bekatesǝ mi ǝsuǝ bebe kukɔnɔ. Lee bíunyǝ bítsyǝ lekpo biǝ Yesu Kristo kpe lǝ mi ǝsuǝ sitinti? Biyi nko, nyalɛ ibǝ bǝ binyǝ bitsyǝ lekpo biǝ bíambɔ béfe lǝ botokabe bomǝ ǝsuǝ. 6 Mfo nnɔ miǝ biunyǝ bitsyǝ lekpo biǝ bo alɛɛ, bɔ́flɔ.

7 Bɔlɛ ola boto katɔ Onanto boǝ wǝntǝ lǝ biyifo kolesa saa nǝ leni lɛsɛ. Bɔlɛ nyamfo bɔtɔ, inni lǝ bufi boté betidi boǝ bɔflɔ lǝ bo batɔnkpe eto keyifo ka bɔnlɛ buyifo ǝsuǝ eso. Bomu bɔlɛ nyamfo bɔtɛyi bǝ lǝ mi kosate lǝ bikeyifo lesa nǝ ni lɛsɛ lǝ ibǝ bǝ bóabɔ bófe lǝ boto kabe bomǝ ǝsuǝ kulaa tsya. 8 Itsyise boǝmbofo kulesa buyifo kǝńyǝ lǝ Ditiki Sɛɛ nǝmǝ ǝsuǝ, bomu lesa nǝ buyifo hã ni nǝ luusukosǝ ni sɛtɔ. 9 Ǝsuǝ ǝǝyuǝ bo lǝ binyǝ sɛtɔsusu lǝ mi bofokanɔ ǝsuǝ, nya iyifo fe bo ǝsuǝale ǝǝbǝ kasɔ lǝ mi nti lǝ nnya ǝsuǝ. Nyaso tsya boato ola boǝ lǝ bebe bɛbɔ disi lǝ mi bofokanɔ ǝsuǝ nɛ. 10 Lǝ nyamfo eso minlɛ nyamfo bɔwɔni kǝtǝ mi lefe nǝ mimmbǝ mi lǝ ɔflɔ nɛ, itǝ bǝ lǝ mbǝ mi ɔflɔɔ, lǝ nyɛ mi etiki bunǝnko kekleke lǝ ǝsuǝale nnya Bonamute ditǝ mɛ ǝsuǝ. Útǝ mɛ ǝsuǝale nyamfo bǝ lǝ mi bofokanɔ lǝ bobe kato bumuǝ ale boso, nya inni bǝ lǝ ntǝ lǝ buyuǝ kɛnyɛ.

11 Lǝ kalosǝkɔɔ, mɔ bayimi, nlɛ mi bokla miǝ bisiǝ kukɔnɔ. Bebe bɛbɔ disi kenke lǝ mi bofokanɔ ǝsuǝ. Bitsyue koto bɛnɔ asa nnya kenke ǝsuǝ mínlɛ mi kɔlɛ lǝ kukue komfo ǝsuǝ. Bitǝ lǝ mi kɛnyɛ lǝ keyifo kani nya lǝ bisiǝ lǝ diyuǝ ǝsuǝ. Nya Onanto wǝ laala betidi nya wǝ ǝtǝ diyuǝǝ, lǝ usiǝko mi.

12 Bisiǝsǝ mi bǝtsyuǝ lǝ lelabi ǝsuǝ fe bayimi seka.

13 Bafokanɔfɔ kenke bǝ bǝǝsiǝsǝ mi!

14 Bonamute Yesu Kristo eto lefonǝ ku Onanto eto lelabi ku Lɛwɔnɔ Kɛnkɛ eto lɔniyifoyifo lǝ disiǝko mimblɛ kenke.