1 Lɛwɔnɔ Kɛnkɛ ǝlǝkǝ óte bo ókpasǝ nkǝ, fɛ kawunsiǝ eto kalosǝkɔ looyoo, betidi bǝtsyuǝ ebɔbɔ lǝ bofokanɔ eto Ditiki Sɛɛ nǝmfo ǝsuǝ bǝtǝkǝko bidia eto awɔnɔ nnya mba luufi mǝ ǝsuǝ bǝtǝ obuale ǝmǝ eto asatete. 2 Bidia eto asa betidi bamfo laate, nya buufi mǝ disiale eto asatete bakula, itsyise mǝ akɔɛsi ǝkpǝ fe situ ku ute béfi bátonsǝ nnya, bǝmbǝ ɔnukualɛ. 3 Mǝ laate bǝ yanle bǝ betidi fi kusiǝ. Nya baatɛyi bǝnkǝ yanle bǝ bedi edisa ǝtsyuǝ eto okle tsya. Fɛɛ Onanto wǝ díyifo edisa kenke utsyǝ nkǝ mba léfo wǝ ditiki banɔ bentekǝko wǝǝ, lǝ bedi ku lɛninsɔ. 4 Nya sitintii, asa nnya kenke Onanto díyifoo, alɛkɛ. Nyaso yanle bǝ utidi saa kisi didisa kuditsyuǝ. Bomu ele bǝ bafo ditsyuǝ saa ku olatoto ku lɛninsɔ. 5 Itsyise Onanto eto ditiki nǝmǝ ku bo lɛninsɔ lǝǝyifo didisa nǝmǝ kɛnkɛ.

6 Lǝ até fǝ bayimitsyuǝ asa nyamfoo, nya ǝsuǝ fɔɔyɛ afiani Yesu Kristo eto ɔwunsǝko sɛɛ nɛ. Lǝ nya féfi bofokanɔ eto etiki nyamǝ ku asatete fékluǝsǝ ǝsuǝ esoo, nyamfo luutǝ fǝ ǝsuǝle nɛ. 7 Nyaso lǝkǝ fǝ ǝsuǝ etsyiko lǝ amamosa nnya betidi laatɛyi nya dimanyɛ lǝ konantosu nya lǝmbǝ kutǝkǝ saa. Nya kase konantosu lǝ ǝtǝkǝko ko kekleke. 8 Ǝsuǝ eto bunǝ itǝ ale bɔkɛ alɛkɛ lǝ kusu kutsyuǝ, tsya Anantotiki bufi kekulǝsǝ ǝsuǝ ku nya bokase kpe kutǝkǝ eso nyamblɛ kenke. Itsyise yuutǝ fǝ kutǝkǝ lǝ nkpǝ bomfo ku lǝ kǝkpǝma eto nle tsya. 9 Nyamfo eyifo ɔnukualɛ wǝ ele bǝ utsyuǝ saa fo ɔnɔ. 10 Nyamfo eso bɔnlɛ keyifo kekleke nya bɔnlɛ kanyi saa bunyǝ nɛ. Itsyise bo kusubebe tǝkǝ lǝ nkpǝ manlo bo Onanto wǝ ni betidi ba tã eto Ofomfokǝtǝ ǝsuǝ. Nya mba luunyǝ wǝ bofokǝtǝ ni mba léfo wǝ bánɔ.

11 Nyamfo ni asa nnya ele bǝ te mǝ nɛ. 12 Mǝntǝ lǝ betidi bǝtsyuǝ lǝ bǝnyǝ fe amamflɔ itsyise eyifo okosobi eso. Bomuu, fiani ditsyǝbi sɛɛ itǝ bafokanɔfɔ kenke ɛyɛ lǝ fǝ etikididi ku fǝ ditsyǝbi ku fǝ lelabi itǝ betidi ku fǝ bofokanɔ ku fǝ nkpǝ kɛnkɛ busiǝ tsya ǝsuǝ. 13 Ńyǝ kekleke lǝ akakla Onanto eto Ditiki Sɛɛ nǝmǝ ǝkǝtǝ bafokanɔfɔ kenke. Nyaso lǝkǝ nya kasɔ lǝ ate mǝ asa nyamǝ isu ese lefe nǝ muusinkli mbǝ. 14 Nya manyɛ Onanto eto Lɛwɔnɔ eto ǝtǝsa nnya úfi útǝ fǝ ɛyɛ lǝ wǝ bǝnyɛlǝkǝtidi ku bafokanɔfɔ eto batɔnkotɔnko ba dítǝkǝ fǝ anii, eto keyifo buyifo. 15 Tǝ lǝ fǝ nsusu lǝ butǝkǝ lǝ nyamfo ǝsuǝ, nya lǝ alɛ nko ekeyifo itǝ lǝ betidi ba tã lǝ bǝnyǝ lǝ fǝ nkpǝ sɛɛ bo fensi eto sɛtɔsusu. 16 Lɛ fǝ ǝsuǝ kukɔnɔ ku asa nnya faate. Nyǝ kekleke lǝ keyifo ka fanlɛ ǝsuǝ. Itsyise lǝ eyifo nkoo, ebulǝkǝ fǝ ǝsuǝ ku betidi kenke ba laanɔ fǝ ditiki etsyiko lǝ kotonǝnǝ ǝsuǝ.