140
Ŋeer ee ighason Maaron to ipoona pa koiŋa
Mbouŋ to David
1 O Yoova, ugham mulin ghau ila zeran sasaghati nimazi.
Upoon ghau pa yes tau tiliŋliŋ siŋ pa tamtamon. Mako pale tivaghamun ghau.
2 Monmon lolozi ighurghur pa ghamuuŋ ŋgar saghati,
ve tipapazaagh tamtamon pa ghamuuŋ malmal.
3 Avozi poia mako.
Saveeŋ tau tisiksiki na, ene ivavaghamunia tamtamon kat, imin moot saghati ighan tamtamon. * Ro 3:13; Yems 3:8
4 O Yoova, uvool tsiau, ve uŋgin ghau. Leso zeran sasaghati tikis ghau sov.
Yes tau tiliŋliŋ siŋ pa tamtamon na, tiliil eez to tigham ghau natap.
Umin sigheu payau, leso tivaghamun ghau sov.
5 Yes tau tipapait tauzi ve matazi veleghin ghom, tauta tighur liis itaghon eez ziige to tikis ghau.
Yes tiraar puugh toozi ila eez tau nalaghlaagh pani ne tighe tisaghav ghau.
6 Yau nasaav pa Yoova naghe: “Yo Maaron tsiau.”
Ughur taliŋam pa taŋiiz tsiau tane, ve uul ghau.
7 O Yoova, Tiina tsiau, yo Uleeŋa tsiau ariaaŋa.
Saawe tau naleep ila malmal loolo, yo ta umin sigheu payau.
8 Yoova, zeran sasaghati tilup zi, ve tiliil eez to tivaghamun ghau.
Upoon eez pazi, leso ŋgar toozi saghati tawe ighur mako. Upul zi tiliiv ghau sov. Pale tipakur tauzi.
9 Yes tilivutin ghau, ve tipakur zi tighe tiliiv ghau.
Saveeŋ sasaghati tau ivotvot ila avozi na, ighamgham pataŋani payau.
Upamuul saveeŋ tawe imuul ila pa tauzi, leso ivaghamun zi.
10 Ugham yav ŋgilaaŋi itaptap izala pavozi ve ighan zi.
Ve usuruuv zi tizila puura to mateegha tau izila le izila kat na. Leso tizaa muul sov. * Syg 20:15
11 Yes tau tiŋgalŋgal saveeŋ pa tamtamon na, uziir zi tighau pa taan tsiei.
Yau naghe pataŋani igham taghon yes tau tighamgham malmal na, ve ipasov zi rekia mon.
12 Yoova, yau nawatagh: Yes mbolaaŋa ve yes tau tibadbaad pataŋani ve tighur matazi payo na, yo aat uyooz pazi, ve uul zi pa pataŋani toozi. * Mbo 9:18, 34:6
13 Onoon kat, zeran duduŋazi pale lolozi poia payo ve tipait ezam,
ve tileep ila naghom irau saawe. * Mt 5:8