12
Tamtamon avozi karom. Ve Maaron saveeŋ tooni, ene onoon mon
Mbouŋ to David
1 O Yoova, uul ghei lak! Pa tamtamon tau lolozi isaghav ghom ariaaŋ ve titaghon eez tsio na, tisov wa.
Yes tau avozi onoon na, eta ileep tomani ghei muul mako.
2 Tamtamon tisov tighamgham karom, ve tisasavia saveeŋ tau le anooŋa mako pa zetazŋa.
Yamazi itortoor saveeŋ naol.
Saveeŋ tau ivotvot ila avozi, ene poia. Eemon ŋgar tau igheen ila lolozi, ene ite.
3-4 Yoova, zeran tau tisasavia saveeŋ ŋgoreeŋ pa tamtamon to tigham lolozi na, upoon avozi.
Yes tipapakur tauzi tighe: “Sei ta imin daaba payei ve iŋgin ghei?
Yei avomai maata. Saa ŋgar tau ighe nisavia, ene aat tamtamon titaghoni mon.”
O Yoova, ugham zi tineneeŋ.
5 Tauvene Yoova isaav ighe: “Yes mbolaaŋa tau tirau gabua eta mako, ve yes tau koiazŋa tivaghamun zi na, yau nalooŋ taŋiiz toozi wa.
Yes tipasawal pa lepoogh poia.
Tauvene aazne, yau aat naburig ve nauul zi.
Yau aat nagham mulin zi ila koiazŋa nimazi, ve nauul zi tileep poi.”
6 Yoova saveeŋ tooni, ene onoon mon.
Karom eta igheen ila loolo mako. Saveeŋ tooni, ene imin silva tau tighuru izala yav pai liim ve ru, leso muun ighau pani le iŋgalaaŋ kat.
Tauvene iit irau taghur ila saveeŋ mbuaaŋ tooni. * Mbo 19:9, 119:140
7-8 Onoon, aazne zeran sasaghati tipapakur zi ve tilaagh irau nugh nugh.
Ve eval tiina tipapait ŋgar saghati.
Eemon Yoova, yo matam payei, ve uŋgin ghei nileep poi.
Ve uponpoon ghei pa zeran tauvene irau saawe. * Yo 17:15; 1Pe 1:5