57
Maaron, utotoi tapirim ve poia tsio ivot ighazooŋ
Mbouŋ to David
Mbouŋ tane iŋarui saawe tau David ighau pa Saul, ve iyooŋ ila maet puura. Paesiiŋ ila pa ŋeer tau imuŋmuuŋ pa mbouŋ na tauvene: Mbouŋ tane aliiŋa, ene: ‘Ureua sov.’
1 O Maaron, yau besooŋa tsio. Lolom isaghatin ghau ve uul ghau lak!
Yau naŋarui ghom naghe nayooŋ ilat tsio.
Upoon ghau imin tatareek ipagud natŋa ila baage saamba, le irau pataŋani tane isov.
Pa aazne, lepoogh tsiau, ene imin naleep ila uman ma yaghur tiina loolo.
2 Yau nataŋ rarai Maaron Tiina Tau Iliiv Zimaronŋa Tisov na, naghe iuul ghau.
Pasaa, ŋgar tooni ighurghur anooŋa. Saa ŋgar tau i ighe ivot payau, ene aat ivot.
3 I pale ileep izi sambam, ve igham uleeŋ payau, ve igham mulin ghau.
Pale iyooz payau, ve itatan koiagŋa tau tinanaan ghau ne.
Pasaa, i loolo isaghav tamtamon tooni ve iuluul zi, ve saawe isov itataghon saveeŋ mbuaaŋ tooni.
4 Koiagŋa tilivutin ghau wa.
Yes timin laion tau luazi isaghat pa ghaniiŋ tamtamon.
Livozi maata kat imin paneegh natŋa ve iiz.
Ve yamazi paam, maata kat imin mbuzaagh to malmal.
5 Maaron, ugham ilaal eta ivot ila sambam saamba. Leso tamtamon tighita ve tighilaal ghom tighe yo ezam tiina kat.
Ve utotoi tapirim ve poia tsio le irau taan isov paam!
6 Pataŋani tane itatan ghau kat.
Pasaa, koiagŋa tiraar puugh payau tighe tisaghav ghau.
Ve titai puura ila eez tsiau, leso natap nazila.
Eemon mako. Tauzi titap tizila.
7 Maaron, lolog ruru payo mako.
Lolog isaghav ghom ariaaŋ.
Tauvene yau aat nambou ve narav gita to napakur ghom.
8 Lolog ighur naghe nughitun, o naburig, ve nagharaat taug,
ve narav ambam tsiau ve gita ila ila le aaz pisikia izaa.
9 Tiina tsiau, yau aat napait ghom pa poia tsio ila tamtamon to nugh nugh matazi.
Pale yeŋa tamtamon to nughmariŋ nilup ghei pa suŋuuŋ, ve nait mbouŋ to napait ghom.
10 O Yoova, yo lolom isaghav tamtamon tsio, ve uluul zi.
Ŋgar tsio tana, ene tiina le tiina kat. Izala izala le ikis sambam.
Ve ŋgar to taghoniiŋ saveeŋ mbuaaŋ tsio tauvene paam. Izala le ikis taitai. * Mbo 36:5
11 Maaron, ugham gabua eta ivot ila sambam saamba imin ilaal pa tamtamon. Leso tighita, ve tipait ezam izala le izala kat.
Ve utotoi tapirim ve poia tsio irau taan isov!