3
Saveeŋ iŋarui yes vaivaiŋa
1-2 Yam zilivaa vaivaiŋa paam, yau nasaav payam tauvene. Atatan taumim ve aleep ila azuwamimŋa sambazi. Isaav ighe toozi siriv tizorzoor Maaron aliiŋa, na yamŋa avazorai gham sov. Apul saveeŋ pazi. Pa ighe tighit gham atandagh pazi, ve aroi pa Maaron ve ataghon ŋgar tooni, ve agham ŋgar ŋgalaaŋa mon, ene pale ŋgar tsiam tana igherev zi tila pa Krisi. Leso yes paam tighur ila tooni, ve timin le. * 1Kor 7:14+; Kol 3:18; Tit 2:5
3 Eez naol tau tagharaat tauun leso paghunaan ila tamtamon matazi imin tapirai dabaan raua, ma tapabood ghiit pa gabua milmilia, ma tanonogh ghiit pa nonoghiiŋa popoiazi tau atuyazi tintiina, yam zilivaa agham ŋgar tiina pani sov. Pa ene gabua sorok to uliin mon. 4 Yam aat azuari gham pa tikooŋ tauu. Ene ŋgar popoia to Maaron tau igheen ila loloon. Isaav ighe yam atatan taumim ve ataghon ŋgar luuma, na ŋgar tsiam tana pale imin tikooŋ tauu payam. Tikooŋ tauvene irau isaghat mako. Pale igheen taghon taghon gha ila. Ve ila Maaron maata, ene gabua tiina ve gabua tauu. * 1Tim 2:9+
5 Muuŋ, yes zilivaa patabuyaaŋa tau tighurghur matazi pa Maaron na, tigharaat tauzi tauvene. Yes titatan tauzi ve tileep ila azuwazŋa sambazi. 6 Imin Sara. I iloŋlooŋ azaawa Abaram aliiŋa, ve ipoii ighe ‘tiina tooni.’ Isaav ighe yam zilivaa agham ŋgar poia, ve aroi mako ve anumeer Maaron, ene aat ataghon Sara ŋgar tooni, ve amin i natlivaŋa.
7 Ve yam vaivaiŋa zitamoot paam. Matamim izi pa azuwamimŋa sov. Lepoogh tsiam tomani zi, matamim iŋgal zi, ve agham poghani zi. Pa yam awatagh: Yes tapirizi tiina mako. Ve Maaron ighe itotoi poia tooni pazi leso tigham lepoogh poia ila tooni raraate imin yam. Tauvene isaav ighe agham saghatin zi, ene pale Maaron ipoon taliiŋa pa suŋuuŋ tsiam. * Ep 5:25; Kol 3:19
Talup ghiit tamin eemon, ve tagham poghania tamtamon
8 Aiyo, nasavia saveeŋ tane, ve isov. Yam asov alup lolomim ve ŋgar tsiam imin eemon. Isaav ighe tamtamon eta loolo ipataŋan, na lolomim ipataŋan tomania. Ve ighe loolo poia, na lolomim poia tomania. Lolomim pa toŋvetaz tsiam to Krisi ve agham poghani zi. Ve lolomim isaghatin tamtamon ve auul zi. Ve agham pa ezamim sov. Yam aat atatan taumim. * Lu 6:36; Ro 12:10, 16; Pil 2:2+
9 Isaav ighe tamtamon tigham ŋgar saghati payam, na ayatu sov. Ve ighe tisik saveeŋ saghati payam ve tivelegh gham, na ayoli sov. Yam aat agham poghani zi, ve aghason Maaron to ighur poia tooni izaa toozi. Pasaa, i ipoi gham amin le, leso ataghon ŋgar tane. Isaav ighe agham tauvene, ene pale poia tooni izaa tsiam paam. * Mt 5:44; Ro 12:14; 1Tes 5:15
10 Pasaa, Maaron aliiŋa isaav tauvene:
“Isaav ighe tamtamon eta loolo pa lepoogh poia, ve ighe ighita saawe poia ve ileep toman tintini, i aat iŋgin poghania aavo. Leso saveeŋ saghati, ma karom eta ivot ila aavo sov.
11 Ve i aat ighur muuri pa ŋgar saghati, ve igham ŋgar poia mon. Ve izuari ghi pa ŋgar luuma, ve iil eez to yesŋa tamtamon tisov tivalupu zi timin eemon ve tileep poia.
12 Pasaa, Ŋeer Tiina maata pa tamtamon duduŋazi, ve ighurghur taliiŋa pa suŋuuŋ toozi.
Eemon yes tau tighamgham ŋgar saghati na, i maata ighaughau pazi ve ighurghur koi pazi.” * Mbo 34:12+
Saveeŋ iŋarui yes tau tibaad pataŋani pa Krisi eeza
13 Isaav ighe yam azuari gham pa ghamuuŋ ŋgar poia, na sei pale irau ivaghamun gham? Mako. * Onoon, tamtamon irau tivaghamunia iit tamtamon to Krisi anoŋaan. Eemon irau tivaghamunia anunuun ne mako. Pasaa, Maaron iŋginŋgin ghiit. * Mt 10:28; Ro 8:31, 35+
14 Eemon isaav ighe ataghon ŋgar duduuŋa ve abaad pataŋani pani, na lolomim poia. Pasaa, poia to Maaron pale izaa tsiam. Tauvene isaav ighe tamtamon tigham ŋgar eta to tiparoi gham, na aroi ve agham ŋgar naol sov. * Mt 5:10; 1Pe 2:20, 4:14
15 Yam aat aghur Krisi imin Tiina tsiam ila lolomim ve apatab pani.
Saawe isov, agharaat ŋgar tsiam poi. Ighe tamtamon tighason gham pa ghuruuŋ ila tsiam, na yam irau ayol ghasoniiŋ toozi, ve apaghazoŋai zi pa puughu tau aghurghur matamim pa saawe to Krisi igham mulin gham. * Kol 4:6
16 Ve alooŋ. Saawe tau yam ayol ghasoniiŋ toozi, matamim veleghin zi sov. Asavia saveeŋ marowa ve saveeŋ poia mon pazi. Aazne, tamtamon tiyauyau avozi payam, ve tivavaghamunia ezamim pasaa, yam agham ŋgar poia itaghon Krisi ŋgar tooni. Tauvene laghooŋ tsiam, yam aat ataghon ŋgar tau awataghi aghe ene iŋgalaaŋ mon ila Maaron maata. Leso koiamimŋa tawe tighita ŋgar poia tau aghamghamu na, ve mayazi. * Tit 2:8; 1Pe 2:12
17 Tauvene isaav ighe Maaron ighe tabaad pataŋani pa ŋgar poia tau taghamu ne, ene poia. Tayok pani mon. Eemon isaav ighe tagham ŋgar saghati ve tabaad pataŋani pani, ene poia mako. * 1Pe 2:20
Krisi, i ŋeer duduuŋa. Eemon ibaad pataŋani, leso igham ghiit tala to Maaron
18 Agham ŋgar pa Krisi. I ŋeer duduuŋa kat. Eemon i igham iit tamtamon sasaghatiin niaan, ve iyamaan yavyavuuŋ ila tiini gha imaat, leso ireu sosor toit, ve igham ghiit tala to Maaron. Uraat tooni tawe, i ighamu pai eemon, ve isov. Irau ighamu muul mako. Ve Maaron Avuvu ipaburigini pa mateegh, ve aazne i ileep maata yaryaare izi sambam. 19 Saawe tau iburig pa mateegh, i ila ivotia Maaron aliiŋa pa avuvu sasaghati tau tizeev zi tiloŋ tila ruum to yavyavuuŋ loolo na. † Saveeŋ ziiri tane puughu ighazooŋ geeg mako. Eemon zeran ŋgara siriv tighe saveeŋ tane puughu, ene vene: Saawe to Noa, yes aŋela sasaghati tau titaghon Sadan na, tigham taliiŋzizi kat, ve tipazaagh tamtamon pa ghamuuŋ ŋgar sasaghati naol. Tauvene Maaron iziir zi tila tileep izi nugh ee. Leso tisaŋan saawe to i ighur katin atuya pazi. Saawe tau Krisi imaat, i ila to yes aŋela sasaghati tawe, ve ivotia saveeŋ pazi ighe i iliiv zi wa. * Ro 5:6; Hib 9:26; 1Pe 4:6
20 Muuŋ, saawe to Noa, avuvu sasaghati tawe tizorzoor Maaron aliiŋa. Eemon i ighur atuya pazi rekia mako. I isaŋan Noa le ipasov uraat to vaghuzuuŋ waaŋ, ra ighur atuya pazi. Yes tau tiloŋ tila waaŋ loolo na, eval mako. Yes liim ve tol mon. Ve saawe tau yaa ivon toman tapiri, Maaron iuul zi ve tileep poia. * Gnp 6:5–7:24
21 Yaa tawe, ene imin ŋgar to ghamuuŋ yaa tau aazne igham mulin gham na. Ene nasavia ŋgar tau tirughuuz ghiit ve muun ighau pa tiniin ne mako. Pasaa, ŋgar duduuŋ to ghamuuŋ yaa, ene vene: Iit taghason Maaron to igham ghiit taŋgalaaŋ ila i maata, ve tambu saveeŋ to tataghon ŋgar tooni. Ŋgar tauvene irau igham mulin gham pasaa, Maaron ipaburigin Yesu Krisi pa mateegh wa. * Tit 3:5; Hib 10:22
22 Ve i izala pa sambam, gha aazne ileep ila Maaron niima tapir. Tauta aŋela tomania avuvu maata maata tau ezazi ve tapirizi tiina na, tisov tileep ila i saamba. * Mbo 110:1; Mk 16:19; Ep 1:20+
*3:1-2: 1Kor 7:14+; Kol 3:18; Tit 2:5
*3:8: Lu 6:36; Ro 12:10, 16; Pil 2:2+
*3:9: Mt 5:44; Ro 12:14; 1Tes 5:15
*3:13: Onoon, tamtamon irau tivaghamunia iit tamtamon to Krisi anoŋaan. Eemon irau tivaghamunia anunuun ne mako. Pasaa, Maaron iŋginŋgin ghiit.
*3:14: Mt 5:10; 1Pe 2:20, 4:14
†3:19: Saveeŋ ziiri tane puughu ighazooŋ geeg mako. Eemon zeran ŋgara siriv tighe saveeŋ tane puughu, ene vene: Saawe to Noa, yes aŋela sasaghati tau titaghon Sadan na, tigham taliiŋzizi kat, ve tipazaagh tamtamon pa ghamuuŋ ŋgar sasaghati naol. Tauvene Maaron iziir zi tila tileep izi nugh ee. Leso tisaŋan saawe to i ighur katin atuya pazi. Saawe tau Krisi imaat, i ila to yes aŋela sasaghati tawe, ve ivotia saveeŋ pazi ighe i iliiv zi wa.
*3:19: Ro 5:6; Hib 9:26; 1Pe 4:6
*3:22: Mbo 110:1; Mk 16:19; Ep 1:20+