1 Leꞌa zha na nsob stop wizh gal ujest Pascua, zha ndaw bexa judio pan naꞌan levadur, leꞌa be uleꞌay nibeꞌe no be mech ten ley nkwaꞌan ná xteꞌe isen bexa Jesús dub mod na lá iniꞌí be men‑a, cha gut bexa Jesús. 2 Parea ndab bexa naꞌanpa isen bexa Jesús len ujest, ndontsa lá ixaꞌach be men gakloo ndoꞌ bexa.

3 Leꞌa dub wizh nsob Jesús ta lid Simón xa Betania, xa na mas polta usak gealgizh lepra. Weꞌe ulen dub xagots sa nsob Jesús ndoꞌ mes, nsea dub bot tuzh nakchaꞌaw geꞌ alabastro ncho sbeꞌen nardo ta uxeꞌe, dub ta uyappa nsak. Cha utiꞌich xa gen bot wa ndontsa myaꞌal‑a, cha ulo xa ta uxeꞌe wa gek Jesús. 4 Leꞌa ncho bexa nde sa wa ngokloo ndab bexa ndoꞌ be ltsaꞌa xa:

—¿Xtaꞌan ngi mbizhaꞌa xagots ndee ta uxeꞌe baꞌ zha? 5 Tal leꞌa xa ndi udoꞌo‑yá, leꞌa xa yoꞌo gan utseꞌa med wa ndoꞌ bexa uban nak. Leꞌa ta baꞌ nsak masa chon gayoꞌo denario.

Cha kweaꞌ uníꞌi bexa ndoꞌ xagots wa.

6 Naꞌ leꞌa Jesús ndab ndoꞌ bexa:

—Blaꞌa bega xagots baꞌ. ¿Xtaꞌan ngi li nisi bega xa zha? Leꞌa xa dub ta wen mbin ndoꞌ naꞌ. 7 Leꞌa bexa uban nak guniꞌi polga nchoka lat bega. No guniꞌi pol nlad bega, sak usaꞌa bega ta nkiꞌin bexa. Parea leꞌa naꞌ ndee naꞌanpa kwenta nchoꞌono bega. 8 Leꞌa xagots ndee mbin laktsa msuꞌu xa. Leꞌa xa ulo ned ta uxeꞌe gek naꞌ, gor biseata gal zha igaꞌach naꞌ. 9 Leꞌa naꞌ gáp ndoꞌ bega guniꞌi pa ndoꞌ gizhliyo gudiꞌizh be men diꞌizh wen ten Dios, no ta mbin xagots ndee gudiꞌizh bexa, ndontsa iniꞌí be men ta wen mbin xa.

10 Weꞌe leꞌa Judas Iscariot, dub xa nak isatibtop xmen Jesús, ngwaꞌ ndoꞌ be uleꞌay nibeꞌe, ndab xa leꞌa xa syun cuent Jesús. 11 Leꞌa gor na mbiꞌín bexa ta wa, cha mten ladna bexa, ndab bexa ndoꞌ Judas leꞌa bexa usaꞌa med. Leꞌa Judas cha usaxan mkwaꞌan ná xteꞌe yun xa cuent Jesús ndoꞌ yaꞌa bexa.

12 Leꞌa ngol wizh ned ten ujest zha ndaw bexa pan naꞌan levadur, wizh ndut bexa dub borreg ndaw bexa cuent ten ujest Pascua, leꞌa be xmen Jesús ndab ndoꞌ Jesús:

—¿Pa nlad go yaꞌyundeꞌe besa ta gaw beuna ujest Pascua?

13 Leꞌa Jesús cha mtuꞌub top xmen xa, ndab xa:

—Waꞌ bega gezh Jerusalén baꞌ, leꞌa gal sa izheꞌal bega dub xabgiꞌi noꞌo dub te ncho nits, cha usankea bega tsoꞌo xa. 14 Leꞌa sa na ilanseaꞌ xa, cha gud bega ndoꞌ xwan niꞌi wa: “Leꞌa mech nabdiꞌizh ná xá cuart ná usaꞌa ga gawno mech be xmen xa ta ten ujest Pascua.” 15 Leꞌa xwan niꞌi wa cha uluu dub cuart siꞌil ndoꞌ bega, ta nde gek niꞌi wa. Leꞌa sa wa listla nde be taꞌa guntiꞌin bega. Cha binchaꞌaw bega be ta gaw beuna sa wa.

16 Leꞌa be xmen Jesús cha utoꞌo nchaꞌbe len gezh wa. Weꞌe cha mzheꞌalka bexa men wa no be ta ndab Jesús. Cha mbindeꞌe bexa be ta gaw bexa ujest Pascua.

17 Leꞌa ngol gor uyoꞌo teꞌal, leꞌa Jesús ulayaꞌno isatibtop be xmen na len niꞌi wa. 18 Leꞌa gor na ndeyaw bexa ndoꞌ mes, leꞌa Jesús cha ndab:

—Leꞌa naꞌ gáp ndoꞌ bega leꞌa dub bega na ndeyaw beuna ndee leꞌa yun cuent naꞌ ndoꞌ bexa ndakloo ndoꞌ naꞌ.

19 Weꞌe leꞌa be xmen xa cha uban myoꞌo ladnabe, usaxan nabdiꞌizh dub gaꞌga bexa ndoꞌ Jesús, ndab bexa:

—¿Lid naꞌ ta wa zha, Mech?

20 Leꞌa Jesús cha ndab:

—Leꞌa ta wa leꞌaka dub isatibtop bega nsobyawno naꞌ ndee. 21 Leꞌa naꞌ, Xa Myak Men Ndoꞌ Gizhliyo, itiꞌidka lak nkeaniꞌi diꞌizh ten Dios. Parea proꞌob xabgiꞌi na yun cuent naꞌ ndoꞌ bexa wa. ¡Mas wen lá yoꞌo xabgiꞌi wa ndoꞌ gizhliyo!

22 Leꞌa gor na li ndeyaw bexa, leꞌa Jesús cha usen dub pan, cha msaꞌa xa xno ndoꞌ Dios. Cha uleꞌa xa‑yá, no mtseꞌa xa‑yá ndoꞌ be xmen xa, ndab xa:

—Udaw bega pan ndee, leꞌa‑yá beꞌal las naꞌ.

23 Cha liga usen Jesús dub vas ncho vin, cha msaꞌa xa xno ndoꞌ Dios. Weꞌe cha msaꞌa xa‑yá ndoꞌ bexa, cha ngu itea bexa‑yá. 24 Cha ndab Jesús:

—Leꞌa ta ndee ten ten naꞌ usa naꞌ por bego. Leꞌa ta ndee nluu leꞌa nat leꞌa Dios mbinno be men dub trat kub ná xteꞌe wen yaꞌan bexa ndoꞌ Dios. 25 Leꞌa naꞌ gáp ndoꞌ bego leꞌa naꞌ yá naꞌantapa goꞌo vin ten uv, gast gal wizh na goꞌo naꞌ vin kub sa nibeꞌe Dios.

26 Cha mbiltoꞌo bexa dub cant ndoꞌ Dios; cha utoꞌo bexa, nchaꞌbe bexa Bet Olivo.

27 Weꞌe leꞌa Jesús cha ndab ndoꞌ bexa:

—Leꞌa iteanak bego ulaꞌa naꞌ teꞌal ndee, lak nkeaniꞌi diꞌizh ten Dios, ndab‑a: “Leꞌa naꞌ gut xa nlaꞌach be borreg, cha iteꞌachso bema.” 28 Ná leꞌa tsoꞌo na iban naꞌ leꞌa naꞌ ned ilaya ndoꞌ bega Galilea.

29 Leꞌa Pedr cha ndab ndoꞌ Jesús:

—Maska itea bexa baꞌ ulaꞌa ga, ná leꞌa naꞌ naꞌanpa ula ga.

30 Leꞌa Jesús cha ndab ndoꞌ Pedr:

—Leꞌa naꞌ gáp ndoꞌ lu, leꞌa teꞌal ndee gor biseata kwezh boy top biaj, leꞌa lu mkwiꞌinla chon biaj ndab lu leꞌa lu lá nchandoꞌ naꞌ.

31 Ná leꞌa Pedr bi ndabkata:

—Maska gat naꞌ gor gat go, leꞌa naꞌ naꞌanpa gáp leꞌa naꞌ lá nchandoꞌ ga.

Weꞌe leꞌa iteata be xmen Jesús ndab lak ndab Pedr.

32 Cha ulayaꞌ bexa sa nsaleaꞌ Getsemaní, cha ndab Jesús ndoꞌ be xmen na:

—Ndeꞌetsa ute bega ndalen ndaꞌyadiꞌizhno naꞌ Dios.

33 Cha mbiꞌi Jesús Pedr no Jacob no Juan stub tuzh sa. Cha uzhebpa uban myoꞌo ladna Jesús no kweaꞌ myoꞌo ladna xa. 34 Cha ndab xa ndoꞌ yon bexa wa:

—Uzhebpa uban ncho lad naꞌ gast ngi sat naꞌ. Ndeꞌetsa utenaꞌ bega.

35 Cha usea Jesús stub tuzh sa, cha usaxib xa gast ndoꞌ yo ngol xtuzh xa. Cha ndadiꞌizhno xa Dios, ndab xa tal syoꞌo gan lá itid xa be gealkweaꞌ wa. 36 Lndeꞌe ndab Jesús ndoꞌ Dios:

—Tad Xus naꞌ, leꞌa go itea taꞌa sun gan. Lá nlad naꞌ itiꞌid naꞌ ndoꞌ be gealkweaꞌ uzheꞌeb ndee. Parea lá gak‑a lak nlad naꞌ, ndi gak‑a lak nlad go.

37 Leꞌa gor nseaꞌ Jesús sa nde yon be xmen xa, leꞌa bexa ndeyats. Cha ndab xa ndoꞌ Simón Pedr:

—Simón, ¿naxyats lu zha? ¿Ni lá uxik lu isobnaꞌ lu ni stub gor zha? 38 Utenaꞌ bega no bidiꞌizhno bega Dios, ndontsa naꞌanpa utsabgix maxuꞌu bega. Leꞌa ladoꞌo bega nlad gun ta wen, ná leꞌa idub bega lá uxik.

39 Cha nchaꞌagal Jesús nchaꞌyadiꞌizhno xa Dios lakkagal gor ned wa. 40 Leꞌa gor na nseaꞌgal Jesús sa nde yon be xmen xa leꞌa bexa ndeyatsgal, geal leꞌa bexa uzhebpa nyoꞌo xkaꞌalna. No ni lá iniꞌí bexa xteꞌe ikaꞌab bexa ndoꞌ Jesús. 41 Ngol biaj yon ngwaꞌyadiꞌizhno Jesús Dios. Leꞌa gor nseaꞌgal xa sa nde bexa wa, cha ndab xa:

—¿Bi ndeyats bega zha, no ndeuneꞌe bega zha? Yá unika‑yá, leꞌa nat yá ngol gor leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa bexa ugap. 42 Goste bega, nchaꞌbe beuna. Bwiꞌi bega leꞌa xa yun cuent naꞌ yá nseala baꞌ.

43 Bi li nsoꞌyadiꞌizh Jesús leꞌa Judas, xa no nak dub tibtop xmen Jesús, ulennola be men kwaꞌad noꞌo be spad nsea garrot. Leꞌa ta wa bexa mtuꞌub be uleꞌay nibeꞌe no be mech ten ley no bexa gox nsak isen bexa Jesús. 44 Leꞌa Judas, xa li yun cuent Jesús, ndabla ndoꞌ be men wa:

—Leꞌa xa na gaw naꞌ chit beꞌal ndoꞌ na, xa weꞌe isen bega, no gun segur bega xa, goꞌo bega xa.

45 Leꞌa gor na ulenno Judas be men wa, cha ubii Judas wats Jesús ndab xa:

—Mech, mech.

Cha mchealtoꞌo Judas ndoꞌ Jesús. 46 Weꞌe leꞌa be men wa cha usen Jesús, cha yá lá ulaꞌata bexa xa.

47 Zha leꞌa dub xmen Jesús cha uloꞌo spad ten na, cha ulobtoꞌog xa nchaꞌ dub xa ndun tiꞌin ndoꞌ uleꞌay ndon leꞌa nsak. 48 Cha ndab Jesús ndoꞌ be men wa:

—¿Xtaꞌan nseano bega spad nsea garrot isen bega naꞌ cuent dub waꞌan zha? 49 Itea wizh mluu naꞌ be men tale ten niꞌi ten Dios lat bega, ná lá isen bega naꞌ sa wa. Parea leꞌa ta ndee li ngok ndontsa gak‑a lak nkeaniꞌi diꞌizh ten Dios.

50 Weꞌe leꞌa itea be xmen Jesús cha mxoꞌon, mlaꞌa bexa Jesús.

51 Parea leꞌa dub xabgiꞌi ben nbix nabtsa dub bleꞌa lad siꞌil usankea tsoꞌo Jesús. Leꞌa gor na ndiꞌizh isen bexa no xabgiꞌi ben wa, 52 leꞌa xa wa cha mlaꞌa lad nbix na, mxoꞌon xa litsa naꞌanpa nak xa xab xa.

53 Leꞌa be men wa cha mbiꞌi Jesús ta lid uleꞌay ndon leꞌa nsak. Leꞌa sa wa leꞌa itea be uleꞌay nibeꞌe no bexa gox nsak no be mech ten ley cha mzhealbe. 54 Leꞌa Pedr sittsa nchankea tsoꞌo Jesús, cha no Pedr uyoꞌo len tale ten niꞌi wa. Weꞌe cha usob ubizhno Pedr bexa nlaꞌach sa wa sa nde giꞌ.

55 Leꞌa be uleꞌay nibeꞌe no iteata bexa nsak wa nkwaꞌanbe ná xteꞌe usake bexa Jesús, dub ta nsabndoꞌ gat Jesús. Parea leꞌa bexa ni lá izheal xteꞌe‑yá. 56 Leꞌa kwaꞌad be men mkwiꞌin nsake Jesús, ná leꞌa bexa wa naꞌanpa dubtsa ngudiꞌizhbe. 57 Weꞌe ngwasoꞌ pla bexa msake bexa Jesús, mkwiꞌin bexa ndab bexa:

58 —Leꞌa besa mbiꞌín leꞌa Jesús baꞌ ndab leꞌa xa ulate niꞌi ten Dios, ta mbindeꞌe men. Cha gal wizh yon leꞌa xa ixiste stub niꞌi ten Dios ta naꞌanpa men gundeꞌe.

59 Ni lika naꞌanpa dubtsa ngudiꞌizh bexa.

60 Weꞌe leꞌa uleꞌay ndon leꞌa nsak cha ngwasoꞌ ndoꞌ be men wa, unabdiꞌizh xa ndab xa ndoꞌ Jesús:

—¿Ni lá utsakndoꞌ lu zha? ¿Ta ugeaka ta ndab bexa ndee leꞌa lu li ndab zha?

61 Ná leꞌa Jesús naꞌan xteꞌe ngab, ni lá ikaꞌab xa. Weꞌe leꞌa uleꞌay wa cha unabdiꞌizhgal ndoꞌ Jesús ndab:

—¿Lu nak Cristo Xin Dios wen wa zha?

62 Leꞌa Jesús cha ukaꞌab ndab:

—Leꞌa ta wa naꞌka. Leꞌa bego gal gor iniꞌí leꞌa naꞌ, Xa Myak Men Ndoꞌ Gizhliyo, isob wats Dios lad gaꞌal, xa ndon leꞌa nibeꞌe, no ilen naꞌ lat xkaw nde gibeꞌa.

63 Weꞌe leꞌa uleꞌay ndon leꞌa nsak wa cha utsaw xab na tant ndakloo xa, cha ugeꞌ ndab xa:

—¿Xtaꞌanta nkiꞌin beuna kwaꞌadta xa usake xa ndee zha? 64 Leꞌa bega mbiꞌín xteꞌe unisi xa Dios. ¿Nat xteꞌe gab bega, xteꞌe gunno beuna xa?

Leꞌa iteanak bexa wa ndab leꞌa Jesús ndapka ke nsabndoꞌ gat xa.

65 Ncho bexa usaxan mchukko ndoꞌ Jesús. No mtsaw bexa ndoꞌ Jesús, udin bexa Jesús. Cha ndab bexa ndoꞌ Jesús:

—¡Gud ná ton udin lu!

Leꞌa bexa nlaꞌach sa wa cha utichyaꞌa ndoꞌ Jesús.

66 Ndalen wa leꞌa Pedr nsob tale wa. Cha ulen dub xagots ndun tiꞌin ta lid uleꞌay wa. 67 Leꞌa gor na uniꞌí xagots wa nsob ubizh Pedr, cha mwiꞌi xa ndoꞌ Pedr, ndab xa:

—Go no ukeseano Jesús xa Nazaret baꞌ, ¿la?

68 Leꞌa Pedr cha mkwiꞌin ndab:

—Leꞌa naꞌ lá nchandoꞌ xa baꞌ, no ni lá iní naꞌ xtaꞌan ndab ga.

Cha nchaꞌa Pedr mas gax toꞌo puert. Leꞌa gor wa cha utezh dub boy. 69 Parea leꞌa xagots wa uniꞌígal Pedr, cha usaxan xa ndab xa ndoꞌ bexa nde sa wa:

—Leꞌa xa ndee no nak dub xmen Jesús.

70 Ná leꞌa Pedr cha mkwiꞌingal ndab leꞌa xa naꞌanpa xa wa. Tsoꞌoma wa leꞌa bexa nde sa wa stub biaj ndabgal ndoꞌ Pedr:

—Ta ugeaka leꞌa go no nak dub xmen Jesús, leꞌa go xa Galilea no ndadiꞌizh ga lak ndadiꞌizh bexa Galilea.

71 Leꞌa Pedr cha kweaꞌ uníꞌi, ndab xa:

—¡Nsobwiꞌi Dios leꞌa naꞌ lá nchandoꞌ xabgiꞌi nseꞌat bego baꞌ!

72 Bi leꞌa gor wa leꞌa boy cha utezh biaj itop. Weꞌe mtseꞌa ladna Pedr ta ndab Jesús ndoꞌ Pedr: “Leꞌa teꞌal ndee gor biseata kwezh boy top biaj, leꞌa lu mkwiꞌinla chon biaj ndab lu leꞌa lu lá nchandoꞌ naꞌ.” Cha usaxan Pedr ndoꞌon.