1 Leꞌa dub wizh nsoꞌ Jesús toꞌo lagun nsaleaꞌ Genesaret. Leꞌa sa wa nde kwaꞌad be men nlad goꞌón diꞌizh wen ten Dios. 2 Leꞌa Jesús cha uniꞌí top barco nde toꞌo nits wa. Leꞌa bexa nsen mbeal ndeusat be red ten na. 3 Weꞌe leꞌa Jesús cha ukea ndoꞌ barco ten xa na nsaleaꞌ Simón, ndab xa ndoꞌ Simón:

—Bsiꞌi barco ndee isasitxá‑yá toꞌo nits.

Cha usob Jesús, cha usaxan xa nluugal xa be men kwaꞌad nde toꞌo nits wa. 4 Leꞌa gor na mtayadiꞌizh xa ndoꞌ be men wa, cha ndab xa ndoꞌ Simón:

—Btseꞌa barco ndee sa mas wat, cha btsaꞌab bego be red ten bega ndontsa igaꞌa mbeal.

5 Leꞌa Simón ukaꞌab ndab:

—Mech, leꞌa besa idub teꞌal mbin tiꞌin, ná ni dub man lá isen besa. Parea nat leꞌa naꞌ utsaꞌab red ndee leꞌa go leꞌa li ndab.

6 Leꞌa gor na li mbin bexa wa, leꞌa red wa cha mzhea uyoꞌo be mbeal gast usaxan nsasaw‑a. 7 Cha mbin bexa sein ndoꞌ be ltsaꞌa xa ndiꞌib ndoꞌ stub barco wa, ndontsa giꞌid yakno bexa. Leꞌa bexa wa cha ulenno stub barco, cha mchea bexa itop barco wa uyoꞌo be mbeal gast ngi slaꞌyoꞌo be barco len nits. 8 Leꞌa gor na uniꞌí Simón Pedr ta wa, cha msaxib xa ndoꞌ Jesús, ndab xa:

—Bxoꞌon ga wats naꞌ, Señor. Leꞌa naꞌ lá nsabndoꞌ isoꞌ wats ga, leꞌa naꞌ dub xa ndap ke ndoꞌ Dios.

9 Li ndab Simón geal leꞌa xa nsea be ltsaꞌa xa ndanseana no nzheb bexa gor na uniꞌí bexa ta na li mgaꞌa sian mbeal wa. 10 No liga ngwanseana Jacob nsea Juan, be xin Zebedeo, bexa ltsaꞌa ndunno Simón tiꞌin. Leꞌa Jesús cha ndab ndoꞌ Simón:

—Lá izheb lu, nat leꞌa lu gak xa yunjunt be men ndoꞌ Dios.

11 Leꞌa bexa wa cha myoꞌo be barco wa toꞌo nits ndoꞌ yo, cha mlaute bexa itea be taꞌa ten bexa, cha nchaꞌano bexa Jesús.

12 Leꞌa dub biaj zha uyoꞌo Jesús dub gezh, cha ulen dub xabgiꞌi wats Jesús, dub xa nsaꞌgea las na, nsén gealgizh lepra xa. Leꞌa gor uniꞌí xa Jesús, cha msaxib xa ndoꞌ Jesús gast ndoꞌ yo ngol xtuzh xa. Cha ndab xa ndoꞌ Jesús:

—Señor, tal go nlad yunyakna go naꞌ, leꞌa naꞌ uní leꞌa go sunka gan.

13 Leꞌa Jesús cha mxoꞌob yaꞌa na tsoꞌo xa wa, cha ndab Jesús:

—Nladka naꞌ yakna lu. Nat myakna lu.

Cha bi leꞌa gor wa leꞌa gealgizh wa cha unitndoꞌ. 14 Weꞌe leꞌa Jesús cha unibeꞌe ndoꞌ xa, ndab Jesús:

—Naꞌan ton ndoꞌ ná gudiꞌizh lu xteꞌe myakna lu. Ndi waꞌ ndoꞌ uleꞌay iniꞌí xa leꞌa lu myaklana. No biꞌi be man xnab lak unibeꞌe ley mkeꞌa Moisés usaꞌa be men zha na myakna bexa, ndontsa iniꞌí be men leꞌa lu myaklana.

15 Ná leꞌa be ta li mbin Jesús wa uzhebpa mgen. Weꞌe leꞌa kwaꞌad be men ulansea wats Jesús, goꞌón bexa diꞌizh ten Jesús nsea yunyakna Jesús bexa. 16 Ná leꞌa Jesús sian biaj ntoꞌo nab, ndaꞌyadiꞌizhno xa Dios sa naꞌan men.

17 Leꞌa ngol dub wizh leꞌa Jesús mluugal be men len dub niꞌi. Leꞌa sa wa no pla be mech ten ley ndebe no stapla bexa fariseo, bexa utoꞌo be gezh ten Galilea no be gezh ten Judea no Jerusalén. No uzheꞌeb msaꞌa Dios juers ndoꞌ Jesús yunyakna xa be men. 18 Cha ulayaꞌno pla bexa dub xabgiꞌi gizh lá yoo gan isea, nchoꞌob xa ndoꞌ dub yaloꞌon. Leꞌa bexa wa nlad goꞌo xa gizh wa gast len niꞌi sa nsoꞌ Jesús. 19 Ná leꞌa bexa wa lá yoꞌo gan yate len niꞌi wa tant kwaꞌad men nde sa wa. Cha ndi ukea bexa gek niꞌi, cha mxaꞌal bexa‑yá. Cha mlaꞌko bexa yaloꞌon nax xa gizh wa ndoꞌ na sa nsoꞌ Jesús lat be men wa. 20 Leꞌa Jesús cha mnaꞌla leꞌa bexa ngeꞌ ladna leꞌa Jesús sun gan yunyakna xa gizh wa, cha ndab xa ndoꞌ xa gizh wa:

—Mgiꞌi, leꞌa ke ten lu myuꞌula.

21 Weꞌe leꞌa be mech ten ley no bexa fariseo mbinbeꞌe: “¿Tonxá xa ndee zhaga? Leꞌa ta ndab xa uzheꞌeb dub ta lá nsak ladna Dios. ¡Ndon Diostsa suꞌu utsuꞌu be ke ten be men!”

22 Ná leꞌa Jesús cha mgenna xteꞌe ndanbeꞌe bexa wa, cha ndab Jesús:

—¿Xtaꞌan lbaꞌa ndanbeꞌe bega len ladoꞌo bega? 23 ¿Xtaꞌan mas lid bid gáp naꞌ, leꞌa ke ten xa ndee myuꞌula, nati gáp naꞌ gaste xa, cha isea xa? 24 Leꞌa nat iniꞌí bega leꞌa naꞌ, Xa Myak Men Ndoꞌ Gizhliyo, no syoꞌo gan utsuꞌu ke ten be men.

Weꞌe cha ndab Jesús ndoꞌ xa gizh wa:

—Gáp naꞌ ndoꞌ lu goste, cha udob yaloꞌon ten lu, cha byaꞌ ta lid lu.

25 Leꞌa xa wa cha uxax ngwaste ndoꞌ gaꞌal be men wa, cha udob xa yaloꞌon ngot xa ndoꞌ na wa. Leꞌa idub nes nseaꞌ xa nsaꞌa xa xno ndoꞌ Dios. 26 Leꞌa itea be men wa uzhebpa ngwanseana, no ndab bexa leꞌa Dios uzheꞌeb dub Dios siꞌil. No mzheb bexa, ndab bexa ndoꞌ be ltsaꞌa bexa:

—¡Nat uniꞌí beuna dub taꞌa uzhebpa ndanseana beuna!

27 Tsoꞌo wa leꞌa Jesús utoꞌo sa wa. Leꞌa sa nchaꞌtid xa uniꞌí xa dub xabgiꞌi nsaleaꞌ Leví nsobyun tiꞌin, nsen xa med nkix be men ndoꞌ gobier Roma. Cha ndab Jesús ndoꞌ xa:

—¡Utsea! ¡Usankea tsoꞌo naꞌ!

28 Leꞌa Leví cha ngwasoꞌ, cha mlaꞌa xa tiꞌin ndun xa wa, cha usankea xa tsoꞌo Jesús.

29 Cha ulo Leví dub gast siꞌil ten Jesús ta lid na. Leꞌa sa wa no kwaꞌad bexa ndun ltsaꞌa tiꞌin mbin Leví wa ngwaꞌbe, no kwaꞌad bexa xaꞌaga. Cha junt utebe bexa ndoꞌ mes. 30 Ná leꞌa be mech ten ley no bexa fariseo cha xela uníꞌi ndoꞌ be xmen Jesús, ndab bexa:

—¿Xtaꞌan ndawno bega bexa nsen med baꞌ no iteata bexa ugap baꞌ zha?

31 Leꞌa Jesús cha ukaꞌab ndab:

—Leꞌa bexa naꞌanpa gizh lá nkiꞌin doctor, ndi leꞌa bexa gizh nkiꞌinka xa wa. 32 Leꞌa naꞌ ndee naꞌanpa ndalteꞌezh bexa ndanbeꞌe leꞌa naꞌanpa ndap ke. Leꞌa naꞌ ndi ndalteꞌezh bexa ngondoꞌ leꞌa ndapka ke, ndontsa yach bexa wats Dios.

33 Weꞌe leꞌa ncho bexa ndab ndoꞌ Jesús:

—Leꞌa be xmen Juan ncho sian wizh lá ndaw bexa ndontsa mas gudiꞌizhno bexa Dios. No liga ndun be xmen bexa fariseo. Ná leꞌa be xmen go zha, ¿xtaꞌan lid no bexa li ndun? Sbeꞌen ndeyaw bexa no ndo bexa itea wizh.

34 Leꞌa Jesús cha ukaꞌab ndab:

—¿Nsak bega zha leꞌa dub sa nchilyaꞌa men leꞌa bexa nde sa wa lá nsabndoꞌ gaw zha bi ncho xabgiꞌi mchilyaꞌa wa? 35 Parea gal dub wizh leꞌa be men goꞌo xabgiꞌi mchilyaꞌa wa. Weꞌe leꞌa bexa nde sa wa lá gaw dub tiemp.

36 No cha msaktabeꞌe Jesús dub taꞌa mluu xa ndab xa:

—Naꞌan ton nxen dub bleꞌa lad kub, cha ko xa ramient ta wa las dub lad gox. Tal leꞌa xa li gun leꞌa lad kub wa syaꞌad, cha mas stsaw‑a lad gox wa. No leꞌa lad kub wa naꞌanpa nsakna no lad gox wa. 37 No naꞌan ton ngo vin kub len dub bols gid gox. Tal leꞌa xa li gun, leꞌa vin kub stsaw bols gox wa. Leꞌa vin wa cha ibid stsiꞌi, no sazhaꞌa bols gox wa. 38 Leꞌa vin kub wa nsabndoꞌ yoo len dub bols gid kubga, ndontsa ni dub‑a lá gazhaꞌa. 39 No tal ton goo vin ncho polta, cha yá lá kaꞌabta xa goo xa vin kub. Leꞌa xa ndab leꞌa vin ncho polta wa mas wen.