1 Leꞌa gor mtayadiꞌizh Jesús ta wa, cha mkaꞌan xa Galilea nchaꞌa xa Judea stub toꞌo yowbeꞌe Jordán. 2 Leꞌa sa wa leꞌa kwaꞌadpa men usankea tsoꞌo xa, cha myunyakna Jesús bexa gizh sa wa.

3 Weꞌe leꞌa pla bexa fariseo ulen wats Jesús, nlad bexa gab Jesús dub ta lid leꞌa nak, ndab bexa ndoꞌ Jesús:

—¿Utsin nak ulaꞌa dub xabgiꞌi xagots ten na, tal xa lá nsak ladna xtaꞌanla dub ta ndun xa zha?

4 Leꞌa Jesús cha ukaꞌab ndab:

—¿Lá ndoꞌol bega zha sa nkeaniꞌi diꞌizh ten Dios, leꞌa Dios leꞌa mbindeꞌe xabgiꞌi no xagots zha ned wa? 5 Cha ndab Dios: “Ta weꞌe ulaꞌa xabgiꞌi xus na no xnaꞌa na zha na ikaꞌa xa xagots ten xa. Leꞌa cuent ten Dios leꞌa itop xa wa yak dubtsa men.” 6 Leꞌa bexa wa dubtsa men myak, yá lid topta xa. Ta weꞌe gáp naꞌ leꞌa bexa mchealte Dios, lá nsabndoꞌ dub men uteltsaꞌa bexa.

7 Leꞌa bexa fariseo wa cha unabdiꞌizhgal ndab:

—¿Xtaꞌan ndab ley mkeꞌa Moisés zha leꞌa dub xabgiꞌi syoꞌo gan ulaꞌa xagots ten na, tal ned usaꞌa xa dub git ndoꞌ xagots, gab‑a leꞌa xa ulaꞌa xa wa?

8 Leꞌa Jesús cha ndab:

—Geal ngud nak ladoꞌo bega, ta weꞌe mkeꞌa Moisés syoꞌo gan li ulaꞌa bega xagots ten bega. Ná leꞌa zha ned naꞌanpa li ngak‑a. 9 Leꞌa naꞌ gáp ndoꞌ bego leꞌa tal ton dub xabgiꞌi ulaꞌa xagots ten na, cha ikaꞌa xa stubga xagots, leꞌa xabgiꞌi wa ndapka ke ndoꞌ Dios. No liga tal stub xabgiꞌi ikaꞌaga xagots wa, leꞌa xa wa no ndap ke ndoꞌ Dios. Ná leꞌa tal ton dub xagots ndap xabgiꞌi ugal stubga xabgiꞌi, leꞌa xabgiꞌi ten xa wa sak ulaꞌa xa.

10 Leꞌa be xmen Jesús cha ndab ndoꞌ Jesús:

—Tal li nsabndoꞌ lá ulaꞌa xabgiꞌi xagots ten na, mas wen naꞌanpa ukwaꞌan xa xagots.

11 Leꞌa Jesús cha ndab:

—Naꞌanpa itea xabgiꞌi uxik lá ukwaꞌan xagots, ndi ncho bexa li msaꞌa Dios nak bexa. 12 No ncho be xabgiꞌi lá ukwaꞌan xagots geal leꞌa zha ndalkata xa lá yoo gan gap xa xin xa leꞌa xa lá utsin nak. No ncho be xabgiꞌi leꞌaka be men li ndazhaꞌa xa. No ncho be xabgiꞌi lá ukwaꞌan xagots ndontsa mas gun xa tiꞌin ten Dios. Leꞌa tal ton bexa na syoꞌo gan li gun, leꞌa bexa nsabndoꞌka li gun ta wa.

13 Weꞌe leꞌa be men ulenno be meꞌed ten na wats Jesús, ndontsa uxoꞌob Jesús yaꞌa na gek be meꞌed, inab xa ulaꞌach Dios be meꞌed. Leꞌa be xmen Jesús cha uteyo bexa nseano be meꞌed wa. 14 Ná leꞌa Jesús cha ndab ndoꞌ be xmen na:

—Blaꞌa bego giꞌid be meꞌed baꞌ wats naꞌ. Lá uka bega giꞌid be meꞌed, leꞌa sa nibeꞌe Dios wa yate bexa yak lak nak be meꞌed ndee.

15 Cha mxoꞌob xa yaꞌa xa gek be meꞌed wa, weꞌe cha nseaꞌ xa.

16 Leꞌa dub xabgiꞌi cha ulen wats Jesús unabdiꞌizh xa ndoꞌ xa ndab xa:

—Mech wen, ¿xtaꞌan dub ta wen gun naꞌ ndontsa no naꞌ gap gealnaban ndoꞌ Dios, ta nunk lá idub zha?

17 Leꞌa Jesús cha ukaꞌab ndab:

—¿Xtaꞌan ngi wen ndab lu ndoꞌ naꞌ zha? Naꞌan ton wen ndoꞌ gizhliyo, ndon nabtsa Dios wen nak. Parea tal leꞌa lu nlad gap gealnaban ta nunk lá idub, bxobgek ndoꞌ be ta nibeꞌe Dios.

18 Leꞌa xabgiꞌi wa cha ndab:

—¿Xtaꞌanma be ta unibeꞌe Dios gun naꞌ zha?

Leꞌa Jesús cha ndab:

—Lá gut lu men. Lá ugal lu xa ten stubga men. Lá gun lu gealwaꞌan. Lá gun lu gealkwiꞌin. 19 Wankea xus lu nsea xnaꞌa lu. Bkweaꞌ ladna lu be ltsaꞌa lu lakkata lu.

20 Leꞌa xabgiꞌi wa cha ndab:

—Iteanak ta ndab go wa ndunka naꞌ idub zha tuzhta naꞌ. ¿Xtaꞌan ndun jwalt gun naꞌ?

21 Leꞌa Jesús cha ndab:

—Tal lu nlad gak lak nlad Dios, byaꞌ cha bdoꞌo itea be ta ndap lu, cha btseꞌa med wa ndoꞌ bexa uban nak. Weꞌe gap lu sian taꞌa ndoꞌ Dios. Cha utsea usankea tsoꞌo naꞌ.

22 Leꞌa gor na mbiꞌín xabgiꞌi wa ta wa, cha uban myoꞌo ladna xa, cha nseaꞌ xa, leꞌa xa uzhebpa sian taꞌa ndap.

23 Leꞌa Jesús cha ndab ndoꞌ be xmen na:

—Leꞌa naꞌ gáp ndoꞌ bega uzheꞌeb ugan yate dub xa rik sa nibeꞌe Dios. 24 Stub biaj gáp naꞌ‑yá: ndi mas lid bid itid dub came geꞌed xan dub yagux, ndoꞌ yak dub xa rik dub xa nibeꞌe Dios.

25 Leꞌa gor na mbiꞌín be xmen Jesús ta wa, cha uzhebpa ngwanseana bexa, ndab bexa ndoꞌ be ltsaꞌa xa:

—¿Tonxá syoꞌo gan yate sa nibeꞌe Dios zhaga?

26 Leꞌa Jesús cha mwiꞌi ndoꞌ bexa ndab xa:

—Leꞌa cuent ten nabtsa be men leꞌa‑yá lá yoo gan. Ná leꞌa cuent ten Dios itea taꞌa syoꞌoka gan.

27 Leꞌa Pedr cha ndab ndoꞌ Jesús:

—Unaꞌ go, leꞌa besa mlaꞌa itea be taꞌa ndap besa, cha ndi usankea besa tsoꞌo ga. ¿Ta weꞌe xtaꞌan ikaꞌa besa zha?

28 Leꞌa Jesús cha ndab ndoꞌ bexa wa:

—Leꞌa naꞌ gáp ndoꞌ bego leꞌa gal dub wizh yunchaꞌaw Dios iteanak be taꞌa, zha na leꞌa naꞌ, Xa Myak Men Ndoꞌ Gizhliyo, isoꞌob wats Dios sa inibeꞌe naꞌ. Leꞌa gal zha wa leꞌa bego nsankea tsoꞌo naꞌ nat noga gap tibtop sa isob bega inibeꞌe bega ndoꞌ isatibtop xkwaꞌa bexa Israel. 29 Leꞌa tal ton ulaꞌa lid na no wit na no bsan na no xus na no xnaꞌa na no xagots ten na no xmeꞌed na no be yo ten na ndontsa gun xa tiꞌin ten naꞌ, leꞌa xa wa ikayaꞌa stub gayoꞌo biaj mas be ta mlaꞌa xa wa. No gap xa gealnaban ta nunk lá idub. 30 Ná kwaꞌad bexa nsak nat wa, yak bexa naꞌanpa nsak; no leꞌa bexa naꞌanpa nsak nat wa, yak bexa nsak.