1 Uyoꞌo dub xabgiꞌi nsaleaꞌ Lázaro usen gealgizh. Leꞌa xa wa xa gezh Betania, sa no nak lazh Marí no Mart itop bsan Lázaro. 2 (Leꞌa Marí bsan Lázaro wa xa ulo ta uxeꞌe xoꞌo Jesús tsoꞌo wa, cha mkwiꞌid xa xoꞌo Jesús nsea gichgek xa.) 3 Ngol gor leꞌa itop bsan Lázaro wa mtuꞌub dub men ndoꞌ Jesús, ndab xa:

—Señor, leꞌa Lázaro amig ten ga usen gealgizh.

4 Leꞌa gor na mbiꞌín Jesús ta wa, cha ndab xa:

—Leꞌa gealgizh wa naꞌanpa gut xa. Leꞌa ta wa ndi ndontsa iniꞌí be men juers ten Dios no juers ten Xin Dios.

5 Leꞌa Jesús nkea ladna Mart no Marí beal xa no Lázaro. 6 Parea leꞌa gor na mbiꞌín Jesús leꞌa Lázaro usen gizh, leꞌa Jesús cha uyoꞌokata sa wa stop wizh. 7 Weꞌe cha ndab xa ndoꞌ be xmen xa:

—Nchaꞌbe beuna stub biaj distrit Judea.

8 Leꞌa be xmen Jesús cha ndabbe:

—Mech, ti plama wizh leꞌa bexa judio ncho sa wa nlad gut ga, ná nat, ¿xtaꞌan li nlad go yaꞌgal ga sa wa zha?

9 Leꞌa Jesús cha ukaꞌab ndab:

—Ncho dub tibtop gor tezhea kad dub wizh. Leꞌa tal ton ikesea gor tezhea naꞌanpa ikateꞌeb, geal leꞌa xa naꞌ bea ndoꞌ gizhliyo ndee. 10 Parea tal ton ikesea gor teꞌal, leꞌa xa skateꞌeb leꞌa gor wa naꞌan bea.

11 Cha no ndab Jesús:

—Leꞌa Lázaro amig ten beuna ngwadgats, ná leꞌa naꞌ ndaukwan xa.

12 Weꞌe leꞌa be xmen Jesús cha ndabbe:

—Señor, tal leꞌa xa naxyats, leꞌa xa syakkana.

13 Leꞌa ta li ndab Jesús wa gab leꞌa Lázaro ngutla, ná leꞌa be xmen Jesús ndanbeꞌe leꞌa xa naxyats‑tsa. 14 Weꞌe leꞌa Jesús cha gaꞌal ndab ndoꞌ bexa:

—Leꞌa Lázaro ngut. 15 Leꞌa naꞌ nten ladna naꞌanpa ncho beuna sa wa gor ngut xa. Li ndontsa mas igeꞌ ladna bega naꞌ. Nat nchaꞌinaꞌ beuna xa.

16 Leꞌa Tomás, xa no nsaleaꞌ Dídimo, cha ndab ndoꞌ be ltsaꞌa na:

—Nchaꞌbe beuna sa wa, ndontsa no beuna gatno Jesús.

17 Leꞌa wizh na ulayaꞌ Jesús toꞌo gezh Betania wa, mbiꞌín xa leꞌa Lázaro mdapla wizh mgaꞌach. 18 Leꞌa Betania nde pa chontsa kilómetro gax Jerusalén. 19 Ta weꞌe leꞌa kwaꞌad bexa judio ncho Jerusalén wa ngwaꞌinaꞌ Mart no Marí, mluꞌuzh be men wa itop bexa ta na ngut bsan bexa. 20 Leꞌa gor na mbiꞌín Mart leꞌa Jesús nsalayaꞌ gaxla, cha utoꞌo xa, ngwaꞌucheꞌalndoꞌ xa Jesús. Ná leꞌa Marí myaꞌan ta niꞌi. 21 Leꞌa Mart cha ndab ndoꞌ Jesús:

—Señor, tal leꞌa go ncho sa ndee, leꞌa bsan naꞌ naꞌanpa ngat. 22 Parea leꞌa naꞌ uní leꞌa guniꞌi xtaꞌan inab go ndoꞌ Dios nat, leꞌa Dios saꞌaka‑yá.

23 Leꞌa Jesús cha ndab ndoꞌ Mart:

—Leꞌa bsan lu sbanka.

24 Leꞌa Mart cha ndab:

—Leꞌa naꞌ uní leꞌa xa sbanka gal wizh lult, zha iban itea be men ngut.

25 Leꞌa Jesús cha ndab:

—Leꞌa naꞌ nak xa nxiste be men ndoꞌ gealgut, no nak naꞌ xa nsaꞌa gealnaban. Leꞌa tal ton gungea ladna naꞌ, maska ngut xa leꞌa xa sbanka. 26 Leꞌa itea bexa nban tal gungea ladna bexa naꞌ, leꞌa bexa wa naꞌanpa gat idub tiemp. ¿Ndangea ladna lu ta ndáp naꞌ ndee zha?

27 Leꞌa Mart cha ndab:

—Ndungeaka lad naꞌ‑yá, Señor. No ndangea lad naꞌ leꞌa go nak Cristo Xin Dios, xa na ndiꞌizh ga giꞌidka ndoꞌ gizhliyo.

28 Tsoꞌo na li ndab Mart, weꞌe cha nseaꞌ xa ta lid xa, xagaꞌtsa ndab xa ndoꞌ Marí beal xa:

—Leꞌa mech nseala no nbezh xa lu.

29 Leꞌa gor na mbiꞌín Marí ta wa, cha uxax utoꞌo xa, nchaꞌinaꞌ xa Jesús. 30 Leꞌa Jesús biseata yate len gezh wa, ndi bi nsoꞌ xa sa mzheꞌal Mart xa. 31 Weꞌe leꞌa bexa ndeuluꞌuzh Marí bexa nde ta lid xa, leꞌa gor uniꞌí bexa leꞌa Marí uxax utoꞌo nchaꞌa, cha usankea bexa tsoꞌo Marí, ndab bexa leꞌa Marí nchaꞌyoꞌon toꞌo baꞌa ten Lázaro.

32 Leꞌa gor na ulayaꞌ Marí wats Jesús no uniꞌí xa Jesús, cha msaxib xa ndoꞌ Jesús, ndab xa:

—Señor, tal leꞌa go ncho sa ndee, leꞌa bsan naꞌ naꞌanpa ngat.

33 Leꞌa gor na uniꞌí Jesús xteꞌe ndoꞌon Marí, no bexa na li ulanseano Marí wa, leꞌa xa uzhebpa uban myoꞌo ladna no kweaꞌ myoꞌo ladna xa. 34 Cha ndab xa:

—¿Pa mkaꞌach bega xa wa zha?

Leꞌa bexa wa cha ukaꞌab ndab:

—Señor, nchaꞌbe beuna, iniꞌí ga pa‑yá.

35 Leꞌa Jesús cha mbiꞌin. 36 Weꞌe leꞌa bexa nde sa wa cha ndab ndoꞌ ltsaꞌa na:

—Bwiꞌi bego ná xteꞌeta nkweaꞌ ladna xa Lázaro.

37 Ná leꞌa ncho bexa cha ndabbe:

—Leꞌa xa ndee myunyakna dub xa lá naꞌ, ¿xtaꞌan naꞌanpa li ngun xa baꞌ gan lá ngat Lázaro zhaga?

38 Leꞌa Jesús uzhebpa kweaꞌ myoꞌo ladna gor ulayaꞌ xa toꞌo baꞌa wa. Leꞌa ta wa dub geꞌloꞌo nsoꞌntsaw dub geꞌ siꞌil toꞌo‑yá. 39 Cha ndab Jesús:

—Udob bega geꞌ baꞌ.

Leꞌa Mart bsan xa ngut wa cha ndab:

—Señor, leꞌa nat leꞌa xa baꞌ ugap nlaꞌala, leꞌa xa mdapla wizh mgaꞌach.

40 Leꞌa Jesús cha ndab ndoꞌ Mart:

—¿Cha lid ndápka naꞌ ndoꞌ lu zha, tal leꞌa lu gungea ladna naꞌ, leꞌa lu iniꞌíka juers ten Dios?

41 Weꞌe leꞌa be men cha udob geꞌ toꞌo baꞌa wa. Leꞌa Jesús cha mwiꞌi gaꞌap, cha ndab xa:

—Xus naꞌ, nsa naꞌ xno ndoꞌ go leꞌa go ndoꞌón ta unaꞌab naꞌ ndoꞌ ga. 42 Leꞌa naꞌ uníka leꞌa go ndoꞌónka itea be taꞌa ndáp naꞌ, parea nat li ndáp naꞌ ndontsa gungea ladna be men ndee leꞌa go leꞌaka mtuꞌub naꞌ.

43 Tsoꞌo na li ndab Jesús, cha ugeꞌ ndab xa:

—¡Lázaro, utoꞌo sa baꞌ!

44 Leꞌa xa na li ngut wa cha utoꞌo sa wa, bi lima nbixyoꞌo lad yaꞌa xa no xoꞌo xa. No ndoꞌ xa bi li nbixyoꞌo dub bleꞌa lad. Leꞌa Jesús cha ndab ndoꞌ be men:

—Bxaꞌak bega be lad baꞌ, cha blaꞌa bega iseaꞌ xa.

45 Weꞌe leꞌa bexa judio na li nseano Marí wa uniꞌí ta mbin Jesús, cha kwaꞌad bexa mbingea ladna Jesús. 46 Parea leꞌa ncho bexa wa cha ndi ngwaꞌyab ndoꞌ bexa fariseo xtaꞌan mbin Jesús. 47 Weꞌe leꞌa be uleꞌay nibeꞌe no bexa fariseo cha mchealte itea bexa nibeꞌe ten bexa judio. Cha ndab bexa:

—¿Xteꞌe gun beuna zha? Leꞌa Jesús wa sian uyon ndun. 48 Tal leꞌa beuna ulaꞌa li gunta xa ta wa, leꞌa itea be men sangea ladna xa. Weꞌe leꞌa bexa Roma siꞌid ulate niꞌi ten Dios ten beuna no lá ulaꞌata bexa inibeꞌe beuna sa ndee.

49 Leꞌa dub bexa wa xa nsaleaꞌ Caifás, xa nak uleꞌay ndon leꞌa nsak zha wa. Leꞌa xa cha ndab ndoꞌ bexa nibeꞌe wa:

—Leꞌa bego naꞌan xtaꞌan iniꞌí. 50 No ni lá nyakbeꞌena bega ndi mas wen gat dubtsa men sakndoꞌ beuna xa Israel, ndontsa naꞌanpa initndoꞌ itea beuna.

51 Leꞌa ta li ndab Caifás wa naꞌanpa ndanbeꞌe leꞌatsa xa. Leꞌa ta na nak xa uleꞌay ndon leꞌa nsak zha wa, ta weꞌe mbintiꞌin Dios xa, ndab xa leꞌa Jesús gat sakndoꞌ bexa Israel. 52 Parea leꞌa ta ndab xa wa naꞌanpa nabtsa gab leꞌa Jesús gat sakndoꞌ bexa Israel. Leꞌa ta wa no gab leꞌa Jesús gat ndontsa yunjunt xa itea bexa nak xin Dios, bexa ncho idub nax ndoꞌ gizhliyo. 53 Leꞌa wizh wa leꞌa bexa nibeꞌe ten bexa judio dubtsa mbidiꞌizh gut bexa Jesús.

54 Ta weꞌe leꞌa zha wa leꞌa Jesús naꞌantapa gaꞌal ikesea Judea. Leꞌa xa ndi mkaꞌan sa wa nchaꞌa xa gezh Efraín gax geꞌe sa bid. Cha uyoꞌo xa sa wa no be xmen xa.

55 Leꞌa zha wa nsayal gax ujest Pascua ten bexa judio. Ta weꞌe kwaꞌad be men judio ukea nchaꞌbe gezh Jerusalén, ndontsa gun bexa ta isambiꞌi bexa ndoꞌ Dios zha biseata gal ujest wa. 56 Leꞌa be men wa nkwaꞌan Jesús, no nabdiꞌizh bexa ndoꞌ be ltsaꞌa bexa nde sa nde niꞌi ten Dios:

—¿Xteꞌe nsak bega zha? ¿Siꞌid Jesús ujest ndee nati naꞌan?

57 Leꞌa be uleꞌay nibeꞌe no bexa fariseo unibeꞌela ndoꞌ be men tal ncho ton iniꞌí pa nsoꞌ Jesús, cha gab xa‑yá ndoꞌ bexa wa ndontsa isen bexa Jesús.