1 Leꞌa Jesús cha nchaꞌa Bet Olivo. 2 Leꞌa ngol ngot xeꞌa wa mlengal Jesús tale ten niꞌi ten Dios. Cha kwaꞌad be men ulansea wats xa. Leꞌa xa cha usob, cha usaxan nluu xa be men. 3 Weꞌe leꞌa pla be mech ten ley nsea bexa fariseo ulenno dub xagots ngwaꞌigaꞌano dub xabgiꞌi naꞌanpa xabgiꞌi ten xa. Cha msoꞌ bexa xagots wa tlaw be men wa. 4 Cha ndab bexa ndoꞌ Jesús:

—Mech, leꞌa xagots ndee ngwaꞌigaꞌano dub xabgiꞌi naꞌanpa xabgiꞌi ten xa. 5 Leꞌa ley mkeꞌa Moisés unibeꞌe ulaꞌgeꞌ beuna be xagots ndun lak ta mbin xa ndee wa gast gat xa. ¿Go zha, xteꞌe gab ga?

6 Leꞌa bexa wa ga ndun preb Jesús ná xteꞌe gab Jesús, ndontsa gap bexa xtaꞌan usake bexa Jesús. Weꞌe leꞌa Jesús cha usob, usaxan nkeꞌa xa ndoꞌ yo no ngutsyaꞌa xa. 7 Ná leꞌa be mech ten ley nsea bexa fariseo dubpa nabdiꞌizh ndoꞌ Jesús. Cha ngwasoꞌ xa, ndab xa ndoꞌ bexa wa:

—Tal leꞌa dub xa nsoꞌ lat bega baꞌ lá ndap ni dub ke ndoꞌ Dios, ned xa wa ulaꞌgeꞌ xagots baꞌ.

8 Cha usobgal Jesús, cha mkeꞌagal xa ndoꞌ yo. 9 Ná leꞌa gor na mbiꞌín bexa na li msake xagots wa ta ndab Jesús, cha mbinbeꞌe bexa leꞌa bexa noga ndap ke. Cha ndon ned bexa gox no gast bexa ben mkaꞌan sa wa. Cha myansoꞌ nab xagots wa wats Jesús. 10 Leꞌa Jesús cha ngwasoꞌgal, cha unabdiꞌizh xa ndoꞌ xagots wa, ndab xa:

—¿Nat zha ma bexa li msake lu wa nat? ¿Ni dub xa wa naꞌan xtaꞌan ngunno lu zha?

11 Leꞌa xagots wa cha ukaꞌab ndab:

—Ni dub xa wa naꞌan xtaꞌan ngunno naꞌ, Señor.

Leꞌa Jesús cha ndab:

—Ni naꞌ lá gáp leꞌa lu nsabndoꞌ gat. Nat byaꞌ, yá lá gunta lu ta ugap wa.

12 Leꞌa stub biaj leꞌa Jesús ndadiꞌizh ndoꞌ be men, ndab xa:

—Leꞌa naꞌ ndee leꞌa nak xeꞌa ndoꞌ be men nde ndoꞌ gizhliyo. Leꞌa tal ton isankea tsoꞌo naꞌ naꞌanpa ikesea sa ukaw, leꞌa xa ndi gap xeꞌa nsaꞌa gealnaban.

13 Weꞌe leꞌa bexa fariseo cha ndabbe:

—Leꞌa lu ndadiꞌizh cuent ten leꞌaka lu, ta weꞌe leꞌa ta ndadiꞌizh lu baꞌ naꞌanpa nsak.

14 Leꞌa Jesús cha ukaꞌab ndab:

—Mas leꞌaka naꞌ ndadiꞌizh cuent ten naꞌ, leꞌa ta ndadiꞌizh naꞌ wa ta nsakka, leꞌa naꞌ uní pa ulen naꞌ no pa gaa naꞌ. Parea leꞌa bego ni lá iniꞌí pa ulen naꞌ no pa gaa naꞌ. 15 Leꞌa bego nsake naꞌ laktsa ndanbeꞌe be men, ná leꞌa naꞌ ndee naꞌanpa nsake ni dub men nat. 16 Leꞌa tal usake naꞌ be men, leꞌa ta gáp naꞌ wa ta nsakka, geal leꞌa naꞌ naꞌanpa nabtsa gun ta wa, leꞌa Xus naꞌ xa mtuꞌub naꞌ no nsoꞌ wats naꞌ. 17 Lak nkeaniꞌi ley ten bega, tal top men dubtsa gab, leꞌa ta ndab bexa wa nsakka. 18 Leꞌa naꞌ ndee ndáp ton nak naꞌ, no Xus naꞌ xa mtuꞌub naꞌ noga dubtsa ndab ton nak naꞌ.

19 Leꞌa bexa wa cha ndabbe:

—¿Ma xus lu zhaga?

Leꞌa Jesús cha ukaꞌab ndab:

—Leꞌa bego lá nchandoꞌ naꞌ, no ni lá nchandoꞌ bega Xus naꞌ. Tal leꞌa bega nchandoꞌ naꞌ, leꞌa bega no Xus naꞌ nchandoꞌ.

20 Be diꞌizh ndee uníꞌi Jesús gor nluu xa be men len niꞌi ten Dios, sa ndaꞌusaꞌa be men med gon. Parea ni dub bexa lá isen Jesús, geal leꞌa wizh ulaꞌa Dios gun bexa ta wa biseata gal.

21 Leꞌa Jesús cha mbidiꞌizhgal ndoꞌ bexa ndab xa:

—Leꞌa naꞌ ikaꞌan sa ndee. Weꞌe leꞌa bega cha ukwaꞌan naꞌ, parea leꞌa sa na gaa naꞌ leꞌa bega lá gun gan no yaꞌ. No zha na gat bega leꞌa be ke ten bega naꞌanpa yuꞌu.

22 Leꞌa bexa nibeꞌe ten bexa judio cha ndab ndoꞌ be ltsaꞌa na:

—¿Nati gut xa leꞌaka leꞌa xa, ta weꞌe ndab xa leꞌa sa yaꞌ xa leꞌa beuna lá gun gan no yaꞌ sa wa?

23 Leꞌa Jesús cha ndab:

—Leꞌa bego xa xan ndee, parea leꞌa naꞌ xa gaꞌap baꞌ. Leꞌa bego xa ndoꞌ gizhliyo ndee, parea leꞌa naꞌ naꞌanpa xa ndoꞌ gizhliyo. 24 Ta weꞌe ndápka naꞌ leꞌa zha na gat bega, leꞌa be ke ten bega naꞌanpa yuꞌu. Tal leꞌa bega lá gungea ladna ton nak naꞌ, leꞌa be ke ten bega naꞌanpa yuꞌu gor na gat bega.

25 Leꞌa bexa cha ndabbe:

—¿Tonxá lu zhaga?

Leꞌa Jesús cha ndab:

—Leꞌa naꞌ zha nedkata ndáp ton naꞌ. 26 Ncho sianta be ta gáp naꞌ cuent ten bega no ta usake naꞌ bega, parea ndoꞌ bego bexa ncho ndoꞌ gizhliyo leꞌa naꞌ ndáptsa ta na ndadiꞌizh xa mtuꞌub naꞌ wa, leꞌa xa gealngeatsa ndadiꞌizh.

27 Parea leꞌa bexa wa lá yakbeꞌena leꞌa Jesús ndadiꞌizh cuent ten Dios Xus xa. 28 Ta weꞌe no ndab Jesús ndoꞌ bexa:

—Leꞌa gor na yá mbinno bega naꞌ ta nlad bega, weꞌe igondoꞌ bega ton nak naꞌ, Xa Myak Men Ndoꞌ Gizhliyo. No iniꞌí bega leꞌa naꞌ naꞌanpa ndun ta nladtsa naꞌ, leꞌa naꞌ ndi ndadiꞌizh lak mluu Xus naꞌ ndoꞌ naꞌ. 29 Leꞌa Xus naꞌ xa mtuꞌub naꞌ no nsoꞌ wats naꞌ. Leꞌa xa naꞌanpa nlaꞌa nab naꞌ, geal ndun naꞌ sbeꞌen ta nsak ladna xa.

30 Leꞌa gor na li ndab Jesús ta wa, weꞌe leꞌa kwaꞌad be men cha mbingea ladna Jesús.

31 Cha ndab Jesús ndoꞌ bexa judio na li mbingea ladna xa:

—Tal leꞌa bega sbeꞌen uxobgek ndoꞌ be ta ndáp naꞌ, leꞌa bega ta ugeaka gak xmen naꞌ. 32 Weꞌe leꞌa bega igondoꞌ gealngea ten Dios, leꞌa gealngea wa uxaꞌak bega.

33 Leꞌa bexa wa cha ndabbe:

—Leꞌa Abraham leꞌa nak usan gox polta ten besa. Leꞌa besa nunk lá igayoꞌota ndoꞌ stub men. ¿Ná xteꞌe li ndab lu leꞌa besa yaꞌak zha?

34 Leꞌa Jesús cha ukaꞌab ndab:

—Leꞌa naꞌ gáp ndoꞌ bega leꞌa tal ton gun be ta ugap, leꞌa xa wa ndaigayoꞌo ndoꞌ ta ugap wa. 35 Leꞌa dub xa nyoꞌo ndoꞌ stubga men naꞌanpa idub tiemp yoo ta lid xa nibeꞌe xa wa. Parea leꞌa xin xa nibeꞌe wa idub tiemp ncho ta lid xus na. 36 No liga tal leꞌa Xin Dios leꞌa uxaꞌak bega ndoꞌ ta ugap, leꞌa bega ta ugeaka myaꞌak. 37 Leꞌa naꞌ uníka leꞌa usan gox polta ten bega Abraham, parea leꞌa bega nlad gut naꞌ, geal leꞌa bega lá nsakyoꞌón be ta ndáp naꞌ. 38 Leꞌa naꞌ ndee ndadiꞌizh be ta nluu Xus naꞌ ndoꞌ naꞌ, parea leꞌa bego ndun lak ndab xus bega.

39 Leꞌa bexa wa cha ukaꞌab ndab bexa:

—Leꞌa Abraham nak xus besa.

Leꞌa Jesús cha ndab:

—Tal leꞌa bega nak xinka Abraham, leꞌa bega gun ltsaꞌa be ta mbin Abraham. 40 Parea nat leꞌa bega ndi nlad gut naꞌ, geal ndadiꞌizh naꞌ gealngea, ta mbidiꞌizh Dios ndoꞌ naꞌ. Leꞌa Abraham nunk lá ngun ltsaꞌa ta nlad bega gun bega wa. 41 Leꞌa bega ndi ndun lak ndun xus bega.

Weꞌe cha ndab bexa:

—Leꞌa besa naꞌanpa nak lak dub men ni lá iniꞌí ton nak xus na. Dubtsa xus besa ncho, leꞌa xa wa Dios.

42 Weꞌe leꞌa Jesús cha ndab:

—Tal leꞌa xus bega Dios, leꞌa bega ta ugeaka yankea naꞌ, leꞌa naꞌ wats Dios utoꞌo ndal naꞌ ndoꞌ gizhliyo ndee. Leꞌa Dios leꞌa mtuꞌub naꞌ, naꞌanpa naꞌtsa nlad ndal. 43 ¿Xtaꞌan lá nyakbeꞌena bega ta ndáp naꞌ zha? Leꞌa bega lá nsakyoꞌón diꞌizh ten naꞌ. 44 Leꞌa xus bega nak maxuꞌu, no nlad bega gun bega ta nlad xa wa. Leꞌa maxuꞌu wa gast zha nedkata ndut men. No nunk lá ndadiꞌizh maxuꞌu gealngea, geal leꞌa xa naꞌanpa nchandoꞌ gealngea. Leꞌa gor na ndadiꞌizh xa gealkwiꞌin, leꞌa xa ndun lakka nak xa, leꞌa xa uzheꞌeb dub xa ukwiꞌin, no nkiꞌil xa be men ndun bexa gealkwiꞌin. 45 Ná leꞌa ta na ndadiꞌizh naꞌ gealngea, ta weꞌe leꞌa bega lá ndangea ladna naꞌ. 46 ¿Ton bega gun gan gab dub ta ugap ndun naꞌ zha? Leꞌa naꞌ ndi sbeꞌen gealngea ndadiꞌizh. Ta weꞌe ¿xtaꞌan lá ndangea ladna bega naꞌ zha? 47 Leꞌa tal ton xmenka Dios leꞌa xa wa ndoꞌón ta ndab Dios. Ná leꞌa bego naꞌanpa xmen Dios, ta weꞌe lá nsakyoꞌón bega ta ndab Dios.

48 Leꞌa bexa wa cha ukaꞌab ndab:

—Leꞌaka nak ta ndab besa, leꞌa lu dub xa Samaria, no ncho mbi bxin len ladoꞌo lu.

49 Leꞌa Jesús cha ndab:

—Leꞌa naꞌ naꞌanpa ncho mbi bxin len ladoꞌo naꞌ. Leꞌa naꞌ ndee utsintsa ndadiꞌizh cuent ten Xus naꞌ, parea leꞌa bega ndi nisi naꞌ. 50 Leꞌa naꞌ lá nkwan xteꞌe gap be men mod ndoꞌ naꞌ. Parea ncho dub xa na nlad gap be men mod ndoꞌ naꞌ, leꞌa xa wa leꞌa gab xteꞌe nak be ta ndun bega. 51 Leꞌa naꞌ gáp ndoꞌ bega leꞌa tal ton uxobgek ndoꞌ diꞌizh ten naꞌ, leꞌa xa wa nunk lá gat.

52 Weꞌe cha ndab bexa nibeꞌe wa:

—Nat segurka uniꞌí besa leꞌa ladoꞌo lu nchoka mbi bxin. Leꞌa Abraham no be profet ngutkabe, ná lu ndab leꞌa tal ton uxobgek ndoꞌ diꞌizh ten lu leꞌa nunk lá gat. 53 ¿Xteꞌe gab lu zha mas nsak lu ndoꞌ Abraham usan gox polta ten besa? Leꞌa xa wa ngutka, no liga be profet. ¿Lu zha, xteꞌe nsak lu ton nak lu?

54 Leꞌa Jesús cha ukaꞌab ndab:

—Tal leꞌaka naꞌ gáp leꞌa naꞌ xa nsak, leꞌa ta gáp naꞌ wa ta naꞌan xtiꞌin. Parea leꞌa Xus naꞌ, xa na ndab bega nak Dios ten bega, xa weꞌe ndab leꞌa naꞌ xa nsakka. 55 Leꞌa bego lá nchandoꞌ xa wa, ná leꞌa naꞌ ndee nchandoꞌka xa. No tal gáp naꞌ leꞌa naꞌ lá nchandoꞌ xa, leꞌa naꞌ no dub xa ukwiꞌin lak ukwiꞌin bego. Parea leꞌa naꞌ ta ugeaka nchandoꞌ xa no nxobgek naꞌ itea be ta ndab xa. 56 Leꞌa Abraham usan gox polta ten bega mten ladna ta na uniꞌí xa leꞌa naꞌ gal ndoꞌ gizhliyo. Leꞌa xa uniꞌíka ta wa, cha mten ladna xa.

57 Weꞌe leꞌa bexa judio wa cha ndabbe:

—Lu ni tol gayoꞌo liꞌin lid ncho, ¿ná xteꞌe ndab lu leꞌa lu uniꞌí Abraham?

58 Leꞌa Jesús cha ndab:

—Leꞌa naꞌ gáp ndoꞌ bega leꞌa zha na bi naꞌan Abraham yoo, leꞌa naꞌ nchoꞌola.

59 Weꞌe cha usen bexa geꞌ ndiꞌizh ulaꞌgeꞌ bexa Jesús, parea leꞌa Jesús cha mkachndoꞌ utoꞌo xa sa nde niꞌi ten Dios. Utid xa gandid lat bexa wa, cha nchaꞌa xa.