Pathien Lekhabu Inthieng Chongtung Thar Chongphuong 2

Ephesus koiindang kôma chongmuthuon

1 Ephesus koiindanga vântîrton kôm hi anghin miziek roh:

“Hi chongmuthuon hih a kut changtienga ârsi sari ngei chôia, rângkachak châtidarna sari ngei lâia ânlôi bang ngâipu renga ani. 2 Ni sinthongei murdi ki rieta; ni sin ranak songtie ngei le ni diertie ngei ki riet. Mi saloingei narngâi theiloi tie ngei le tîrton niloia tîrton inti ngei hah ni minsina, milak anni tih ni riet tih ki riet. 3 Ni diera, ki riming sikin nu tuonga, inzal mak che. 4 Aniatachu mahi nang ke demna ani: atûn hin chu motona anghan chu mi lungkham khâi mak che. 5 Kho tena ânlet mo na ni zoi mindon roh! Ni sietna renga inhei inla motona ni sintho hah tho nôk roh. Ni sietna renga nên sîr nônchu juong ka ta na châtidarna hah amun renga ki thînpai rang kêng. 6 Aniatachu ma hih na satna chu ani: Nicolaitanngei sintho hah ke enjôtloi anghan ne enjôtloi sikin.

7 “Hanchu, kuorngei nin dônin chu, Ratha'n koiindangngei kôm chong a ti ngei hih rangâi roi!

“Amenepu kai chu Pathien Ruhuona ringna thingkung linga om hah amara sâk rangin rachamneina pêk ki tih,” tiin.

Smyrna koiindang kôma chongmuthuon

8 “Smyrna koiindanga vântîrton kôm hi anghin miziek roh:

“Hi chongmuthuon hi amotontak le anûktak, a thia hong ring nôkpu renga ani. 9 Nên taknangei murdi ki riet; nên rieng ti ki riet, aniatachu ne nei tatak! Juda tak niloia, Juda inti ngei neinun saloi nang an ti ngei hah ki riet; anni ngei hah Soitan pâla mi an ni! 10 Nu tuong rang ngei hi ite chi no roh. Rangâi roh! nin lâia mi senkhat intângna ina khumin Diabol'n nangni minsin a ta, male sûn sôm tena intaknangei tong nin tih. Thina dênin, keima rangin taksônomin om roh, male ne menena râisânman ringna rênglukhum nang pêk ki tih.

11 “Hanchu, kuorngei nin dônin chu, Ratha'n koiindangngei kôm chong a ti ngei hi rangâi roi!

“Amenepu ngei kai chu thi inikna han ite minna ngei thei no nih.

Pergamum koiindang kôma chongmuthuon

12 “Pergamum koiindanga vântîrton kôm hi anghin miziek roh:

“Hi chongmuthuon hih khandai beniknei angaidak dônpu renga ani. 13 Khonmo no om, Soitan rêngsukmun omna hah ki riet. Ki riming nu sûr mindet tita, male ki rietpuipu taksônom, Antipas Soitan omna muna an that lâihan khom ku chunga na taksônomna hih mâk mak che. 14 Aniatachu neinunngei alekti chunga demna nang ko dôn: nin lâia mi senkhatin Balaam minchuna chong an pom sikin. Ha mi han mirmilngei biekna neinun an pêk ngei hah an sâkna rang le inditnasaloi an songna rangin Balak hah Israel mingei sietna tieng tipuiraia minjôtna chang a minchu ani. 15 Ma angdên han Nicolaitanngei minchuna chong jûipungei nin lâia no dôn ani. 16 Atûn ni sietnangei renga inhei roh! Nên hei nônchu, no kôm juong lai ka ta, ka bâia hong jôk khandai ngâi lehan ha mingei hah ku juong doi rang kêng.

17 “Hanchu, kuorngei nin dônin chu, Ratha'n koiindangngei kôm chong a ti ngei hih rangâi roi!

“Amenepu ngei kai chu manna inthup senkhat ngei pêk ki tih. Lung ngoi achunga riming thar ânziek a changpu ti nônchu tutên an riet ngâi loi hah khom pêk ngei chit ki tih.

Thyatira koiindang kôma chongmuthuon

18 “Thyatira koiindanga vântîrton kôm hi anghin miziek roh:

“Hi chongmuthuon hih Pathien Nâipasal, a mitngei mei anga chuong, a kephangei sum-eng anga nôtminvâr renga han. 19 Imo no tho ki riet. Nu lungkhamna, na taksônomna, ni sinthongei, le ni diertie ngei ki riet. Motona nêkin atûn hin sin no tho uol ti khom ki riet. 20 Aniatachu ma hih nang ke demna chu ani: nupang Jezebel, Pathien thangtheipu inti ngâinu hah na rangâi thei sikin. Amanu han ki tîrlâmngei inditnasaloi tho minchûn le mirmilngei kôma neinun an pêk ngei sâk rang minchûn aletieng a ruoi ngei ngâi. 21 Amanu hah a sietnangei renga insîr rang zora ke pêka, aniatachu amanu han a hurna renga inhei nuom mak. 22 Masikin natna jâlmuna pai ka ta, ânrêpui ngâi ngei khom asaloi neinunngei an thona renga an insîr nônchu atûn dûktongna chi omtaka pai ngei sâng ki tih. 23 Amanu nûkjûingei khom that pe ka ta, hanchu keima hi mulungrîlngei le mindonnangei riet ngâipu ki ni ti koiindangngei murdi'n riet an tih. Nin mijôn chita nin sintho dungjûiin nangni pêk ki tih.

24 “Aninâka nangni Thyatira sûnga omngei kai hi minchuna saloi jûi loia; ‘Soitan chonginthupngei inthûk’ mi dangngeiin an ti inchu loi ngei chunga chu puokrik dang ite nangni bôk pe no ning ki ti ani. 25 Aniatachu, ku juong mâka chu, nin dônsai hah nin mutu mindet ngêt rang ani. 26-28 Amenepu ngei kai, among dêna ku lungdo sin ngei chu, ka Pa renga rachamneina ka man dên hah pêk ki tih: jâttin chunga thîr tôkmol le roijêka pil bêlngei anga ahârhâra tôkkhoi chit rangin rachamneina pêk ngei sa ki tih. Jîng sikhovâr khom pêk ngei sâng ki tih.

29 “Hanchu, kuorngei nin dônin chu, Ratha'n koiindangngei kôm chong a ti ngei hih rangâi roi!

2:7 2:7: Aph 2:9; Chph 22:2; Ezek 28:13; 31:8 (LXX)

2:8 2:8: Isa 44:6; 48:12; Chph 1:17; 22:13

2:11 2:11: Chph 20:14; 21:8

2:14 2:14: Tel 22:5,7; 31:16; Bal 23:4; Tel 25:1-3

2:17 2:17: Jôk 16:14,15; 16:33,34; Joh 6:48-50; Isa 62:2; 65:15

2:20 2:20: 1 Rêng 16:31; 2 Rêng 9:22,30

2:23 2:23: Lap 7:9; Jer 17:10; Lap 62:12

2:26-28 2:26-28: Lap 2:8-9 (LXX)