1 Ba sipu gilania Reseli sapu loke tuna koe Zekopi si asa, si kono nia sa sa tasina vineki, ke zama la koe Zekopi si asa, “Mu va podo nau tuqu, babe lopu gua si kote mate qua si rau,” gua si asa.

2 Meke podalae bugoro nia Zekopi se Reseli, meke zama, “Lopu boka tavetia rau, sapu e Tamasa mo telena boka tavetia. Sina Asa tu si hukatigo pude lopu podo koburu si goi!”

3 Meke zama se Reseli, “Ego, hie se Biliha, sa qua nabulu vineki. Mu va tata ia pude mani podo mae nia sa si keke koburu taqarau, meke kaqu arau sa tinana sa koburu asa,” gua si asa. 4 Ke vala nia Reseli se Biliha koe Zekopi, meke va tata ia Zekopi si asa. 5 Meke ari tiana se Biliha, meke podoa sa si keke tuna koreo. 6 Meke zama se Reseli, “Ele pitua Tamasa sa qua inokoro, meke ele avosia Sa sa qua tinepatepa meke poni nau Sa sa tuqu koreo hie,” ke poza nia Dani sa si asa. 7 Meke ari tiana pule se Biliha meke podoa sa si keke koburu koreo vina rua te Zekopi. 8 Meke zama se Reseli, “Ele varipera sisigiti la si rau koasa tasiqu barikaleqe meke ele mataqara si rau,” ke poza nia Napitalai sa sa pozana sa koburu.

9 Meke sipu gilania Lia sapu ele tava noso si asa pude lopu podo koburu, si turaṉa la nia sa koe Zekopi se Zilipa sa nana nabulu vineki pude na nana barikaleqe gua. 10 Meke va podo nia e Zekopi koe Zilipa si keke tuna koreo. 11 Meke zama se Lia, “Ele gulea qua si rau!” Ke poza nia e Qadi sa sa koburu. 12 Meke keke pule tuna koreo si va podo nia Zekopi koe Zilipa, 13 meke zama se Lia, “Qetu hola qua! Meke kamahire si kote poza nau qetu rina barikaleqe si rau.” Ke poza nia Asa sa sa pozana sa koburu.

14 Ego, pa totoso ta pakete sari na huiti koari na inuma, si la vagi Rubeni si kaiqa karoso madariki* Sa karoso madariki si va ṉiṉira ia sa binalabala tanisa palabatu koasa nana barikaleqe, pude va gavoro koburu sa barikaleqe be tigena. meke paleke lani koe Lia sa tinana. Meke zama la koe Lia se Reseli, “Ke tasiqu, poniau kaiqa karoso madariki tanisa tumu koreo isara.”

15 Ba olaṉa se Lia, “Vegua, lopu ele garona tu sapu hena va seu ia goi sa loaqu? Meke kamahire pule si korapa hiva vagi goi sari na karoso madariki tanisa tuqu koreo?”

Meke olaṉa se Reseli, “Be poniau goi sari na karoso madariki tanisa tumu koreo si kote boka vagia goi se Zekopi kohite boṉi meke va tata ia,” gua si asa.

16 Meke sipu pule mae pa inuma pana veluvelu se Zekopi si la tutuvia Lia si asa, meke zama ia, “Kaqu puta turaṉau goi si rau kohite boṉi sina ele tabara nigo madariki tanisa tuqu koreo rau si goi.” Ke puta turaṉia Zekopi se Lia koasa boṉi sana.

17 Meke va tabea Tamasa sa vinaravara te Lia meke ari tiana si asa, meke podoa sa sa tuna koreo vina lima te Zekopi. 18 Meke zama se Lia, “Ele tabarau Tamasa si rau, sina ele vala nia rau koasa qua palabatu sa qua nabulu vineki.” Ke poza nia Isaka sa sa pozana sa koburu. 19 Meke ari tiana pule se Lia, meke podoa sa sa tuna koreo vina onomo te Zekopi. 20 Meke zama se Lia, “Ele poni nau Tamasa si keke vinariponi leana. Kamahire si kaqu tataru nau sa loaqu si rau, sina ele podoa pule rau sa tuqu koreo vina onomo,” meke poza nia Zeboloni sa si asa. 21 Mumudi si podoa sa si keke tuna vineki, meke poza nia Daena sa si asa.

22 Meke balabala pulea Tamasa se Reseli, ke avosia Sa sa nana vinaravara pude boka podo koburu si asa. 23 Meke aritiana si asa, meke podoa sa si keke tuna koreo, meke zama, “Ele hena pania Tamasa sa qua kinurekure, ke poniau tuqu koreo Sa si rau.” 24 Meke poza nia Zosepa sa si asa, meke zama si asa, “Keke tuqu koreo pule si mani poniau e Zihova,” gua si asa.

25 Sipu ele podoa Reseli se Zosepa, si zama la koe Lebani se Zekopi, “Va malumau, maqu taloa, pude maqu pule la pa qua popoa,” gua si asa. 26 “Mamu va maei sari na qua barikaleqe, meke sari na qua koburu saripu ele nabuluni rau koa goi. Maqu taluarae. Gilania goi sapu ele tavete ponigo rau sari doduru tinavete,” gua si asa.

27 Ba zama la koasa se Lebani, “Maqu zama guahe: Ele doṉo vura nia rau pa qua tinavete dogodogorae, sapu vagia rau sa tinamanae te Zihova koa goi. 28 Mu poza maeni sari na tinabaramu, maqu tabarigo.”

29 Meke olaṉa se Zekopi, “Ele gilania goi sapu gua meke tavetavete ponigo rau, meke gua meke boka soku sari na mua rovana sipi pa qua kinopu. 30 Sari ka visavisadi pu tagoi goi sipu lopu ele mae rau, si ele soku hola kamahire, meke tamanae si goi koe Zihova koa ri doduru vasina pu la i rau. Ego, qua totoso kamahire maqu podekia pude tavetia sapu gua bokaia rau,” gua si asa.

31 Meke nanasa la koe Zekopi se Lebani, “Na sa si kaqu tabara nigo rau?”

Meke olaṉa se Zekopi, “Lopu na tinabara poata si hiva nia rau. Be guana va egoa goi, kaqu kopu holani mo rau sari na mua rovana sipi,” gua si asa. 32 “Va malumau, maqu ene pa korapadi ri doduru mua rovana sipi ṉinoroi, maqu paqaha vagi sari doduru tuna sipi mumuhodi meke sari doduru tuna qoti saripu kidakida tinidi. Arini sari doduru tinabaraqu pu hivani rau,” gua si asa. 33 “Meke koa ri na rane mae hiroi si kaqu va sosodea goi sapu be hinokara sa qua zinama. Totoso mae doṉo viliti goi sari na qua tinabara, meke be lopu koa koa rau sari na qoti saripu loke kidakida tinidi, ba be sari na sipi loke mumuhodi, si kote gilania goi sapu ta hikodi si arini,” gua si asa.

34 Meke olaṉa se Lebani, “Leana, mada lulia gua sapu vizatia goi,” gua si asa. 35 Ba koasa rane sana si va rizu vata kalei Lebani sari na qoti kokoreo saripu koai gasigasi tinidi, meke sari na qoti mamaqota saripu kidakida meke kidikodili tinidi, meke gua tugo sari na sipi mumuhodi, meke valani sa koa ri na tuna koreo si arini meke kopuni, 36 meke padana ka ṉeta rane si turaṉa va seu i sa koe Zekopi sari na rovana, ke kopuni mo e Zekopi saripu koa hola koari na rovana sipi te Lebani.

37 Meke maho vagi Zekopi sari na lelaṉa huda toadi, koari na huda popola, olomodi meke pelani, meke sio pani sa sari kaiqa kapudi, pude doṉo guana gasigasi keoro sari na lelaṉadi, gua. 38 Meke veko lani sa sari na lelaṉa huda hire pa kenudia ri na rovana sipi, koa ri na vasina naponapoana tadirini. Ta veko si arini vasina, sina hoke varipapai sari na kurukuru sipu mae napo si arini vasina. 39 Ke sipu hira sari na qoti mamaqota pa kenudi ari na lelaṉa huda si ta evaṉae gasigasi na kidakida meke korikorizoko tinidi si arini.

40 Meke paqaha vata kalei Zekopi sari na tuna sipi, meke va doṉo lani sa koari na rovana, pu gasigasi na mumuho tinidia koasa rovana te Lebani pu kopu ni sa. Gua asa ke paqahi sa saripu tanisa soti koa ri pu te Lebani.

41 Sipu varipapapai saripu ṉiṉiradi si veko va tata lani Zekopi sari na huda koa ri na naponapoana pa kenudia ri na kurukuru, pude madi varipapapai koari na lelaṉa huda si arini. 42 Ba lopu veko lani Zekopi sari na lelaṉa huda koa ri na kurukuru malohorodi, gua asa ke malohoro sari doduru kurukuru te Lebani, sari doduru te Zekopi si ṉiṉiradi. 43 Gua asa ke tagotago sisigiti se Zekopi meke soku hola sari nana rovana sipi, meke sari na nabulu vineki na koreo, na kameli, meke sari na doṉ'ki na gua.