148
Tinioko koasa Doduruna sa Vinapodaka pude Vahesia sa Tamasa
1 Mi vahesia se Zihova!
Mi vahesia se Zihova, gamu na maṉauru.
Vahesia si Asa koari na vasidi ululudi.
2 Mi vahesia si Asa, gamu doduru Nana mateana.
Mi vahesia si Asa, Gamu doduru Nana qeto minate varipera pa maṉauru!
3 Mi vahesia si Asa gamu na rimata na sidara.
Mi vahesia si Asa, gamu doduru pinopino ṉedala mia!
4 Mi vahesia si Asa, gamu na maṉauru ululu mia.
Meke gamu na kolo panaulu pa maṉauru.
5 Mi vahesi gamu sa Pozana e Zihova!
Ura zama mo Sa meke ta evaṉa sari doduru.
6 Pa Nana zinama mo si ta veko si arini pa dia vasina ninae rane ka rane,
meke lopu boka va karia rini si Asa.
7 Gamu pa pepeso, mi vahesia se Zihova!
Gamu na kurukuru nomanoma mia pa lamana, meke koari na lamana peava;
8 gamu na kapi, na ruku aesi, na sinou, na lei,
na givusu raneboṉi pu va tabei sari na Nana zinama!
9 Gamu na toa, na toqere;
gamu na vuvua, na huda pa hiqohiqo!
10 Gamu na kurukuru pinomo, na bulumakao;
doduru kurukuru ṉame, na kurukuru tapuru!
11 Gamu na baṉara pa pepeso, meke sari doduru tinoni,
sari na koimata, na tie totoli pa pepeso;
12 Gamu na koreo vaqura, na vineki vaqura,
barogoso, na koburu hitehite!
13 Mi vahesia gamu sa Pozana e Zihova,
ura sa Pozana mo Sa si tava lavata koari doduru pozapoza.
Sa Nana tinolava si ululu hola nia sa maṉauru na pepeso.
14 Va ṉiṉirai Sa sari na Nana tinoni,
pude sari doduru Nana tinoni si kaqu vahesia si Asa.
Tataru ni Sa sari Nana tie Izireli.
Mi vahesia se Zihova!