28
1 Govete sa tie kaleana ba loke tie hadua,
ba sari tie toṉoto si koa mataqara guana laione.
2 Pana va gugue sa butubutu la koasa Tamasa, kote soku sari na koimata,
ba sa tie gilagilana meke tumatumaena si kote kopu nia sa binaṉara pa binule.
3 Sa baṉara sapu ṉoṉovali sari tie malaṉa
si guana ruku kokoreo sapu huari sari na linetelete.
4 Arini pu kilua sa tinarae si qetuni sari tie kaleadi,
ba sarini pu kopu nia sa tinarae si lopu ta qetue koa rini.
5 Sari tie kaleadi si lopu tumae nia sa tinoṉoto,
ba arini pu lulia sa hiniva te Zihova si gilana valeania.
6 Leana be na tie malaṉa, sapu lopu ta zutu nana tinoa,
hola nia sa tie tagotago sapu kaleana nana hahanana.
7 Asa pu kopu nia sa tinarae si na koburu gilaena,
ba na baere tadi na ṉaṉaluta si na kinurekure tanisa tamana.
8 Asa pu va tomotomo la koa sa lipulipu pude tagotago,
si va naqiti ponia si keke pu kote tataru ni sari tie malaṉa.
9 Be keke tie si va taliṉa va seu koasa tinarae,
sari nana vinaravara ba kote avoso hikare koe Zihova.
10 Asa pu turaṉia sa tie toṉoto pa siraṉa kaleana
si kote hoqa la pa nana sipata telena,
ba sa tie loke tina zutuna si kote ta pia va leana.
11 Sa tie tagotago si gilaena, gua si asa,
ba sa tie malaṉa pu gilagilana boka dogoro vagia mo gua sapu hinokara.
12 Totoso bokaboka sa tie toṉoto si qetuqetu sari na tie;
ba totoso vagi ṉiniraṉira sari na tie kaleadi, si la tome sari tie.
13 Asa pu tomei sari nana sinea si lopu koa va leana,
ba asa pu helahelae ni meke veko pani si ta taleosae koe Tamasa.
14 Mani tamanae sa tie pu pamaṉa nia doduru totoso se Zihova,
ba asa pu korona pa bulona si kamo la pa tinasuna.
15 Guana laione kurumuna babe na totorona sa bea
sa tie kaleana pu baṉara ni sari tie si ṉoṉovala.
16 Na baṉara sapu ṉoṉovala si loke nana ginilagilana,
ba asa pu kilui sari tinago hinikodi si kote toa va seunae.
17 Asa pu va mate tie si ta sigiti nia sa sinea pa nana binalabala
meke kote koa gua lamo asa osolae mate;
mani loke tie la toka nia.
18 Asa pu ene pa tinoṉoto si kote ta kopue,
ba asa pu lopu leana sa nana hahanana si kote lopu sana hoqa.
19 Asa pu tavetavete nia sa nana pepeso si kote soku gana ginani,
ba asa pu koa va gulegulea si kote kamo habahuala.
20 Sa tie raṉeraṉena si kote soku nia minana,
ba asa pu hiva tuturei tagotago si kote kamoa tinasuna.
21 Pude va kalekale pa totoso varipitui si lopu leana,
ba pa vasi bereti mo si boka tavete va sea sa tie.
22 Sa tie puhi si bebeno hiva tagotago
ba paere koasa sapu aqa nia na hinabahuala si asa.
23 Asa pu gegesia sa tie si pa vina betona ta qetue hola,
hola nia sapu asa pu zama va lomolomoso.
24 Asa pu hiko koasa tamana babe tinana
meke zama, “Loketoṉa si tavete va sea ia rau”
si na baere tanisa pu va huhuara.
25 Sa tie puhina si va gevugevuru vinari zamai,
ba asa pu raṉea se Zihova si kote koa valeana.
26 Asa pu raṉe pule nia si na tie pekipeki,
ba asa pu ene pa ginilagilana si lopu kote kamoa tinasuna.
27 Asa pu vari poni la koari na malaṉa si lopu kote qaga nia keketoṉa,
ba asa pu korona liṉana la i si arini si kote ta levei.
28 Totoso vagi ṉiniraṉira sa tie kaleana, si la tome sari tie;
ba totoso mate sari tie kaleadi si bokaboka pule sari tie toṉoto.