53
1 Esei ele va hinokaria sa nada inavoso
meke koe sei ele tava dogoro sa limana e Zihova?* Zn 12:38; Rom 10:16
2 Sa Qua nabulu si toqolo sage pa kenuna e Zihova guana liho vaqura,
meke guana karoso pa pepeso popana.
Loke Nana tinolava pude va okoro gita pude la koasa,
loketoṉa Nana poko baṉara sapu kote hiva nia gita.
3 Ta doṉo va gore si Asa meke lopu ta hivae koari na tie,
na tie talotaṉana meke sari tinasigiti si va kamoi mo Sa.
Gua sa tie sapu tome nia isumata rini
si ta kilu si Asa, meke gita lopu va arilaena ia.
4 Hinokara salaṉi Sa sari nada minoho,
meke paleki Sa sari nada tinalotaṉa,
ba rovea gita sapu tava kilasa si Asa koe Tamasa,
ta seke meke ta ṉoṉovala si Asa koa Sa, gua.* Mt 8:17
5 Ba ta hova si Asa koari na nada tinavete kaleadi,
tava bakora si Asa koari na nada sinea;
sa vina kilasa sapu vagi nia binule gita si ta paleke nia Sa,
meke koari na bakora Tanisa si ta salaṉa si gita.* 1 Pit 2:24
6 Gita doduru, si guana sipi sapu hopeke ene taloa,
gita si hopeke taliri la pa nada siraṉa teleda;
ba e Zihova va paleke ni koa Sa sari na sinea tadigita doduru.* 1 Pit 2:25
ba lopu zama si Asa;
guana lami ta turaṉa pude tava mate si Asa,
meke gua tugo na sipi pa kenudi rina tie kotokoto, si lopu kulu si Asa,
lopu hite zama nia Sa si keke zinama.
8 Pa ṉinovaṉovala si tuqe vagia rini meke pitu ia meke ta vagi taloa.
Meke esei boka zama nia sa ginore tuti tanisa?
Ura na ta kumata taloa si Asa koari na tie toadi;
koa gua koa ri na sinea tadi Qua tinoni si tava mate si Asa.
9 Ta veko si Asa pa keke lovu, turaṉae koari na tie kaleadi,* 1 Pit 2:22
meke ta pomunae turaṉae koari na tie tagotagodi si Asa,
ba loke Nana ṉinovaṉovala pa tie,
meke loke zinama kokoha si zama nia Sa.
10 Ba na hiniva mo te Zihova si hie pude kaqu tava bakora si Asa meke tava sigiti,
meke sa Nana tinoa si na vinukivukihi tana sinea guni nia e Zihova,
meke kote dogori Sa sari tutina meke ta poni tinoa gelenaena,
meke sa hiniva te Zihova si kote gorevura pa Limana Sa.
11 Pa mudina sapu ta sigiti si Asa pa maqomaqona
si kote dogoro pulea Sa sa kalalasa, meke kote qetu nia sa laena sa Nana tinasigiti;
koasa Nana tinumatumae asa,
si kote la sa Qua nabulu toṉotona meke va toṉoti Sa sari soku tie,
meke kote Asa paleke hobei sari doduru dia sinea.
12 Gua ke kaqu poni la nia Rau koa Sa sa hinia tadi na varane,
meke kaqu somana vagi hinia si Asa koari na vinagi turaṉae koa rini sapu ṉiṉira,
sina sa Nana tinoa si vala nia sa pa minate,
meke guana somana ta nae turaṉae koari na tie kaleadi.
Ura paleke hobei Sa sari sinea tadi soku tie,
meke varavara tepatepa si Asa pude taleoso ni saripu hoqa pa sinea.* Mk 15:28; Lk 22:37