1 Koasa vuaheni sapu garunu la nia e Saqoni, sa baṉara pa Asiria, sa nana ṉati palabatu pa vinaripera meke rapatia meke zau vagia sa sa vasileana Asidodi pa Pilisitia, 2 si zama ia Zihova se Aisea tuna e Emosi, “Va gore pania sa poko baika pa tinimu meke sari sadolo pa nenemu.” Meke va tabea sa se Zihova meke ene lamae dodohona meke nene moka.

3 Meke zama se Zihova, “Sa qua nabulu se Aisea si ene dododohona meke nene moka padana ka ṉeta vuaheni. Na vina gilagila si asa gua sapu ta evaṉa koa rini pa Izipi meke Itiopia, 4 sapu kote la sa baṉara pa Asiria meke turaṉa taloani, dododohodi meke nene moka, sari pa Izipi meke Itiopia. 5 Arini pu raṉea se Itiopia meke vahesihesia se Izipi si kote matagutu meke kurekure. 6 Koasa rane asa si ari kasa pu koa pa raratana Pilisitia si kote zama, ‘Doṉo la, dogoria gua sapu ta evaṉa koari tie pu raṉei gita, arini pu la tepani tinokae gita pude harupu gita koasa baṉara pa Asiria, gua! Kote vea meke leada si gita?’ ”