1 Pa vina ṉeta vuahenina sa binaṉara te Belosaza si dogoria arau, Daniela, si keke dinogodogorae mudina sapu keke sapu ele dogoria rau. 2 Koasa qua dinogodogorae si dogoro pule nau si arau pa korapana sa vasileana ta gobana pa Susa, pa pinaqaha popoa pa Elami; pa korapana sa dinogodogorae si koa qua si arau pa taqelena sa Tototolo Ulai, na kolo ta paza vagina pa ovuku. 3 Doṉo sage si arau meke koa nana pa kenuqu si keke sipi kokoreo sapu karua kikihona, turu nana pa taqelena sa tototolo, meke sari kikihona si gele. Keke ri kikihona si gele hola nia si keke ba toqolo mumudi maena mo. 4 Kopu doṉo la si arau totoso haqala totoro la si asa pa kali lodu rimata, meke la pa kali matao meke pa kali gede. Loke kurukuru ṉame boka turu va tia ia, meke lopu keke si boka la variharupi koasa ṉiniraṉira tanisa sipi kokoreo. Gua sapu hiva tavetia sa si tavetia mo sa meke ta evaṉae noma ṉiṉira hola si asa.

5 Sipu korapa balabala va gele ia rau si hie, si vura va hodaka pa kali lodu rimata si keke qoti sapu noma va leana kikihona pa vari kokorapadi ri matana. Tuturei hola karovia sa sa popoa pepeso ba lopu hite tiqu laia sa sa popoa pepeso. 6 Tia mae ia sa sa sipi kokoreo, karua kikihona hie, sapu dogoria rau turu nana pa kali taqele meke ta ṉazirina toa meke totoro mae ia sa. 7 Dogoria rau sapu raza va kaleana ia sa sa sipi kokoreo, seke ia sa meke huara pani sa sari karua kikihona. Lopu garo sa sipi kokoreo, lopu boka raza hobena; la sa qoti meke seke gore nia pa pepeso meke neti ia sa, meke lopu keke si boka la harupu ia sa sipi kokoreo pa ṉiniraṉira tanisa qoti.

8 Nomana sa ṉiniraṉira tanisa qoti ba pa korapana sa totoso sapu ṉiṉira hola si asa si moku palae sa nana kikiho nomana, meke pa nana lolomo si vura mae si ka made kikiho nomadi sapu toqolo sage la koari ka made givusuna sa maṉauru. 9 Vura mae koasa keke ari na kikiho si keke kikiho pule, sapu podalae va hiteke ba toqolo pa ṉiniraṉira, la gua pa kali matao meke hola la pa kali gasa rimata meke la gua koasa Popoa Leleana* Sa Popoa Leleana si sa Popoa Izireli.. 10 Noma la tu si asa osolae kamo la ia sa sa qeto minate pa maṉauru, meke gona gore ni sa pa pepeso sari kaiqa ri qeto pinopino meke neti gore ni sa.* Rev 12:4 11 Va turu pule nia si asa pude noma gugua sa Koburu Tavia tanisa qeto minate pa maṉauru; vagi pani sa sari na vinukivukihi sapu ta tavete doduru rane la koa Sa, meke sa Nana Zelepade si tava boni. 12 Koa gua koasa vinaripera tanisa kikiho hitekena* Sa vinaripera tanisa kikiho hitekena babe sari sinea tadi na tie madidi., si sa puku tie madidi meke sa vinukivukihi sapu ta tavete doduru rane si ta hukata. Bokaboka si asa pa doduru tiṉitoṉa sapu tavetia sa, meke sa hinokara si ta gona la pa pepeso.

13 Meke avosia rau zamana si keke tie hopena, meke keke pule si zama la guahe koa sa, “Vea seunae gua meke kote tava gorevura sa dinogodogorae hie, sapu sa dinogodogorae tanisa vinukivukihi doduru rane, sa tinavete sea sapu va bonina sa vasina hopena meke sa puku tie madidi sapu kote ta neti pa kauru nene?”

14 Zama si asa koa rau, “Kote vagi karua tina ṉeta gogoto veluvelu meke munumunu totoso sapu lopu kote ta tavete sari na vinukivukihi; hola sapu asa si kote tava madi pule sa Zelepade,” gua si asa.

15 Sipu korapa doṉo la si rau koasa dinogodogorae meke korapa podekia pude tumae nia, si turu nana pa kenuqu si keke sapu doṉo guana tie. 16 Meke avosia rau si keke mamalaiṉi tie, korapa titioko mae gua pa Tototolo Ulai sapu zama, “Qebireli, tozi nia sa guguana sa dinogodogorae koasa tie hie,” gua.* Lk 1:19,26

17 Totoso ene mae si asa koasa vasina sapu turu arau, si matagutu si arau meke hoqa oporapaha gore pa pepeso. “Tuna na tie,” gua si asa koa rau, “mamu tumae nia sapu sa dinogodogorae si guguana sa vina hokotodi rina totoso kaleadi arini,” gua.

18 Sipu korapa zama mae si asa koa rau, si ele mabubulu tu si arau, sa isumataqu si pa pepeso. Tiqu mae au sa meke ovulu sage nau sa pa nenequ.

19 Zama si asa, “Kote tozi nigo rau sapu nasa si kote ta evaṉa pa korapana sa totoso sapu ta ṉaziri sa Tamasa, sina sa dinogodogorae si guguana sa totoso ta vizatana pa vina betona sa totoso. 20 Sa sipi kokoreo sapu karua kikihona sapu dogoria goi, si arini sari karua baṉara pa Media meke pa Pesia. 21 Sa qoti sapu puki kaluna, si asa sa baṉara pa Qurisi, meke sa kikiho nomana pa vari korapadi ri matana, si asa sa baṉara kekenu. 22 Sari ka made kikiho sapu hobena sa keke sapu ele moku taloa si sari ka made butubutu baṉara sapu kote vura sage koasa keke butubutu kekenu, ba lopu kote ṉiṉira gua sa butubutu asa si arini.

23 Koasa totoso pa vina betona sa dia binaṉara, totoso sapu ele kaleadi hola si arini, si kote vura mae si keke baṉara sapu doṉo va bubugorae isumatana, meke bokabokana hola pa sekesekei. 24 Kote ta evaṉae na baṉara ṉiṉirana hola si asa, ba lopu pa nana ṉiniraṉira soti. Kote huhuara va noma hola si asa meke bokaboka pa doduru tiṉitoṉa sapu taveti sa. Sari tie ṉiṉiradi meke tie madidi te Tamasa si kote va kilasa betoi sa. 25 Na sinekesekei si kote tavetavete nia sa pude bokaboka, meke kote vahesi pulenia pa bulona si asa. Totoso koa va leana sari tie si kote huara pani sa, meke kote turu va tia ia sa sa Baṉara tadi na baṉara. Ba kote ta seke huara si asa, ba lopu pa ṉiniraṉira tana tie. 26 Sa dinogodogoraedi rina vinukivukihi pana munumunu meke veluvelu sapu ta poni nia goi si hinokara, ba tome ia, lopu vivinei nia, ura kote seunae hola meke kote gorevura sa ginuguana sa.”

27 Arau, Daniela, si malohoro meke koa moho si rau ka visavisa rane. Beto si tekulu sage si arau meke va tana qua koari na tinavete tanisa baṉara. Pupuhu sisigiti nia rau sa dinogodogorae; na tasuna hola pude gilania sa guguana.