1 Mu tumae nia si hie: Kote kamo mae sari na totoso kaleadi sisigiti koari na rane mumudi. 2 Sari na tie si kote balabala pule sisigiti ni, na tataru poata, vahesihesi puleni pa dia zinama, doṉo pule ni dia binokaboka, zamazama ṉoṉovala, va kari tiatamadia, qumiqumi sisigiti, meke loke dia pinamaṉa koe Tamasa. 3 Meke loke dia tataru, lopu variva taleosae. Hoke zutu kokoha, meke lopu boka tuqe puleni, ba ṉoṉovala sisigiti, meke lopu tataru nia rini sa lineana. 4 Meke kote qora ni rini sari dia baere, na vahesi pule sisigiti ni, meke hata sisigitia rini sa qinetuqetu pa tinoa tini, hola nia si pude va qetua sa Tamasa. 5 “Gami si na tie te Tamasa,” kote gua si arini, ba lopu kote ta dogoro sa tinoa hinokara koa rini. Mu lopu va gunagunana ni sari na tie gugua arini. 6 Kaiqa rina titisa kokohadi hire, si hoke nuquru la pa vetu tana votiki tie, meke sekesekei ni rini sari na barikaleqe duviduvilidi, saripu balabala mamata ni sari na dia sinea, meke ta turaṉa koari dia inokoro seadi. 7 Sari na barikaleqe hire si hoke hiva va gilagilae doduru totoso, ba lopu hite boka gilania rini gua sapu hinokara. 8 Sari na titisa kokohadi hire si kana ia rini sa hinokara, kekeṉoṉo gua tugo ri Zanesi e Zaberesi sapu kana ia se Mosese pukerane. Lopu hoke balabala valeana si arini, meke lopu tagoa rini sa rinaṉeraṉe hinokara.* Ekd 7:11 9 Ba lopu kote boka hoda ia rini sa dia tinavete ninae rane, sina kote ta dogoro mo sa dia dinuviduvili koari doduru tie, gua sapu ta evaṉa koari Zanesi e Zaberesi pukerane.

10 Ba agoi si ele tumae valeani mo sari na qua vina tumatumae, na qua hahanana, meke sa qua hiniva pa tinoa. Meke ele gilania mo goi sa qua rinaṉeraṉe, na ṉinoṉo, na tataru, meke ele gilania mo goi sapu boka koa va ṉira ni mo rau sari na tinasuna, 11 na ṉinovaṉovala, na tinasigiti kaleadi hola saripu ta evaṉa koa rau pa Anitioki, pa Aekoniami meke pa Lisitara. Ba tava sare si rau koe Tamasa koari doduru arini.* TTA 13:14-52, 14:1-7,8-20 12 Kaqu ta ṉoṉovala gua asa sari doduru tie pu hiva keha lulia sa Tamasa pa tinoa keke koe Zisu Karisito. 13 Meke sari na tie kaleadi na tie va gulegulea pule ni, si kaqu gigiri hola la tu pa kinaleana, meke kaqu sekesekei ni rini sari na votiki tie, meke sekesekei puleni tugo teledia. 14 Ba sapu agoi, si mu turu va nabu koasa hinokara sapu ele tava tumatumae nia goi, meke sapu ele va hinokara valeania goi. Na gilani mua mo sari na tie pu va tumatumae igo. 15 Na tumae ni mua mo goi sari na Kinubekubere Hope, seunae gua kobukoburumu goi, sapu boka poni nigo sa ginilae, meke turaṉa la nigo koasa tinaharupu, sapu vagia goi koe Zisu Karisito pa korapa rinaṉeraṉe. 16 Doduru Kinubekubere Hope si ta siṉo mae di koe Tamasa meke arilaedi pude tava tumatumae, pude nonore, va toṉotoṉoto, meke va bokaboka pa tinoṉoto, 17 pude sa nabulu te Tamasa si mani va namanama va leana pude bokaboka si asa koari doduru votivotiki tinavete leadi.