3
Manetualain Ana Na kahereꞌ lena baꞌi Musa
1 De, leo iaꞌ toranoo kara emin! Manetualain here na emi, ma tao emi neuꞌ lahenda lalao-lalafuꞌ, de neuꞌ ko emi masoda sama-sama mo Ni nai nusatetu-ikutemaꞌ a. Huu ria na, emi muste afi lutuꞌ-lutu laꞌeneuꞌ Yesus. Huu fo ita manaku tae, Ria nana Manetualain Lahenda Nadedenun, ma Ria boe ita Malaka Agama Madema Nan Seli. 2 Tepoꞌ fo Manetualain nadenu Yesus, Ana tao tuka Ramatuaꞌ a hihii-nanaun katemaꞌ. No ria na, Ana dadi sama leoꞌ baꞌi Musa. Huu fo baꞌi Musa boe tao tuka Manetualain hihii-nanaun, tepo fo ana nalalau ita bei-baꞌi fai ulu nara.✡ Susura Dudui Nadeꞌ a 12:7 3 Leo mae leoꞌ na, tehuu Yesus kahereꞌ lena baꞌi Musa. Huu fo Yesus nana, sama leoꞌ malaka uma-loo. De, tea na nana, malaka uma-loo a kahereꞌ lena neme ata nai uma ria daleꞌ. 4 Lahenda ra esa-esaꞌ ko nafoaꞌ ria uma-loon. Tehuu Manetualain nafoa basa-basan. 5 De, baꞌi Musa tao tuka Manetualain hihii-nanaun, tepoꞌ fo ana dadi ata fee Ramatuaꞌ a uma isi nara. Tepoꞌ ria Ana nafada memaꞌ hata fo neuꞌ ko Manetualain nau tao ni a. 6 Yesus boe tao tuka Manetualain hihii-nanaun, tehuu Ria nana ta ata sama leoꞌ baꞌi Musa fa. Huu fo Ria nana, Kristus, Manetualain Anan fo riꞌ Ana here memaꞌ neme fai a ulu na mai, fo nau feen leo dae-bafoꞌ ia mai. Ma Kristus tebe-tebe urus nalelaꞌ Papa Na uma isi nara. De, maneniko homu tahere ita namahere na, ma tamahena taroo Kristus, ita boe bisa dadi teuꞌ Ria uma isin.
Bosoꞌ masadea foa ela namahere mara sama leoꞌ bei-baꞌi ra, nana huu ara ta bisa masoꞌ leo dae fo Manetualain helu ela hahae ao nara
7 Huu ria na, ami muste pasaꞌ ridoo mara ela nenene matalolole hata fo Manetualain Dula-dale Malalao-malalafu Na nafada nae,
“Faiꞌ ia, maneniko emi mamanene Manetualain haraoe Na,
8 emi bosoꞌ laka batu,
sama leoꞌ lahenda sira,
fo riꞌ laꞌo reu-mai losaꞌ teuꞌ haa hulu nai mamana lino-nees.
Ara ta nau tao daleꞌ neuꞌ Musa,
losaꞌ kurabaiꞌ Manetualain riꞌ
ta bisa nanenete no si soꞌ.
9-10 Moi dodooꞌ ana leo!
Teuꞌ haa hulu Au tao tanda heran rupaꞌ ara
nai sira matan!
Tehuu ara soba Au kose-kose.
Huu ria na, de Au boe amanasa neuꞌ asa ae,
‘Emi, talalu man seli!
Huu fo emi masadea foa ela Au eno Ka so,
de tuka noi emi eno peko-paki mara!’
11 Au ta anenete relu laꞌe emi tadalu leoꞌ na mara soꞌ.
Huu ria na, de Au kutuk emi ae,
‘Emi ta bole masoꞌ meu hahae ao mara sama-sama mo Au.’ ”✡ Sosoda Iꞌio-oꞌoaꞌ ara 95:7-11
12 De, toranoo kara emin! Besa-besa ela bosoꞌ losa neme emi mai ruma tao salaꞌ, losaꞌ ana ta namahere soꞌ, basa de nasadea foa ela Manetualain fo riꞌ nasoda naroo. 13 Malole lenaꞌ, tuka-tuka faiꞌ emi matetea esa no esa dalen. Bosoꞌ mahani bali! Nana huu emi mudaꞌ laesaꞌ nanatipuꞌ, fo tao salaꞌ losa emi boe laka batu, ma ta tao daleꞌ neuꞌ Manetualain. 14 Ita bisa dadi tia-lai ma eiꞌ esa to Yesus Kristus so, sadi ita tamahena taroo Ni, sama leoꞌ tepoꞌ fo ita besaꞌ ko mulai tamahere Ni.
15 Ramatuaꞌ a Dula-dale Malalao-malalafu Na boe dedea leo naꞌ nae,
“Faiꞌ ia, maneniko emi mamanene Manetualain haraoe Na,
emi bosoꞌ laka batu, sama leoꞌ lahenda sira,
fo riꞌ laꞌo reu-mai losaꞌ teuꞌ haa hulu nai mamana lino-nees,
nana huu ara ralena laka neuꞌ Musa.”✡ Sosoda Iꞌio-oꞌoaꞌ ara 95:7-8
16 Besaꞌ ia au nau atane leo iaꞌ: lahenda fo ramania-ramanene neuꞌ Musa, basa de hiru rasadea ni a, nana bea? Bea bali, kalu ta ita bei-baꞌin, fo riꞌ besaꞌ ko Musa napipipi-nalalaꞌo noo si kalua reme dae Masir a mai. 17 Boe ma lahenda fo riꞌ tao ra Manetualain dale Na hanas a losaꞌ teuꞌ haa hulu a, nana bea? Bea bali, kalu ta ita bei-baꞌin fa. Ara rasoda peko-pakiꞌ nai mamana lino-nees, losaꞌ ara mate, de ratoi si reuꞌ na. 18 Ma lahenda fo riꞌ hapu kutuk neme Manetualain mai, losa ara ta bole masoꞌ leo dae ria reu, ela hahae ao nara sama-sama ro Ni, nana bea? Bea bali, kalu ta ita bei-baꞌin fa. Ara ta nau ramanene neuꞌ Manetualain fa.”✡ Susura Dudui Nadeꞌ a 14:1-35 19 De, teteaꞌ so, hete! Ita bei-baꞌin ta masoꞌ leo dae ria reu, fo hahae ao nara sama-sama ro Manetualain, nana huu ara ta ramahere Ni fa.