1 Besaꞌ ia au nau duiꞌ laꞌeneuꞌ basa hihii-nanauꞌ fo emi matane nai emi susura ma daleꞌ nae, “Leoꞌ bea? Malole lenaꞌ touꞌ ara bosoꞌ sao do?”

2 Leo iaꞌ: huu no lahenda bisa hapu lelaꞌ dodouꞌ fo tuda rala hohoke a daleꞌ, de malole lenaꞌ touꞌ ara esaꞌ ko noꞌ saon. Leoꞌ na boe soaneuꞌ inaꞌ ara esaꞌ ko noꞌ saon.

3 Touꞌ ara! Bosoꞌ tipa sao ma hak na fo suku moꞌ ana. Ma sao-inaꞌ ara! Bosoꞌ tipa sao ma hak na fo suku moꞌ ana. 4 Huu fo sao-inaꞌ a fee ao-paa na fo dadi neuꞌ sao-tou na nuun. Ma sao-touꞌ a fee ria ao-paa na fo dadi neuꞌ sao-ina na nuun. 5 De emi boso esa tipa esa, huu fo emi dua manuu hak! Tehuu maneniko emi nau hule-haradoi, sona bosoꞌ afi hihii-nanau fekeꞌ ara fo nau suku mabua, malole lenaꞌ manenete baiꞌ dei. Sadi sao-inaꞌ ma sao-touꞌ dedearaoꞌ matalolole leo naꞌ. Ma kalu hule-haradoi basa, sona malole lenaꞌ dua si ralale fo suku rabua leo. Taꞌa sona masalaeꞌ a! Huu fo nitu ra malaka na mudaꞌ laesaꞌ duduku-papauꞌ lahenda fo ta nanenete nala. 6 Ia nana ta Manetualain atoran na fa, tehuu au duduꞌa-aafi mesa ka. 7 Tuka au aafi ka, malole lenaꞌ lahenda bosoꞌ sao, sama leoꞌ au. Tehuu Manetualain fee lahenda ra esa-esaꞌ ko babati-papalaꞌ natetu-naraa noon. Ana fee lahenda ruma sao ma ruma ta sao fa.

8 Au nau afada touꞌ do inaꞌ manasao taaꞌ ara, ma ina falu ra ae, malole lenaꞌ kalu emi ta sao, sama leoꞌ au. 9 Tehuu maneniko ta bisa ranenete fa, sona malole a ara sao. Malole lenaꞌ lahenda sao, kalu taꞌa, sona hihii-nanau ao-paa na bisa tao nalutu ni.

10 Ia nana ta noi nemeꞌ au mai fa. Au nau afada hata fo ita Ramatua na pareta lahenda manuu saoꞌ ara nae, sao-inaꞌ a ta bole namaetuꞌ noo sao-tou na. 11 Maneniko ana foa ela sao na, sona ana bosoꞌ sao seluꞌ bali. Tehuu maneniko ana nau sao seluꞌ, sona natafali neu sao seluꞌ sao-tou na. Leoꞌ na boe, sao-touꞌ a ta bole namaetuꞌ noo sao-ina na.✡ Mateos 5:32; 19:9; Markus 10:11-12; Lukas 16:18

12 Ia neme au mai, ta neme ita Ramatua na mai fa. Ma soaneuꞌ lahenda fekeꞌ ara, au nau dedea leo iaꞌ: maneniko lahenda saraniꞌ fo sao-ina na ta namahere Kristus, ma kalu sao-ina na bei sadia nasoda sama-sama noo ni, sona bosoꞌ namaetuꞌ no inaꞌ ria. 13 Leoꞌ na boe, maneniko sao-inaꞌ fo sao na ta namahere Kristus, ma kalu sao-tou na nau nasoda sama-sama noo ni, sona ana bosoꞌ namaetuꞌ noo touꞌ ria. 14 Huu fo sao-touꞌ fo ta namahere Manetualain, ana dadi lalao-lalafuꞌ, nana huu nabua-naesa noo sao-ina na. Ma sao-inaꞌ fo ta namahere Manetualain, ana dadi lalao-lalafuꞌ, nana huu nabua-naesa noo sao-tou na. Kalu taꞌa, sona sira ana nara ta lalao-lalafuꞌ fa. Tehuu no enoꞌ ia, ara hapu eꞌe-dededeꞌ lalao-lalafuꞌ nai Manetualain matan. 15 Tehuu maneniko lahenda fo ta ramahere Manetualain, laꞌo ela ria sao-inan do sao-toun lahenda kamahereꞌ, sona pesin nemeꞌ na. Sao-inaꞌ do sao-touꞌ kamahereꞌ ara ta nanahekeꞌ leo naꞌ soꞌ. Huu fo Manetualain naloo emi fo dadi meuꞌ Ria lahendan, ela emi bisa masoda tetu-temaꞌ ma mole-dame. 16 Sao-ina kamahereꞌ emin! Emi bisa fee sao-tou mara sodaꞌ. Bate taꞌa. Ma sao-tou kamahereꞌ emin! Emi bisa fee sao-ina mara sodaꞌ. Bate ta leo naꞌ boeꞌ. Emi ta bubuluꞌ matetuꞌ fa.

17 Leo mae leoꞌ na, tehuu tepoꞌ fo Manetualain naloo emi dadi meuꞌ Ria lahendan, sona lahenda ra esa-esaꞌ ko natuu-napadein leo beaꞌ, sona nasoda naroo leo naꞌ leo. Bosoꞌ naralin bali, huu fo Manetualain ator leo naꞌ so. Au anori-afada atoran ia nai basa saraniꞌ ara.

18 Nasasamaꞌ leo-leoꞌ, emi parnaa sunat fo natudu nae, emi lahenda Yahudi, nai fai mabuiꞌ a besaꞌ ko mamanene Manetualain naloo emi, sona bosoꞌ malena sunat ria. Ma lehenda fo ta sunat, ramanene Manetualain naloo si dadi reuꞌ Ria nuun, sona bosoꞌ boe sunat dadi tanda nae, sira dadi reuꞌ Manetualain lahendan. 19 Maneniko parnaa sunat, sona ta nanuu sosoa-raraaꞌ fa. Ma kalu ta sunat, ria boe ta nanuu sosoa-raraaꞌ fa. Nanuu sosoa-raraaꞌ, nana riꞌ: ita tao tuka Manetualain pareta nara. 20 Tepoꞌ fo Manetualain teka-here emi dadi meuꞌ Ria lahendan, Ana ta nadenu emi sunat do taꞌa. De, nemeꞌ na, ela emi leo naꞌ mahere leo. Ta parluu marali soꞌ.

21 Au afada nasasamaꞌ esa bali. Maneniko fai fo Manetualain naloo o, sekona te o bei dadi muuꞌ lahenda atan, sona dadi leo naꞌ leo! Tehuu uniꞌ ko leo tepo ria o ta ata fa, sona dadi leo naꞌ leo. Nana huu o ata do ta ata, ta hata-hata fa! 22 Tepoꞌ fo Manetualain naloo ata esa dadi neuꞌ Ria lahendan, ata ria dadi sama leoꞌ lahenda poꞌilotaꞌ fo noi-tao soaneuꞌ ria Ramatua na nai lain. Ma tepoꞌ fo Manetualain naloo lahenda poꞌilotaꞌ esa dadi neuꞌ Ria lahendan, besaꞌ ia lehenda ria dadi neuꞌ Kristus lahenda nadedenun. 23 Kristus tifa-bae etu emi neniꞌ beli mabera so! De, emi bosoꞌ dadi ata fee lahenda fekeꞌ.

24 Toranoo susue kara emin! Tepoꞌ fo Manetualain naloo emi dadi meuꞌ Ria lahendan, emi natuu-napadeim leo beaꞌ, sona leo naꞌ leo. Bosoꞌ maralin bali. Nemeꞌ naꞌ, sadi emi daleꞌ esa moo Manetualain.

25 Emi matane au laꞌeneuꞌ manasao taaꞌ ara. Ramatuaꞌ a ta nafada au laꞌeneuꞌ hihii-nanauꞌ ia. Tehuu emi bisa mamahere hata fo au dedea ni a, nana huu Ramatuaꞌ a natudu Ria dale malole Na neu au. Au aafi ka leo iaꞌ: 26 Besaꞌ ia ita hapu doidoso rupaꞌ ara. De maneniko lahenda a leo beaꞌ, sona ela ana leo naꞌ leo. Au maksud ka leo iaꞌ: 27 Maneniko o nanahekeꞌ moo sao-ina ma, sona boso mamaetuꞌ moo ni. Maneniko o ta nanahekeꞌ moo sao-ina ma, sona bosoꞌ saka enoꞌ fo sao seluꞌ. 28 Tehuu uniꞌ ko leo o sao, o ta sala fa. Ma kalu anafeto manasao taaꞌ esa sao, ria ta sala fa. Tehuu mafarereneꞌ te lahenda manasaoꞌ ara, neuꞌ ko hapu susa rupaꞌ nai dae-bafoꞌ ia. Au maksud ka ela emi bosoꞌ hapu susa leo naꞌ.

29 Toranoo susue kara! Tuka au aafi ka, leo iaꞌ: ledo-fai boe-boe eetu, ma dae-bafoꞌ a nonoe na naneneaꞌ so. De lahenda fo nanuu sao-inaꞌ, bosoꞌ tao daleꞌ noi neuꞌ sao-ina na, tehuu ana muste tao daleꞌ neuꞌ Ramatuaꞌ a boe. 30 Leoꞌ na boe, maneniko bea dola, malole lenaꞌ natetea dale na fo bosoꞌ dola, ela ana bisa tao daleꞌ neuꞌ Ramatuaꞌ a. Maneniko bea namahoꞌo-natadale, malole lenaꞌ bosoꞌ tao aon leo naꞌ, ela ana bisa tao daleꞌ neuꞌ Ramatuaꞌ a. Maneniko bea ue-asa, malole lenaꞌ ana nasoda sama leoꞌ ta nanuu hata esa boeꞌ, ela ana bisa tao daleꞌ neuꞌ Ramatuaꞌ a. 31 Maneniko bea pake hata neme dae-bafoꞌ ia mai, malole lenaꞌ ana tao aon leoꞌ lahenda fo ta tiadea-radaꞌara neuꞌ hata-heto dae-bafoꞌ a, ela ana bisa tao daleꞌ neuꞌ Ramatuaꞌ a. Huu fo neuꞌ ko dae-bafoꞌ a eno soda na sapu-lalo.

32 Au nau emi dale mara bosoꞌ dodaꞌ. Neuꞌ lahenda manasaoꞌ taaꞌ a, ledo-fain bei dodouꞌ de ana bisa tao daleꞌ neuꞌ Ramatuaꞌ a hihii-nanaun. Huu ria na, de ana bisa saka enoꞌ fo noi-tao malole, ela tao na Ramatuaꞌ a dale na namahoꞌo. 33-34 Tehuu lahenda manasaoꞌ a, boe muste tao daleꞌ neuꞌ dae-bafoꞌ ia hihii-nanaun. Ana nau tao daleꞌ neuꞌ Ramatuaꞌ a hihii-nanaun, ma ana muste saka enoꞌ fo tao namahoꞌo sao-ina na. Ria riꞌ tao na duduꞌa-aafin nabatiꞌ ii-onaꞌ.

Leoꞌ na boe, ina falu ra, ma inaꞌ manasaoꞌ taaꞌ ara. Ara tao daleꞌ neuꞌ Ramatuaꞌ a hihii-nanaun, ela sira dalen, ma ao-ina nara bisa lalao-lalafuꞌ. Tehuu inaꞌ manasaoꞌ a, ria dale na nabatiꞌ ii-onaꞌ. Huu fo ana nau tao daleꞌ neuꞌ Ramatuaꞌ a hihii-nanaun, tehuu ria boe muste saka enoꞌ ela tao namahoꞌo sao-tou na. 35 Au afada emi hihii-nanauꞌ ia ra, ela emi hapu malole na. Au ta nau emi hapu eena-natabaaꞌ. Au ahiiꞌ emi tao roo-tetuꞌ, ma tao daleꞌ neuꞌ Ramatuaꞌ a hihii-nanaun, ela emi duduꞌa-aafim ta nabika-nabatiꞌ fa.

36 Maneniko touꞌ a nahiiꞌ sao anafetoꞌ fo teu-fain naraa, sona ela ara sao. Lena-lenaꞌ kalu touꞌ ria ta nanenete fa. Ara tao leo naꞌ, ta sala fa. Boso losa ara ela-deiꞌ raroo, boe ma neuꞌ mateꞌe na touꞌ ria tao hihii-nanauꞌ ta malole ra. 37 Tehuu maneniko ana nanenete nabeꞌi, sona ana bosoꞌ nalale fo sao. Huu fo ria bubuluꞌ hata fo ria naetuꞌ a, de ana nanenete nalaꞌ dooꞌ a boe malole ana nanenete nalaꞌ dooꞌ a boe malole. 38 De, touꞌ a sao na inaꞌ fo riꞌ nahiiꞌ ana, malole a. Ma ta sao fa, ria malole lena bali.

39 Sao-inaꞌ a nanaheke naisaꞌ no sao-tou na losaꞌ mate. Tehuu maneniko sao-tou na maten, sona ana bole sao seluꞌ, sadi sao-tou bebeu na boe, lahenda fo namahere Kristus. 40 Tuka au aafi ka, ina falu ria naua-nanale nan seli, kalu ana ta sao seluꞌ fa. Au afi ae lelea-nonoreꞌ ia neme Manetualain Dula-dalen fo riꞌ nai au.