4
Si Abraham ang aton Ihimplo
1 Bilang ihimplo kung pauno ginakabig nga matarong ng Dios ang tawo, ano ang amon mahahambay parti kay Abraham nga amon kalulo-lulohan nga mga Judio? 2 Kung gingkabig siya nga matarong ng Dios tungod sa iya maayo nga mga hinimuan, may maipapahambog siya. Pero ang matuod, wayà siya may maipahambog sa Dios. 3 Nasayuran naton ini kay ginahambay ng Kasulatan,
“Nagtuo si Abraham sa Dios kag tungod diri gingkabig siya nga matarong ng Dios.”† 4:3 Gingtunaan 15:6
4 Ang tawo nga nagatrabaho hay ginasuhuyan. Ang suhoy hay indì makabig nga regalo kay iya ini gingpangabudlayan. 5 Pero ang tawo hay ginakabig nga matarong ng Dios, bukon paagi sa iya maayo nga mga ginghuman, kundì paagi sa iya pagtuo sa Dios nga nagapatawad sa makasasalà. 6 Imaw da ini ang gusto hambayon ni David nang naghambay siya nga gingpakamaayo ang tawo nga gingkabig nga matarong ng Dios bukon paagi sa iya maayo nga mga hinimuan. 7 Naghambay siya,
“Bulahan ang mga tawo nga ang inda mga pagsuway hay gingpatawad,
kag ang inda mga salà hay ginglimot na ng Dios.
8 Bulahan ang tawo nga ang iya salà hay wayà na ginadumduma ng Ginoo.”† 4:7-8 Salmo 32:1-2
9 Ining ginghambay ni David hay bukon lang para sa mga Judio, kundì para da sa mga bukon Judio. Ang ginahambay namon hay pareho ng ginahambay ng Kasulatan,
“Nagtuo si Abraham sa Dios kag tungod sa iya pagtuo,
gingkabig siya nga matarong ng Dios.”
10 Kasan-o ba ini natabò? Pagkatapos siya mapaltak o bago siya mapaltak? Gingkabig na siya nga matarong bago siya mapaltak. 11 Gingpaltak siya nang ulihi bilang tandà nga gingkabig na siya nga matarong ng Dios tungod sa iya pagtuo nang wayà pa siya mapaltak. Imaw inà nga si Abraham hay gingkabig nga tatay ng tanan nga wayà napaltak pero nagatuo sa Dios. Kag tungod sa inda pagtuo, gingkabig sinda nga matarong ng Dios. 12 Si Abraham hay tatay da ng mga pinaltak, bukon lang tungod sa inda pagiging paltak, kundì tungod nagatuo sinda pareho sa pagtuo ng amon tatay nga si Abraham nang wayà pa siya mapaltak.
Ang Pangakò ng Dios Nabaton paagi sa Pagtuo
13 Nang una, nagpangakò ang Dios kay Abraham kag sa iya mga inapo nga ang kalibutan hay maging inda. Gingpangakò ini bukon tungod sa pagtuman ni Abraham sa Kasuguan, kundì gingkabig siya nga matarong paagi sa iya pagtuo. 14 Kung ang mga nasakop sa Kasuguan* 4:14 Ang mga nasakop sa Kasuguan: gusto hambayon, ang mga Judio nga nagtinguhà nga magsunod sa Kasuguan ni Moises. imaw lang ang makabaton ng gingpangakò ng Dios, wayà puyos ang aton pagtuo sa Dios kag gingbaliwayà na ang pangakò ng Dios. 15 Ang Kasuguan imaw ang kabangdanan kung basì may parusa nga halin sa Dios. Kay kung wayà ang kasuguan, wayà da ning pagsuway.
16 Nganì ang pangakò ng Dios hay paagi lang sa pagtuo, agud ini hay maitao ng Dios nga wayà bayad kag maging pamatuod nga ini hay mababaton ng tanan nga inapo ni Abraham, bukon lang sa mga Judio nga sakop sa Kasuguan, kundì sa mga bukon Judio nga nagatuo da pareho kay Abraham. Kay si Abraham imaw ang tatay ng tanan nga nagatuo, Judio man o bukon. 17 Ginahambay ng Kasulatan,
“Ginghuman ko ikaw nga tatay ng madamò nga nasyon.”† 4:17 Gingtunaan 17:5
Ini nga pangakò hay sigurado gid kay ang Dios ang naghuman ini. Kag ang Dios nga gingtuuhan ni Abraham imaw da ang Dios nga nagatao kabuhì sa mga patay† 4:17 Patay: Daw patay si Abraham kag si Sara kay maguyang na gid sinda kag baog pa si Sara. kag nagatuga ng mga butang nga wayà pa. 18 Aber wayà na gid paglaom nga makaungà, nagtuo gihapon si Abraham nga siya hay maging tatay ng madamò nga nasyon. Nganì sa iya pagtuo, natuman ang pangakò ng Dios. Sunò gid sa ginghambay ng Dios sa iya,
“Magiging pareho kadamò sa mga bituon ang imo mga inapo.”† 4:18 Gingtunaan 15:5
19 Nang nagpangakò ang Dios kay Abraham, mga 100 na ka tuig ang iya edad. Sayod niya nga maguyang na siya kag imposible na nga makaungà pa. Sayod da niya nga ang iya asawa hay indì na makaungà kay baog si Sara. Pero wayà nagpangluya ang iya pagtuo sa Dios. 20 Wayà gid siya nagduha-duha sa pangakò ng Dios, kundì nagtuo siya. Nganì gingpakusog siya ng Dios tungod sa iya pagtuo. Kag gingdayaw niya ang Dios 21 kay nagsalig gid siya nga tumanon ng Dios ang iya gingpangakò. 22 Nganì tungod sa iya pagtuo, gingkabig siya nga matarong ng Dios. 23 Pero ang ginahambay ng Kasulatan nga, ‘gingkabig siya nga matarong’ hay gingsulat bukon lang para kay Abraham, 24 kundì para da sa aton. Kabigon da kita nga matarong kung nagatuo kita sa Dios nga nagbanhaw kay Hesus nga aton Ginoo. 25 Gingpatay si Hesus tungod sa aton mga salà kag gingbanhaw siya agud kabigon kita nga matarong.
†4:3 4:3 Gingtunaan 15:6
†4:8 4:7-8 Salmo 32:1-2
*4:14 4:14 Ang mga nasakop sa Kasuguan: gusto hambayon, ang mga Judio nga nagtinguhà nga magsunod sa Kasuguan ni Moises.
†4:17 4:17 Gingtunaan 17:5
†4:17 4:17 Patay: Daw patay si Abraham kag si Sara kay maguyang na gid sinda kag baog pa si Sara.
†4:18 4:18 Gingtunaan 15:5