LUKA ENA EVANELIA
1
1 Teopilo e, doha tatao headi edi nuatu si ene bena ginauri ta sunusunumaedi wa si uri hemasarahadi, 2 doha hinage se ledima arida eai isi huia hetubuna eai ginauri wa tauitadi, eo riba wa taulauguguiaena tataodi; 3 ginauri gamagaridi huia bagubagunadi eai wa, eau hinage ea nuatukomakomanidio, arinai, ea ’ne i lolo hinage ea uri heaheasadi oa arim eai. 4 Teina ginauri ta bena u nuatuwataididinidi, doha hinage se ribahasahasaim’o wa.
5 Heroda, Iudea wasawasa, huiana eai, kohena esau esana ede Sakaria, ia Abia bogana: ia monena esana ede Elisabeta, ia Arona bogana. 6 Taudi labui, Eaubada matana eai edi laulau se dudurai: Guiau ena laulau eo ana sanapu gamagaridi se lauwataidi, se lolo. 7 Isi nige natudi: Elisabeta i agari, eo taudi labui edi borimai se gamagari ariri.
8 Ena huia kohena eai wa Eaubada matana eai i paisoaei. 9 Kohena edi laulau doha meta, isi se lau Guiau ena dubu tabuna alona eai muramura panepane se gabu. 10 Huia wa muramura panepanena se gabu tatao moutuadi lailai murimuri eai se laulau‐uura. 11 Ia arinai Guiau ena aneru esau i taumasaraha muramura panepanena wa hatahatana teha tutuna eai i totoro. 12 Sakaria ia ie ita nuana i ponopono, aruana ie loi. 13 Aneru abo i ribalau ia arinai i ene, “Sakaria e, tabu u matausi: em uura se ataieyao; monem Elisabeta abo i haisu natum tau abo i leawa, ia esana abo u tore Ioane. 14 Abo u nuawoiwoina eo u kode: ia abo se labasi wa debana eai tatao gamagaridi hinage abo se kode. 15 Paana Guiau matana eai ia abo i sae, waina eo nomnom gigigigiboridi taba nige i nomdi; na Earua Tabuna arinai abo se hemonau sinana bogana eai i laoma e. 16 Isaraela nanatunayao moutuadi abo i hesinibuidi Guiau edi Eaubada arinai. 17 Ia Guiau matana eai abo i edabaguna Elia ena laulau eo ena gigibori eai, tamadiyao nuadi bena i heasibuidi nanatudiyao aridi eai: eo tauawaawayagara hinage nuadi bena i heasibuidi taulaulaududurai edi sonoga dobiladi eai: tatao bena i henonohaidi Guiau enana.” 18 Sakaria i ribalau aneru arinai, i ene, “Wau wa ginauri edohana abo ea nuanuatui? Ea tautaubadao, eo monegu hinage ena borimai se gamagari.” 19 Aneru arinana i heuio i ene, “Eau Gaberiela ina, Eaubada matana eai ea totoro; na se hetamariguma bena enam ea riba, bena teina wasa lolona ta ea heribam. 20 E oa abo u unauna, taba nige abina u ata riba esau u ribaei i lau e asubenana eai ginauri ta abo se tubu, paana egu riba nige u awamamohoiedi, ia ede abo se tubu edi huia eai.” 21 Tatao wa Sakaria se bagiwatai, se noo paana huia lohaloha dubu tabuna alona eai ie bawa. 22 I taulagema murimuri eai, bena i riba to nige arinana: se nuatuiyao numa tabuna alona eai ia ginauri esana ie ita: paana i nimaoidi, eo nige arinana hinage. 23 Ana paisoa asubenadi se ohi, ie lau ena numa eai.
24 Nei asubenadi muridi eai ia monena Elisabeta ie boga, nawalai haligigi i miayamui, i ene, 25 “Nuana Guiau ena abiabigu doha ede teina, agu iwala tatao matadi eai abo i abihai.”
26 Nawalai hehaligigi‐esegana eai aneru Gaberiela wa se hetamariama, Eaubada arinai i laoma Galilaia eanua esau eai, esana Nasareta. 27 Hasara nuanuasupu esau arinai, ia se awaawaduduei tau esau arinai, esana Iosepa, ia Davida bogana; wau hasara nuanuasupuna wa esana ede Maria. 28 Aneru wa i laoma ia arinai i ene, “Eauedo, oa se hedebasaem, Guiau maem: sisine aridi eai oabom u sae!” 29 Hasara wa aneru ie ita ena riba wa nuana i ponoponoei, i heunaboisaha, i ene aitoi sahasaha ina? 30 Aneru abo i ribalau ia arinai i ene, “Maria e, tabu u matausi: Eaubada arinai oa se hedebasaem. 31 Oa abo u boga, natum tau abo u labasi, ia esana abo u tore IESU. 32 Ia abo i sae, ia esana abo se tore Saesaedaoina Natuna: ia tamana Davida ena terona Guiau Eaubada abo i mosei ia arinai. 33 Iakobo boganayao ia abo tanuagadi eai i lau e nige nosina; ena basileia hinage taba nige ena abalautom.” 34 Maria abo i ribalau aneru arinai i ene, “Wau wa abo edoha egu abiabina, eau nige monegu?” 35 Aneru arinana abo i heuio i ribalau ia arinai i ene, “Earua Tabuna abo i dobima, Saesaedaoina ena gigibori abo i helogulogum: arinai hinage meta ginauri tabuna wa abo u labasi esana abo se ribaei Eaubada Natuna. 36 Am bogaoyao‐sinena Elisabeta i sinesinebadao, hinage ie boga abo i haisu tau, ia i agari wa ena nawalai harigigi‐esega se lauo. 37 Paana ede Eaubada nige ginauri esau ie deha, abo i ginauri.” 38 Maria abo i ene, “Eau ina, Guiau ena heaheari sinena; u ribaei wa besi abo i tubu arigu eai.” Aneru ia abo i laugabaei.
39 Nei asubenana ne Maria i torohai, i lau heuheula oea tupidi eai, eanua esau Iudea eai, 40 i awasae Sakaria ena numa eai Elisabeta i aitoiei. 41 Elisabeta Maria ena lautoi i ataiei, natuna bogana eai i lamposi; Elizabeta Earua Tabuna i monau 42 i ribalau arinana lailai i ene, “Sisine aridi eai oabom se hedebasaem, bogam aniona i sae ariri! 43 Egu lolo saha egu Guiau sinana i laoma arigu eai ta? 44 U aitoiegu wa, arinam beagu eai ea ataiei, kaimou bogagu eai ie kode eo i lamposi. 45 Sunusunuma sinena abo i nuawoiwoina, meta ginauridi Guiau ia i heriba wa, abo hinage se hemamohoiedi.” 46 Maria abo i ene,
“Guiau nuagu eai ea hedebasae.
47 Eo earuagu ie kode Eaubada, Tauhemaurigu arinai.
48 Ena heaheari sine epoeposisina i nuaamnaei:
ina ta i lau e isina gamagamagari abo se riba loloegu.
49 Paana ede taugigibori ginauri saesaedi i
hetubudio arigu eai, esana tabuna ede.
50 Ia matausina taumatausi abo i nuatoatoadi
i lau e hari isi, hari isi.
51 Ia nimana eai ena adidiri i hemasarahayao;
tauribaribahetausaeuioidi edi nuatu gaibu arinai i hetatagorigoridio.
52 Tatao saesaedi edi abababawa eai i heguridio:
tatao epoeposisidi i hedebasaedio.
53 Tauguriguriam ginauri lolodi eai bogadi i hesesedio:
taumonamonaune i hetamariuioidi ma nima ahaahadi.
54 Ena heaheari Isaraela i saguiyao,
ena nuatoatoa i henuaisini.
55 Doha i ribaeyao wa tamadayao aridi eai,
Aberahama arinai, eo tumanayao aridi eai i lau e nige nosina.”
56 Maria nuana nawalai haiona Elisabeta arinai ie mia, abo i uio ena numa eai.
57 Elisabeta ena huia labalaba abo ie lage; natuna tau i labasi. 58 Helena taumia eo ena dodogayao Guiau ena nuatoatoa lailai wasana se ataieyao; maedi se kodegogoesega. 59 Asubena hehaligigi‐haionana eai se laoma merumeru wa bena se heperitome; esana se torelaei Sakaria, tamana esana se helaudamai. 60 Ia sinana arinana i heuio i ene, “Nige’e; ia esana abo Ioane.” 61 Se ribalau ia arinai si ene, “Am bogao nige esau esana doha meta.” 62 Se nimanimaoi tamana arinai, si ene, “U ene gama ta esana?” 63 Abauriuri i aiboda, abo ie uri, i ene, “Ia esana ede Ioane.” Gamagaridi se nooei. 64 Ma esega abo ia awana i dabari, eo memenana i moimoiu, abo i ribariba eo Eaubada i aihelahui. 65 Heledi taumia gamagamagaridi matausi i abiunuidi: teina riba gamagaridi ta wasadi se helai i lau Iudea oea tupidi eanuadi se hetaiiridi. 66 Wau riba tauataiena gamagaridi isi se nuatuwatai, si ene, “Teina gama ta abo i hemala saha! Guiau nimana ia potana eai.”
67 Tamana Sakaria Earua Tabuna i monau, i riba peroveta, i ene.
68 “Guiau Isaraela edi Eaubada se aihelahui;
Paana ena tataoyao i aitaumanaidi, eo i lebohaidi.
69 Mauri donana esau i lauisini enada
ena heaheari Davida bogana eai.
70 Doha ena peroveta tabuna awadi eai i ribaei, tanoubu huia hetubuna eai wa i laoma e huia ta:
71 ada waiunu nimadi eai abo se hemaurida,
eo isi gamagaridi se ouyalayalaeda nimadi eai hinage;
72 nuatoatoa se ribahesunumayao tamadayao aridi eai abo se hetubu,
eo ribahesunuma tabuna abo ta nuatui.
73 Aigora i aigorayao tamada Aberahama arinai,
74 enada abo i leama,
ita ada waiunu nimadi eai abo se abihemaurida
ia bena ta heaeaiei taba nige ta matausi.
75 Ia matana eai ma hetabuda, eo ma laulaududuraida; eda mauri asubenadi gamagaridi eai.
76 Gama e, oa esam abo se tore Saesaearirina ena peroveta:
paana Guiau matana eai abo u lau baguna ena eda u abinonohaidi;
77 abihemauri nuatulobaina ribana u mosei ena tataoyao aridi eai
edi baaea ribagigirina debana eai.
78 Eda Eaubada ena nuatoatoa lailai debana eai;
arinai mara‐ie‐tom sasasasari i laoma ewa eai, i sinaida.
79 Isi masigiri boeana eai se bawa, eo mate loguloguna eai hinage, ia abo i hemaradi,
labini edana eai abo aeda i woeaidi.”
80 Gama wa ie tubu, i lau e i sibasiba, nuana abo hinage i adidiri, maratupama eai ie mia i lau e asubenana wa Isaraela matadi eai ia abo se hemasaraha.