KEIEUN PWUHKEN KRONIKEL
Oaralap en Pwuhk wet
Keieun Kronikel oh Keriaun Kronikel pwurehng koasoia duwen wiewia kan me ntingdier nan pwuhk kan en Samuel oh Nanmwarki kan, ahpw sang ni ehu soangen lamalam tohrohr. Pwuhk riau wet ntingdier pwehki kahrepe riau:
1) En kasalehda me mehndahte paisuwed laud kan eh lelohng wehin Israel oh Suda, ahpw Koht ketin dadaurete sapwellime inou kan ong tohn wehio, oh duwen eh ketin kapwaiadahte kupwure ong sapwellime aramas akan sang rehn irail kan me koukousoan nan Suda. Pwe en wia soangen kadehde wet, sounntingo tamanda en Depit oh Solomon ara wiewia kesempwal kan, oh pil wiewia en wiliakapw kan pahn kupwuren Seosopat, Esekaia, oh Sosaia, oh pil aramas akan me loalopwoatohng Koht.
2) E pil koasoiahda tepin kaudok ong Koht nan Tehnpas Sarawien Serusalem, ahpw mehlel koasoandien samworo kan oh mehn Lipai kan me kin apwahpwalih kaudoko. Pwuhk wet kasalehda me Depit me tapihada Tehnpas Sarawio oh tiahk sarawi kan loale, mehnda ma Solomon me ketin kauwada Tehnpaso.
Audepe ni Oaralap
Irekidien kadaudok kan oh mwararail kan 1.1—9.44
Sipallahn Sohl 10.1-14
Mwehin Depit 11.1—29.30
a. Kahpwal akan oh pweida kan 11.1—22.1
b. Kaunopadahn kokoupen Tehnpas Sarawio 22.2—29.30
1
Sang Adam lel Eipraam
(Senesis 5.1-32; 10.1-32; 11.10-26)
1 Adam me wia semen Sehd, Sehd me wia semen Enos, Enos me wia semen Kenan, 2 Kenan me wia semen Maalalel, Maalalel me wia semen Sared, 3 Sared me wia semen Enok, me iei semen Medusala; Medusala iei semen Lamek, 4 me iei semen Noha. Noha naineki pwutak silimen: Sehm, Ahm, oh Saped.
5 Nein Saped kan iei—Komer, Makok, Madai, Sapan, Tupal, Mesek, oh Tiras—irail me wia pahpa kahlap en aramas ako me weuwa adarail kan. 6 Kadaudok en Komer iei irail mehn Askenas, Ripahd, oh Tokarma. 7 Kadaudok en Sapan iei irail mehn Elisa, mehn Spein, Saiprus, oh Rohdes.
8 Nein Ahm kan iei—Kus, Isip, Lipia, oh Kenan—irail me pahpa kahlap en aramas ako me weuwa adarail kan. 9 Kadaudok en Kus iei irail mehn Sepa, Apila, Sapta, Raama, oh Sapteka. Kadaudok en Raama iei mehn Sipa, oh Dedan. 10 (Kus naineki pwutak emen ede Nimrod, me wiahla sounpei keieu lapalap emen nan sampah.) 11 Kadaudok en Isip kan iei mehn Lidia, Anam Lehap, Napdu, 12 Padrus, Kaslu, oh Krihd (me mehn Pilisdia kan pwilisang ie). 13 Nein Kenan pwutak—Saidon, me keieu laud, oh Ed—irail me pahpa kahlap en aramas ako me weuwa adarail kan. 14 Kenan pil wia pahpa kahlep en mehn Sepus, mehn Amor, mehn Kirkas, 15 mehn Ip, mehn Ark, mehn Sin, 16 mehn Arpad, mehn Semar oh mehn Amad.
17 Nein Sehm pwutak—Elam, Ahsur, Arpaksad, Lud, Aram, Us, Ul, Keder, oh Mesek—irail me wia pahpa kahlap en aramas ako me weuwa adarail kan. 18 Arpaksad me naineki Sela, Sela me naineki Eper. 19 Eper naineki pwutak riemen: emen adaneki Pelek,a PELEK: Sisen lepin mahsen wet ni mahsen en Ipru ekis duwehte sisen lepin mahsen me wehwehki “Pwalpeseng.” pwehki nindokon eh mwehi aramas en sampah pwalpeseng wiahda pali kei; oh meteio adaneki Sokdan. 20 Kadaudok en Sokdan kan iei mehn Almodad, Selep, Asarmaped, Sera, 21 Adoram, Usal, Dikla, 22 Epal, Apimael, Sipa, 23 Opir, Apila, oh Sopap.
24 Iet irekidien peneinei sang Sehm lel Apram: Sehm, Arpaksad, Sela, 25 Eper, Pelek, Reu, 26 Seruk, Nahor, Tera, 27 oh Apram (me pil kin adaneki Eipraam).
Kadaudok en Ismael kan
(Senesis 25.12-16)
28 Eipraam naineki pwutak riemen, Aisek oh Ismael. 29 Nein Ismael pwutak ko wiahla moangen kadaudok eisek riauo: Nepaiod (tepida sang ni nein Ismael pwutak me keieu laud), Keder, Adpeel, Mipsam, 30 Misma, Duma, Massa, Adad, Tema, 31 Setur, Napis, oh Kedema.
32 Eipraam pil pekehikihda emen lih tohrohr, me adaneki Ketura, e ahpw naitikihong Simram, Soksan, Medan, Midian, Ispak, oh Sua. Soksan naineki pwutak riemen: Sipa oh Dedan. 33 Midian naineki pwutak limmen: Epa, Eper, Anok, Apida, oh Eldaa.
Kadaudok en Esau kan
(Senesis 36.1-19)
34 Nein Eipraam pwutak Aisek naineki pwutak riemen: Esau oh Seikop. 35 Nein Esau pwutak kan iei Elipas, Reuel, Seus, Salam, oh Kora. 36 Elipas wiahla pahpa kahlap en kadaudok en me pahn wad pah kan: Teman, Omar, Sepi, Katam, Kenas, Timna, oh Amalek. 37 Oh Reuel wiahla pahpa kahlap en kadaudok kan en Nahad, Sera, Samma, oh Mihsa.
Pwilidak en Edom
(Senesis 36.20-30)
38-42 Pwilidak en Edom tepisang nein Seir pwutak pwukat:
Lotan, me pahpa kahlap en peneineien Ori oh Omam. (Mie rien Lotan serepein men adaneki Timna.)
Sopal me pahpa kahlap en peneineien Alpan, Manaad, Epal, Sehpi, oh Onam.
Sipeon, naineki pwutak riemen, Aiah oh Anah. Anah me semen Dihson, oh Dihson me wia pahpa kahlap en peneineien Amran, Espan, Idran, oh Seran.
Eser me pahpa kahlap en peneineien Pilan, Sapan, oh Sakan.
Dihsan me pahpa kahlap en peneineien Us oh Aran.
Nanmwarki kan en Edom
(Senesis 36.31-43)
43-50 Nanmwarki pwukat me kaunda wehin Edom, emenemen mwurin emen, ni ahnsou me saikinte mie nanmwarki nan Israel:
Pela nein Peor sang Dinapa
Sopap nein Sera sang Posra
Usam sang sapwen Teman
Adad nein Pedad sang Apid (e kalwehdi mehn Midian kan nan mahwen ehu nan Mohap)
Samla sang Masreka
Saul sang Rehopod-limwahn-pillapo
Paal Anan nein Akpor
Adad sang Pau (eh pwoud iei Methapel, nein Madred oh eh pahpa Kahlap Mehsap)
51 Tohn Edom pwalpeseng wiahda kadaudok pwukat: Timna, Alpa, Seded, 52 Olipama, Elah, Pinon, 53-54 Kenas, Teman, Mipsar, Makdiel, oh Iram.
a1:19: PELEK: Sisen lepin mahsen wet ni mahsen en Ipru ekis duwehte sisen lepin mahsen me wehwehki “Pwalpeseng.”