2
Koht ketin Kupwurohki Israel
1 KAUN-O ketin mahsanihong ie 2 I en kalohkihong mehn Israel koaros mahsen wet:
“I tamatamante uwen amwail kin loalopwoatohng ie ni amwail pwulopwul,
uwen amwail kin poakohng ie ni tepin atail kapwopwoudpene;
kumwail idawehniehdo nan sapwtehno,
nan sahpw me aramas sohte kin sapwasapw ie.
3 Israel, ngehite me sapwellimanikin uhk,
kowe me keieu mwahu nan ei rahk;
I kadaralahngehr lokolok oh kahpwal
ong irail koaros me kin kamedekeiukala.
Ngehi, KAUN-O, me mahmahsen.”
Dipen en mehn Israel Ar Pahpa Kahlap ako
4 Kumwail kadaudok en Seikop kan, kumwail kadaudok en Israel kan, kumwail rong mahsen en KAUN-O. 5 KAUN-O ahpw ketin mahsanih:
“Soangen suwed da me samamwail mehn mahs ako diarada rehi?
Dahme kahrehda re sohpeikihsang ie?
Re ahpw pwongihala dikedik en eni mwahl akan
oh re pil wiahla aramas mwahl.
6 Re sohla nsenohkin ie,
mehndahte ei kapitirailla sang Isip,
oh kahluwairaildo nan sapwtehn,
sahpw ehu me tehn oh diren pihk
me madekeng oh keper,
wasa me sohte aramas kin kousoan ie,
de pil keid ie.
7 I ahpw kahluwairaildohng nan sahpw kaselel ehu,
pwe re en nsenamwahuki wahnsahpw oh soahng teikan loale.
Re ahpw kohdo oh kauwehla sapweio,
re kasaminehla sahpw me I kihongirailehr.
8 Samworo ko soh mwahn idek, ‘Ia KAUN-O?’
Nei samworo kan pil sehse ie.
Kaun akan uhwong ie;
soukohp kan kin wia kokohp ni mwaren Paal,
oh pwongih dikedik en eni mwahl akan.
Kadeik me KAUN-O Wiahiong Sapwellime Aramas akan
9 “Eri, ngehi, KAUN-O, pahn pwurehng kapwungala nei aramas akan.
I pahn pil kapwungala kadaudokarail kan.
10 Kumwail seiloaklahng palikapi ni deke Saiprus;
oh kumwail kadaralahng emen ni palimesehn wehin Kedar.
Kumwail eri pahn ese me sohte mehkot me duwehte met wiawiher sang mahs kohdo.
11 Sohte wehi ehu me wekidala eh koht kan,
mehnda ma kaidehk koht mehlel kei irail.
Ahpw nei aramas akan kawilianiedahr,
re keseielahr, arail Koht me kawauwihiralla mahso,
ahpw uhd wiliankihdi koht kei me sohte kak sewese irail.
12 Eri, I mahsanihong pahnlahng en rerada kowahlap,
re pahn dahkihla oh pwuriamweikihla ire wet,
13 pwe nei aramas akan wiadahr dihp riau:
re sohpeisangieier,
utuhnpihl mwakelekelo;
re ahpw uhd weiradahng pein irail pwarer kei,
soangen pwarer me sohte pile.
Wahn en mehn Israel ar Soaloalopwoat
14 “Kaidehn Israel lidu men;
e sohte ipwidi wia lidu.
Eri, dahme eh imwintihti kan pwakipwakiheki?
15 Re kin ngiringirih rasehng laion kan;
re wiahkilahr sahpwo sapwtehn ehu,
oh kahnimw kan en Israel mwomwlahr, solahr towe.
16 Ei, tohn Mempis oh Dapanihs,
kauwelahr tihnmoange.
17 Israel, kowe me kahredohng mepwukat pohmw!
Ke keseielahr, KAUN-O, omw Koht,
ni ei kahluwaiuk nan omw seiloak.
18 Soangen pai da me ke koapworopworki nan Isip,
pwe ke en nim pilen Nail?
19 Pein omw suwed kan pahn kalokeiuk;
oh omw sohpeisang ie pahn kadeikuhkada.
Ke pahn esehla uwen katik oh sapwung en
omw keseiehla, KAUN-O, omw Koht,
oh sohla loalopwoatohng ie.
Ngehi, KAUN-O, Wasa Lapalahpie, me mahmahsen.”
Israel Kahngala Kaudokiong KAUN-O
20 KAUN-O, Wasa Lapalahpie, ketin mahsanih,
“Israel, sangete mahs kohdo ke mwamwahliki ei manaman;
ke kahngala peikiong ie oh pwongih ie.
Pohn dohl ile kan koaros
oh pahn mwetehn tuhke losolos koaros,
ke pwongih koht en kaparapar aramas akan.
21 I padokuhkedi duwehte tuhke wain keneinei pwoat,
sang weren wain me keieu kaselel.
Ahpw kilang dahme ke wialahr!
Ke rasehng tuhke wain pwoat me mwoasoahngot oh soh katepe.
22 Mehnda ma ke pahn duhduhki sohpw me keieu kehlail,
a I pil pahn kak kilang mwahi en dipomw.
23 Ia duwen omw kak nda me ke sohte saminla,
me ke sohte mwahn pwongih Paal?
Kilang duwen omw wiahda dihp nan wahwo;
kilang dahme ke wiadahro.
Ke rasehng kamel lih men me mwetida,
me kin saledek tangatangseli,
24 tangatangalahng nan sapwtehn.
Ni ahnsoun eh mwetida, ihs me kak kapweiekdi?
Kamel ohl kan sohte pahn pwangahki rapahki,
pwe e kak dierek ni ahnsoun kowerek koaros.
25 Israel, ke dehpa kapwangahda nehmw kan,
oh kepinweromw en dehr ngalangalada,
sang ni omw kin pwakipwakih koht teikan.
Ke ahpw kin nda, ‘Soh! I sohte kak pwurala.
I poakepoakelahr koht en liki kan
oh I pahn idawehnirailla.’ ”
Israel Konehng Ale Lokolok
26 KAUN-O ketin mahsanih, “Duwen aramas lipirap emen eh kin namenekla ni eh kin dierekda, iei duwen kumwail mehn Israel amwail pahn namenekla—amwail nanmwarki kan oh lapalap akan, amwail samworo oh soukohp kan. 27 Kumwail koaros pahn namenekla—kumwail kan me kin nda me tuhke pwoat me samamwail oh takai ehu me inamwail. Eri, met pahn wiawi pwehki amwail sohpeisang ie oh sohte sohpeiong ie. Ahpw ni ahnsoun amwail apwal, kumwail kin peki I en pwarodo oh doareikumwailla.
28 “Pwe ia koht ako me kumwail wiahdahng pein kumwail? Re en doareikumwailla ni amwail kin lelohng apwal—ma re kak! Suda, omw koht akan me tohto, duwehte tohtohn omw kahnimw kan. 29 Dahme kumwail kaulimehkin ie? Dahme kumwail kahngohdikihong ie? 30 I kalokei kumwail, ahpw sohte katepe; kumwail sohte men mweidohng ie I en kapwungkumwailla. Kumwail kemelahr amwail soukohp ako, rasehng laion kommwad emen. 31 Kumwail mehn Israel kan, kumwail rong kanahieng dahme I ndindaht. Ia duwe, I duwelahr sapwtehn ehu mwohmwail, rasehng sahpw rotorot oh keper ehu? Dahme kumwail ndahki me kumwail pahn kin wia nsenamwail, oh kumwail solahr pahn pwurodo rehi? 32 Pala serepein men kin manokehla eh kapwat akan, de lih kamwohd emen kin manokehla eh likoun kapwopwoud? Ahpw nei aramas akan manokeielahr erein rahn tohto me soh kak wadawad. 33 Kumwail ese mehlel pwakih amwail mwohnlimpoak kan. Lih me keieu suwed akan kin padahngki sang kumwail arail tiahk suwed. 34 Amwail likou kan mweikilahr ntahn me semwehmwe kan oh me soh dipe kan, ahpw kaidehn mwein ntahn sounpirap akan.
“Ahpw mehndahte amwail wiadahr mepwukat koaros, 35 kumwail ahpw nda, ‘Se me mwakelekel; eri, KAUN-O solahr ketin engieng paht.’ Ahpw ngehi, KAUN-O, pahn kalokei kumwial pwehki amwail nda me kumwail sohte wiahda dihp. 36 Kumwail katikitikihalahr pein kumwail ni amwail sohpeiong koht en wehi teikan. Kumwail pahn nsensuwedla pahn mehn Isip, duwehte amwail nsensuwedlahr pahn mehn Asiria.
37 Kumwail pahn sohpeisang Isip oh itiengkihdi amwail namenek. Ngehi, KAUN-O, me soikalahr irail kan me kumwail kin koapworopworki; eri, sohte mehkot me kumwail pahn paieki sang irail.”