30
1 Eri, ni Resel eh eseier me e sohte neitik, e ahpw peiriniongada rieo Lia oh ndaiong Seikop, “Menlau wiahiong ie nei seri, ma soh, I pahn mehla.”
2 Seikop eri lingeringerda pahn Resel oh ndaiong, “Dah, ngehi me Koht? Pwe ih me ketin kupwurehda ke en wia lih depwen.”
3 A Resel ahpw sapeng, nda, “Iet ei lidu, Pila. Ale oh pekehikihda, pwe en liseianda oh wiahiong ie nei seri. Eri, ih duwen ei pahn kak naineki seri sang rehn ei liduwet.” 4 Ih eri kihong Seikop eh lidu Pila pwe en pekehikihda; Seikop eri wiahda rehn Pila nsenen pwopwoud. 5 Pila eri liseianda oh naitikihada kisin pwutak kis. 6 Resel eri nda, “Koht ketin kasalehiongieier ei pwuhng. E ketin karonge ei pekipek oh ketikihong ie nei seri.” Ih eri kihong ede Dan.k DAN: Sisen ahd wet ni mahsen en Ipru ekis duwehte lepin mahsen me wehwehki “kasalehda en emen eh pwuhng.” 7 Eri, en Resel eh lidu ahpw pil pwurehng liseianda oh naitikiadahng Seikop nah pwutak keriemen. 8 Resel ahpw nda, “I uhwong oh pelianda riei serepein, oh kalowehdi.” Ih eri kihong eden pwutako Napdali.l NAPDALI: Sisen ahd wet ni mahsen en Ipru ekis duwehte lepin mahsen me wehwehki “uhwong oh pelian.’.
9 Ni Lia eh eseier me e solahr neitik, e kihong Seikop eh lidu Silpa pwe en pekehikihda. 10 Silpa eri naitikihong Seikop pwutak emen. 11 Lia eri nda, “I paiamwahulahr.” Ih eri kihong eden pwutako Kad.m KAD: Ahd wet, iei mahsen en Ipru me wehwehki “paiamwahu.” 12 En Lia eh liduwo ahpw pil naitikihong Seikop nah pwutak keriemen. 13 Lia eri nda, “Meid pai ngehi, pwe lih akan pahn kapaia ie.” Ih eri kihong eden pwutako Aser.n ASER: Ahd wet, iei mahsen en Ipru me wehwehki “meid pai.”
14 Eri, ni ahnsoun dolung wahn pilawa, Reupen ahpw kohla nansapw oh diarada soangen kisin tuhke me adaneki mandreik.o MANDREIK: Ni ahnsowo mehn mahs ako kin kamehlele me kisin tuhke wet mehn wia wini en neitik de pil mehn mesehl.” Ih eri wadohng eh nohno Lia. Resel eri peki rehn Lia, nda, “Menlau kihdo ekis kisin mandreik sang rehn noumw serien.”
15 Lia ahpw sapeng, nda, “Ke sohte itarki omw adihasang ie ei pwoudo, ke ahpw pil men song en kihsang en nei seriet eh mandreik kan?”
Resel ahpw ndalahng, “Ma ke pahn kihdo en noumw serien eh mandreik kan, ke pahn wendi rehn Seikop pwonget.”
16 Eri, ni Seikop eh pwurodo sang nansapw nin soutiko, Lia ahpw kohieila oh kasamwo, oh ndahng, “Ke pahn wendi rehi pwonget, pwe I pwainkidahr en nei seriet eh mandreik ko.” Eri, Seikop ahpw wiahda reh pwongo nsenen pwopwoud.
17 Koht eri ketin karonge en Lia eh kapakap, ih eri liseianda oh naitikiadahng Seikop kelimmen en nah pwutak. 18 Lia eri nda, “Koht ketin katingihkin ie ei kihong ei pwoud ei liduwo.” Ih eri kihong eden pwutako Isakar.p ISAKAR: Sisen ahd wet ekis duwehte lepin mahsen en Ipru me wehwehki “emen me pwaindahr” oh pil lepin mahsen me wehwehki “mie keting.” 19 Lia ahpw pil pwurehng liseianda oh naitikiadahng Seikop kewenemen en nah pwutak. 20 Ih eri nda, “Koht ketikihong ie kisakis mwahu ieu. Eri met, ei pwoudo pahn perenki mihmi rehi, pwehki ei kihong nah pwutak wenemen.” Ih eri kihong eden pwutako Sepulon.q SEPULON: Sisen ahd wet ekis duwehte sisen lepin mahsen en Ipru me wehwehki “kisakis.” 21 Mwuhr, e ahpw naitikihada serepein men, me e kihong ede Daina.
22 Koht pil ketin kupwukupwurehte Resel, pwe e ketin karonge eh pekipek oh kupwurehiong en kak neitik. 23 Resel ahpw liseianda oh naitikihada pwutak emen. Ih eri nda, “Koht ketikihsang ie kanamenekpen ei depwen. 24 En pil ketikihong ie pil emen pwutaken.” Ih eri kihong eden pwutako Sosep.r SOSEP: Sisen ahd wet ekis duwehte lepin mahsen en Ipru me wehwehki “en pil kihdo” oh pil lepin mahsen me wehwehki “e kihsang.”
Koasoandi Nanpwungen Seikop oh Lapan
25 Mwurin Sosep eh ipwidi, Seikop ndahng lapan, “Menlau mweidohng ie I en kohkolahng nan sapweio. 26 Kihdo ei pwoud kan oh nei seri kan me I papahkinuhkehr, pwe I en kohkohla. Ke ese mehlel duwen sawas me I wiahionguhkehr.”
27 Lapan eri sapengki, “I pahn koasoia met: I eseier sang nan ei kosetipw me Koht ketin kupwuramwahwihieier pwehki kowe. 28 Ke en kilelehdi dahme ei pweipwand ong uhk, I ahpw pahn pwainohng uhk.”
29 Seikop ahpw sapeng, “Ke ese duwen doadoahk me I wiahiong uhk oh duwen epwel mwahu me I wiahiong noumw mahn akan; 30 mwohn ei pwarodo met re me malaulau, a met re tohtolahr mehlel, pwehki KAUN-O eh ketin kupwuramwahwihiuk sang ni ei pwarodo. Eri met e lelehr ei ahnsoun doadoahk ong ei peneinei.”
31 Lapan eri idek reh, “A dahme I pahn katingihkin uhk?” Seikop ahpw sapeng nda, “Ke sohte pahn kihong ie mehkot, ahpw I pahn usehlahte apwahpwalih noumw mahn akan ma ke pahn mweidohng ie met: 32 I en dawih noumw mahn akan koaros rahnwet oh katohrehsang sihpw poh toantoal koaros iangahki kuht mwangerenger koaros. Ihte soangen mahn pwukat me ke pahn pwainkin ie. 33 Sang met kohla, ni omw pahn kin dawih nei mahn akan; kuht men me sohte mwangerenger de sihpw men me sohte poh toantoal, ke pahn ese me I pirapahda.”
34 Lapan eri nda, “Me pwung duwen me ke ndahn.” 35 A rahnohte Lapan ahpw katohrehsang kuht wol alahl de mwangerenger ko oh kuht lih mwangerenger oh alahl koaros me mie mwei pwetepwet rehrail; oh sihpw toantoal koaros. E ahpw kihong rehn nah pwutak ko pwe re en apwahpwalih. 36 E ahpw wahda nah pelinmeno oh kohkohla sang Seikop oh dohlahsang erein rahn siluh. Seikop ahpw apwahpwalih luhwen pelinmeno.
37 Seikop ahpw pelehdi lepin rahntuhke mour kei sang ni soangen tuhke kei, e ahpw tehrasang apali kilin tuhke ko pwe en kak mwomwen ahl pwetepwet. 38 E ahpw kauwada lepin tuhke ko wasahn nimpil en mahn ako. E kauwada lepin tuhke pwukat wasao mwohn pelinmeno, pwe mahn ako en kin kowerek ni ahnsou me re pahn kin kolahng nimpil. 39 Eri, ni mahn ako ar kin kowerek limwahn lepin tuhke ko, re kin liseianda oh naitikihada kisin kuht alahl oh mwangerenger.
40 A Seikop katohrehsang sihpw ko rehn kuht ko, e ahpw koasoanediong irail re en mihte mwohn nein Lapan sihpw me alahl oh poh toantoal ko. Ih eri pein apwalihada nah pelinmeno oh e sohte kin kapatahiong nein Lapan ko.
41 Ni ahnsou me mahn me sohte soumwahu ko kin kowerek, Seikop kin kauwada lepin rahn tuhke ko ni wasahn nimpilo, mwohn mesen mahn ako, pwe re en kin kowerek limwahn lepin tuhke ko. 42 Ahpw e sohte kin kihdi lepin tuhke ko mwohn mahn me soumwahu ko. Lapan eri kin inenehdi mahn soumwahu ko, a me kehlail ko Seikop. 43 Ih duwen Seikop eh kepwehpwehla oh nainekihla pelinmen tohto, iangahki lidu, kamel oh ahs tohto.
k30:6: DAN: Sisen ahd wet ni mahsen en Ipru ekis duwehte lepin mahsen me wehwehki “kasalehda en emen eh pwuhng.”
l30:8: NAPDALI: Sisen ahd wet ni mahsen en Ipru ekis duwehte lepin mahsen me wehwehki “uhwong oh pelian.’.
m30:11: KAD: Ahd wet, iei mahsen en Ipru me wehwehki “paiamwahu.”
n30:13: ASER: Ahd wet, iei mahsen en Ipru me wehwehki “meid pai.”
o30:14: MANDREIK: Ni ahnsowo mehn mahs ako kin kamehlele me kisin tuhke wet mehn wia wini en neitik de pil mehn mesehl.”
p30:18: ISAKAR: Sisen ahd wet ekis duwehte lepin mahsen en Ipru me wehwehki “emen me pwaindahr” oh pil lepin mahsen me wehwehki “mie keting.”
q30:20: SEPULON: Sisen ahd wet ekis duwehte sisen lepin mahsen en Ipru me wehwehki “kisakis.”
r30:24: SOSEP: Sisen ahd wet ekis duwehte lepin mahsen en Ipru me wehwehki “en pil kihdo” oh pil lepin mahsen me wehwehki “e kihsang.”