en Wahnpoaron ko
Oaralap en Pwuhk wet
Pwuken Wiewia kan en Wahnpoaron ko, iei usepen Rongamwahu en Luk. Iei kahrepe keieu kesempwal en pwuhk wet, pwe en kasalehda duwen Ngehn Sarawi eh kaweidki irail ko me tepin idawehnla Sises nan mwomwohdiso ni arail kalohkiseli Rongamwahu duwen Sises “nan Serusalem, nan Sudia pwon, oh Sameria, oh lelohng ni irepen sampah” (1.8). Eri, iei koasoiepen mwekid en souleng nin duwen eh tepida rehn mehn Suhs ako, e ahpw wiahla pwoson en sampah pokon. Sounnting en pwuhk wet pil ngoangkihte kawehwehiong aramas en ahnsowo me mwekid en souleng wet kaidehkin ehu soangen lamalam keper me uhwong wehin Rom, ahpw mwekid en pwoson en souleng ehu me pwilsang oh kaunsekihala palien lamalam en mehn Suhs ako.
Wiewia kan kak pwalpeseng wiahla pali siluh nin duwen koasoiepen mwomwohdiso nan wasa kan me Rongamwahu duwen Sises parpeseng oh lohkseli ie: 1) tepin mwekid en souleng nan Serusalem mwurin Sises eh ketidahla nanleng; 2) duwen parpeseng en mwekid wet wasa teikan en nan Palestin; oh 3) pil duwen eh parpeseng nan wehi kan limwahn Sehd Mediderenien, lellahng nan Rom.
Mie mehkot me inenen sansal mwahu nan pwuken Wiewia kan; eri, iei doadoahk en Ngehn Sarawi me tiada ni roson lapalahpie pohn me pwoson akan nan Serusalem ni rahnen Pendekos, oh uselahte kaweid oh kakehlaka tohn mwomwohdiso oh arail sounkaweid kan ni wiewia kan koaros me audedahr pwuhk wet. En tepin souleng ko ar mahsen kan ong tohn sampah miher ni oaralap nan kapahrek kei, oh wiewia kan me sansal nan pwuken Wiewia kan kadehde duwen roson en mahsen pwukat nan mouren me pwoson ko oh ni minimin en tohn mwomwohdiso.
Audepe ni Oaralap Kaunopadahn wia sounkadehde 1.1-26
a. Kaimwiseklahn kosonned en Sises oh sapwellime inou 1.1-14
b. Wiliepen Sudas 1.15-26
Doadoahk en sounkadehde kan nan Serusalem 2.1—8.3
Doadoahk en sounkadehde kan nan Sudia oh Sameria 8.4—12.25
En Pohl eh doadoahk 13.1—28.31
a. Seiloak keieun lohkiseli Rongamwahu 13.1—14.28
b. Wie kupwur nan Serusalem 15.1-35
c. Seiloak keriaun lohkiseli Rongamwahu 15.36—18.22
d. Seiloak kesiluhn lohkiseli Rongamwahu 18.23—21.16
e. Pohl nan kalapwus en Serusalem, Sesaria oh Rom 21.17—28.31
1
1 Maing Diopwulos:
Nan ei tungoal pwuhk keieu I ntingihedier duwen soahng kan koaros me Sises ketin wiadahr oh mahsaniher, sang ni ahnsou me e ketin tapihada sapwellime doadoahk, Luk 1.1-4. 2 lao lel rahn me e ketidahla nanleng. Eri, mwohn eh ketidahla, e ketin wiahiong irail kehkehlik kei sang ni manaman en Ngehn Sarawi, ong ohl ako me e ketin piladahr pwe re en wia sapwellime wahnpoaron. 3 Nan irair en rahn pahisek mwurin Sises eh ketin pwoula, pak tohto e ketin kasalehiong irail pein ih me e ketin ieias sang ni kadehde sansal kei. Irail pil kilangehr, oh e ketin mahmahsenkihong irail duwen Wehin Koht. 4 Eri, ni ahnsou me irail pokonpenehr, e ketin mahsanihong irail, “Kumwail dehr kohsang nan Serusalem, ahpw kumwail awiawihete me Semei ketin inoukidier, me I padahkihongkumwailehr duwe. Luk 24.49. 5 Pwe Sohn papidaisihkinkumwailehr pihl, ahpw mwurin rahn ekei kumwail pahn papidaiskihla Ngehn Sarawi.” Mad. 3.11; Mark 1.8; Luk 3.16; Sohn 1.33.
Sises Ketidahla Nanleng
6 Eri, ni wahnpoaron ako ar pokonpenehr rehn Sises, re ahpw patohwan idek, “Maing, ia duwe, ih ahnsou kiset me komw pahn ketin kapwurehda Wehin Israel?”
7 Sises eri ketin sapengkin irail, “Ahnsou kan oh irair kan koasoandier rehn Semei sang pein sapwellime manaman, ahpw e sohte mweiong kumwail en ese ahnsou me mepwukat pahn wiawi. 8 Ahpw kumwail pahn audaudkihda manaman ni ahnsou me Ngehn Sarawi pahn ketidohng kumwail, oh kumwail ahpw pahn kadehde ie nan Serusalem, nan Sudia pwon, oh Sameria, oh lelohng ni irepen sampah.” Mad. 28.19; Mark 16.15; Luk 24.47-48. 9 Mwurin eh mahsanih mepwukat, e ahpw ketidahla nanleng; oh ni arail uduhdiahl, pelien depwek pali ahpw karirihala sang irail. Mark 16.19; Luk 24.50-51.
10 Ni arail uduhdiahl Sises eh ketiket kohdahla, ohl riemen me likou pwetepwet pa kesihnenda limwarail. 11 Ira ahpw patohwan, “Kumwail mehn Kalili, dahme kumwail kesikesihnenki men kilikilengdalahng nanleng? Iei Sises menet me ketidalahr nanleng sang kumwail pil pahn sapahldohng kumwail ni soangen mwohmwette me kumwail patopatohwanehr.”
Wiliepen Sudas
12 Eri, wahnpoaron ako ahpw pwuralahng Serusalem sang nin Nahnahn Olip, me kereniong elep en mwail dohkihsang kahnimwo. 13 Irail eri pedolong nan Serusalem oh kohdalahng nan perehn powe, wasa me re kin koukousoan ie: Piter, Sohn, Seims, oh Andru, Pilip oh Tomas, Pardolomiu oh Madiu, Seims nein Alpius, Saimon me iang tohn pwihnen Selod, oh Sudas nein Seims. Mad. 10.2-4; Mark 3.16-19; Luk 6.14-16. 14 Irail pwukat ahpw wiahki ehu ni poaden kapakap, iangahki lih ako, oh Mery inen Sises, oh rie ohl ako.
15 Mwurin rahn ekei, me pwoson kan ahpw pokonpene, irail koaros kereniong me epwiki riehk. Piter ahpw uhda oh patohwanohng irail, 16 “Riei ko, mahsen en Pwuhk Sarawi uhdahn pahn pweida, me Ngehn Sarawi ketin kalokaiahki Depit ni eh kohpadahr duwen Sudas, me kahluwaier irail ko me salihedi Sises. 17 Sudas kisehtail, pwehki eh pilipildahr en iang pwaisaneki atail doadoahk.”
( 18 Mwohni me Sudas alehkihdi eh wiewia suwedo, e pwainkihda sahpw ehu, wasa e pwupwudi ie, pospeseng oh mehla; eri, kanengen kapehde koaros wudekieisang. Mad. 27.3-8. 19 Eri, aramas koaros me koukousoan Serusalem rongehr duwen met, oh ni pein arail lokaia re kahdaneki sahpw wet Akeldama, me wehwehki “Sapwen Nta.”)
20 “Pwe e ntingdier nan pwuken Melkahka Kan,
‘Imwe en tehnla;
dehr mweidohng emen en kousoan loale.’
E pil ntingdier,
‘Emen tohrohr en wiliandi oh ale pwais doadoahk wet.’ Mel. 69.25; b Mel. 109.8.
21-22 “Eri, emen ohlen uhdahn pahn pilipilda oh iangkitala, pwe en iang kadehde iasadahn Kaun Sises. Eri, ohl menet en sangete nanpwungen irail me wiahier kisehn pwihn wet nan irair en ahnsou me Kaun Sises ketiketseli rehtail, sang ni ahnsou me Sohn kawekawehwe wehwehn eh papidais lao lel ni rahn me Sises ketsang kitail oh ketidalahng nanleng.” Mad. 3 16; Mark 1.9; Luk 3.21; b Mark 16.19; Luk 24.51.
23 Irail eri kalangahda mwaren ohl riemen: Sosep me pil mwarenki Parsapas (e pil adaneki Sustus), oh Madaias. 24 Irail eri kapakap, patohwan, “Maing, komwi me ketin mwahngih mohngiong en aramas koaros. Eri, komw ketin kasalehiong kiht ihs rehra me komw ketin piladahr, 25 me pahn ale eh tungoal pwais doadoahk en wahnpoaron me Sudas keselahr pwe en patolahng wasa me uhdahn eh tungoal.” 26 Eri, mwurin mepwukat irail ahpw usuhski mwar riau wet pwe re en pilada sang nanpwungen ira riemenet. Eri, mwar me pilipildahr iei Madaias; e ahpw kapatapatohng wahnpoaron ehk emeno.
1:1: Luk 1.1-4.
1:4: Luk 24.49.
1:5: Mad. 3.11; Mark 1.8; Luk 3.16; Sohn 1.33.
1:8: Mad. 28.19; Mark 16.15; Luk 24.47-48.
1:9: Mark 16.19; Luk 24.50-51.
1:13: Mad. 10.2-4; Mark 3.16-19; Luk 6.14-16.
1:18: Mad. 27.3-8.
1:20: Mel. 69.25; b Mel. 109.8.
1:21-22: Mad. 3 16; Mark 1.9; Luk 3.21; b Mark 16.19; Luk 24.51.