Nein Pohl Kisinlikou Keieu ong Mehn Deselonika
Oaralap en Kisinlikou wet
Deselonika kahnimw ehu me poahsoan kaunen wehin Masedonia, me kisehn wehin Rom. Pohl kauwada mwomwohdiso ehu wasao mwurin eh mweselsang Pilipai. Ahpw mie mehn Suhs kei me kin uhwong Pohl. Re kin peiriniong Pohl pwehki eh doadoahk laud en Rongamwahu eh inenen pweida mwahu rehn mehn liki kan me men iangala palien lamalam en mehn Suhs. Ihme Pohl pekeuskihsang wasao, oh e ahpw kohkolahng Peria. Mwuhr, ni eh lel Korint, e ahpw ale rohng duwen iren mwomwohdisohn Deselonika sang rehn eh werek oh kompoakepah Timoty.
Nein Pohl kisinlikou keieu ong mehn Deselonika ntingdier pwe en koangngoangehda oh kakehlahda souleng en wasao. E kapingkalahngki rohng me e aleier duwen ar pwoson oh limpoak; e katamankin irail duwen soangen mour me e wiahier nindokon eh koukousoan rehrail, oh e wia pasapengpen ire kei me pwaradahr nan mwomwohdiso duwen keriapak en ketidohn Krais: duwen ma souleng men me melahr mwohn sapahldohn Krais, e pil pahn iang ahneki mour soutuk me sapahldohn Krais pahn kahrehdo? Oh iahd me Krais pahn ketin sapahldo? Pohl eri isaneki padahkihong irail re en uselahte ar doadoahk en souleng oh kasikasik ni koapworopwor mehlel ketido sapahl en Krais.
Audepe ni Oaralap
Tepin kisinlikou 1.1
Kasapahlkalahngan oh kaping 1.2—3.13
Koangngoangpen mouren souleng mehlel 4.1-12
Padahk duwen ketidohn Krais 4.13—5.11
Kaimwiseklahn peneu kan 5.12-22
Kaimwiseklahn kisinlikou 5.23-28
1
1 Sang Pohl, Sailas, oh Timoty— Ong tohn mwomwohdisohn Deselonika, me Koht Sahm oh Kaun Sises Krais kin ketin sapwellimaniki:
Kalahngan oh popohl en ieiang rehmwail. Wie. 17.1.
En mehn Deselonika Mour oh Pwoson
2 Se kin poaden kapingkalahngankihong Koht pwehki kumwail koaros, oh kin kalap tamankumwailda nan at kapakap akan. 3 Pwe se kin tamanda, mwohn silangin Samatail Koht, duwen amwail kin doadoahngki amwail pwoson, oh duwen amwail limpoak me kin kahrehiong kumwail doadoahk laud, oh pil duwen amwail tengediong nan amwail koapworopworki atail Kaun Sises Krais. 4 Riat souleng ko, se ese me Koht ketin loalloalei kumwail oh ketin pilkumwailda pwe kumwail en wiahla sapwellime. 5 Pwe se kalohkiwohngkumwailehr Rongamwahwo, kaidehn ni lokaiahte, ahpw ni manaman oh ni Ngehn Sarawi, oh pil ni at kamehlele unsek en me mehlelo. Kumwail ese duwen at mour ni at mihmi rehmwail, pwe e wia kamwahupamwail. 6 Kumwail kahlemengih kiht oh pil Kaun-o, oh mehnda ma kumwail alehki lokolok laud, ahpw kumwail perenkihda ale mahseno; eri, peren me kin sang rehn Ngehn Sarawio. Wie. 17.5-9. 7 Eri, kumwail wialahr mehn kahlemengi ehu ong souleng koaros nan wehin Masedonia oh Akaia. 8 Pwe sang rehmwail me mahseno kaparaparkipesengier, kaidehk ongete Masedonia oh Akaia, pwe wasa koaros koasoiepen amwail pwoson Koht pil lolohkselier. Eri, sohte kahrepen at pahn koasoia duwen met. 9 Souleng koaros kin koasoakoasoia duwen amwail kasamwoi kiht ni at pas rehmwail, oh duwen amwail sohpeisangehr dikedik en eni kan oh sohpeiongehr Koht, pwe kumwail en papah Koht mehlel oh ieias, 10 oh duwen amwail kin kasikasik ketidohn Sapwellime Iehros sang nanleng—Sapwellime Iehros Sises, me e ketin kaiasada sang mehla, oh me pahn kapitkitailla sang engieng en Koht me pahn pwarodo.