1 Wa la'at'uycha wilhchani ists'an'ay para kachilhcha ixpaku paxku chi ixk'atan pan yu jantu lhiyalh lhamaskajan. An xalaj'ajin sacerdotejnin chi an xamaestrojnin lhamap'a'sin ixtalhipuxkawniycha tani katalhi'o'xcho'och'apayawlhcha an Jesús, para li katama'nilhcha. 2 Chi ixtalajuniy:

―Tukan laka k'atan jantu, para li jantu kach'ilili talaknawlh an lapanakni.

3 Pero an Jesús, la'acha'an Betaniaja ixt'awnachalh, la ixcha'a Simón, yu ixlakap'uch'i'ojota la ixts'its'i, sa' ixwilh laka mesa. Walh cha'alh pumatam t'aku ixli'anta la'atam lhaklhi perjume la xafrasco sawalh k'usi, yu wanaj la'lhuw, a't'olhicha chi ukmuk'alhcha an Jesús. 4 Walh an ali'in talhitalh'amalh, tanajun:

―¿Tasu li wa lhitama'chapuycha an perjumeje? 5 Yucha layi ixlist'akalh tacha lhajay pumatam lapanak la'at'utu ciento wilhchan chi ixjamala'pitsinikalhcha an jakilhpatinin.

P'ulu p'ulucha ixtalhichiwiniya an t'aku'. 6 Pero an Jesús jajuniy:

―K'amak'a'unt'itcha. ¿T'asu li ma'ach'ap'uyatcha?, li mu yucha oxi tacha an ki'ilhtulh. 7 Uxitnan lhilhiji k'ajat'a'aklats'uk'uya'it'it an jakilhpatinin, layi k'ajaxt'a'niya'it tu'u akxni jaxt'a'nip'ut'unat'it, pero kit'in jantu lhilhiji akintilat'a'aklatsukuw. 8 Ani t'aku ilhtulhcha yu lay, mu la'asiyaj kilakamuk'alhcha an perjume para li akxni akimaknukana'. 9 Ani sawalhi an yu klajunaw, watanchuncha kalhichiwinkana ani laj'oxi chiwinti, chux lakamunulhpa, wachu kalhichiwinkana an yu ilhtulh ani t'aku', para li kalhipastakkalh.

10 Wachuncha an Judas Iscariote, xapumatam an ixpumakawt'uyk'an ixt'alhtanan an Jesús, jala'alhi an xalaj'ajin sacerdotejnin, chi jajuniycha li kajama'axta'niya an Jesús. 11 Pus yu'uncha akxni ta'alha'asmatlhi talaj'achalhcha, chi tajuniy li kataxta'niya tumin. An Judas ixlipuxkawniycha tani kalhima'axta'lhicha an Jesús.

12 Xlila'atamcha wilhchan ixk'atan pan yu jantu lhiyalh lhamaskajan, akxni ma'nikancha jas'at'a borrego para paxku, an ixt'alhtanan an Jesús tajuniy:

―¿T'anisch'a lak'ask'in ak'aw jala'oxinin para li k'awaycha laka paxku?

13 Pus yucha jamala'achalhcha ixt'uyunk'an ixt'alhtanan, jajuniy:

―K'ap'inchi'it an la'acha'an, ch'i k'ap'axt'o'a'it pumatam lapanak yu lhi'anta ixkan la ix'uyuli', k'ach'a'o'aya'it. 14 Tan katanuyanta k'a'una'it an yu jamacha'a lapanak: An maestro najun: “¿Tanischa laka cha'a tan ajkat'alakwayna an kint'alhtanan ixlakata Paxku?” 15 Yucha katamasuniyan pulaktam aya cha'a talhman ixlitala't'uycha, sawalhcha oxi ilhtukanta, anch'ach'a k'ajala'oxinina'it para kitnan.

16 Pus ta'alhcha an ixt'uyunk'an ixt'alhtanan. Tacha'alhcha an la'acha'an, walh tala'cha'alhcha an lapanak, tacha an ixjajunita an Jesús, chi tamala'asijnilhcha ancha ixlakata an paxku. 17 Akxni taputs'isilhcha jat'acha'alhcha an ixpumakawt'uyk'an ixt'alhtanan, 18 chi talaktawilhcha, tsukulhcha talakwajini an laka mesa, walh an Jesús jajuniy:

―Sawalhi ani yu aklajunaw, xapumatam yu uxitnani akima'axt'a'a', yu wachu kint'alakwayt'ajun.

19 Wachuncha tsukulhcha tala'ta'oxila'alhiy, chi atamj atamjcha talhisakmiy, tajuniy:

―¿Kit'in sna'?

20 Yucha jajuniy:

―Xapumatam uxitnan ani mimpumakawt'uyk'an, yu kint'atamaj'oy laka pulatoj. 21 Sawalhi li an isTs'alh Lapanak ts'ajwi ti'an, tacha an lhits'o'muk'akanta, pero an lapanak an yu kama'axt'a'a an isTs'alh Lapanak kapulhik'atsaya'. Yucha palay oxi jantu ka'istsukulh.

22 Chi ixtalakwayt'ajunka, an Jesús xa'a'ilh a'xtam pan, xta'lhicha lhimala'puchajun chi la'ch'e'elhcha, jala'xta'nilhcha, jajuniy:

―K'a'utcha, ani kilakatunaj.

23 Chi xa'a'ipalh vaso yu ixputajun xaxkan uva, wachu xta'palhi lhimala'puchajun, chi jaxta'nilhcha, tapulaj'otlhicha ixchuxk'an. 24 Jajuniy:

―Ani kijak'alhni, yu sast'icha putamakawkan li ixluwk'ani ijkalhimaj'an kijak'alhni an tacha t'awkan. 25 Kit'in klajunaw yu sawalh, jantu ali akti'otlhi an xaxkan uva, sta akxni akcha'ana an tan ch'alhkatnan Dios, akxni ak'otcho'oya yu sast'i.

26 Akxni talakmilhpa'olhcha la'atam milhpat, ta'alhcha an a'stitawk'a tan junkan Laka Olivojnin. 27 An Jesús jajuniy:

―Chaway ani jata'oxana wanaj akilamakaw'oyaw, mu ts'o'muk'akanta an la ixchiwinti Dios tan najun: “Akma'niya an yu jalhist'ak'a ixborregojnin, chi an ixborregojnin wanaj tilh katata'a'pitsi'oya'.” 28 Pero akxni akla'awcho'oya kit'ini aklatap'ulhniyaw ak'ana xalakaat'un Galilea.

29 Wachuncha an Pedro juniy:

―Masi katamakaw'ojon, kit'in jantu.

30 Pus an Jesús juniy:

―Kit'in sawalhi yu ijkunan, ani katats'isiya akxni jantuka' a't'uy t'asay puyux, a't'utu k'anawna'a li jant'u k'imisp'ay.

31 Pero yucha ali juniy:

―Masi k'ama'nik'a chi kit'in wachu, jantu aktimakajun.

Chi an ali'in wachu chuni tajunilh.

32 Wachuncha ta'alhcha tanchun tan jalakch'ananankanta tan junkan Getsemaní, jajuniy an ixt'alhtanan an Jesús:

―K'alakt'awlatka ani, kit'in ikti'an tapaynini'.

33 Ja'aylhi'alhcha an Pedro chi an Jacobo chi an Juan, walh tsukulhcha ta'oxila'alhiy. 34 Jajuniy:

―Sawalhcha ta'oxila'alhiya an kintak'atsan, wa tacha akniyacha ijk'atsan. Akilapakxaw ani, jant'u k'alaklht'at'at'it.

35 Lanancha ma'ati alh, lilijcha tatso'ottalh chi tamuntitachalhcha, tsukulhcha tapayniy, najun li sna ma layi kamala'pusunikalh an makxkay panch'e'ex yu ixmininita akxni. 36 Najun:

―KimPay, kimPay, uxint'i jantu tu'u yu jantucha lay k'a'ilht'u. Ak'imala'xt'inunini ani ay lhima'alh'ajna, pero yu tacha uxint'i lak'ask'ini kawalh, jantu yu tacha kit'in iknajun.

37 Walh akxni jala'cha'ancho'olh an ixt'alhtanan, ixtalaklhtatanancha, pus juniy an Pedro:

―Simón, ¿lht'at'ay? ¿Jantu layi masi wa tamcha hora ak'int'a'alhk'ujt'i? 38 K'ak'ujt'it ch'i k'at'ap'aynit, para li jant'u k'alhila'ts'int'anuk'ant'it li k'a'ilht'up'ut'ut yu jantu oxi. Mu an takuwin yucha ilhtuputuni yu oxi, pero an lakatunaj yucha yu jantu k'ut'ilh.

39 A'tam ampalhi tapaynini an Jesús, wanajcha chuni nawpalh tacha an ixnajuntacha p'ulhnaj. 40 Walh a'tamcha ixtalaklhtatanampalayi an ixt'alhtanan akxni jala'cha'ancho'opalh, mu wa sawalhcha ixjala'cha'an ilhtatapututk'an, chi jantucha ixtak'atsay tani katajunilhcha an Jesús. 41 Ixli'a't'utucha jala'cha'alh jajuniy:

―¿Jast'aknant'awnatka ch'i laklht'at'ayatka'? Chilhcha panch'e'ex, an isTs'alh Lapanak kama'axta'kanacha la xmaknik'an an la'ma'lhta'alhinin. 42 K'alaj'ost'ayatcha, ka'awcha, jo' mintacha an yu akima'axt'a'a'.

43 Ixchiwint'ajunka an Jesús, la'cha'alhcha an Judas, xapumatam an ixpumakawt'uyk'an ixt'alhtanan, ts'ananacha tat'acha'alhi ali'in lapanakni, ixtalaklhi'antacha ix'espadajk'an chi ixk'iwk'an. Yu'uncha an xalaj'ajin sacerdotejnin chi an xamaestrojnin lhamap'a'sin chi an laktatanini ixtamala'achata. 44 An ja'o'xcho'onuj Judas la'asiyaj ixjajunitacha tani kajapumasuniyacha, ixjajunita:

―Yucha an akla'xtikilhtast'uk'a yu Jesús, k'ach'ap'ayawya'itcha chi k'alhip'ina'itcha.

45 Pus akxni la'cha'alhcha, juniy:

―Maestro, maestro.

Chi la'xtikilhtastuklhicha.

46 Wachuncha t'o'cha tala'alhi an Jesús chi tach'apayawlhcha. 47 Pero pumatam yu ancha ixma'yalh, xtalaj xa'axtulhi an ix'espada, xtalh akatuch'uk'up'uxli an ixma'tsuku xa'ay sacerdote. 48 Chi an Jesús jajuniy:

―Wa t'ach'a wa p'uxk'awyatcha ja'alhawna t'ant'at li kilach'apayawputunaw, laklhit'ant'atcha mi'espadajk'an chi mink'iwk'an. 49 Lhilhiji xaklala'cha'anaw xakmasuy an laka ay tajtan, walh akxni jantu kilach'apayajuw, pero wa xliyu li chuncha kajuna tacha an ts'o'muk'akanta la ixchiwinti Dios.

50 Wachuncha tamakaw'olhi an ixt'alhtanan an Jesús, talakats'alalhcha.

51 Pero pumatam ts'alh ch'a'o'alhi'alh, ixla'axt'a'kanta laka sábana, walh tach'apayawlh, 52 pero ayputaxtumakawlhi an sábana, ix'alhalhanti osli.

53 Talhicha'anilhcha an Jesús an yu tukancha xa'ay sacerdote, pus anchacha tata'ayxto'olh an ali'incha xalaj'ajin sacerdotejnin, chi an laktatanin, chi an xamaestrojnin lhamap'a'sin. 54 An Pedro wa ma'atcha ixch'a'o'alhi'anta sta ixpulakni an tan jalhi'ay la ixjatalakxtut an tukancha xa'ay sacerdote, chi ixjat'ala's'onwilhcha an yu ixtajalhistaknan laka tajtan. 55 Walh an xalaj'ajincha sacerdotejnin chi ixchuxk'ancha an yu ancha ixtatanumanalh, ixtalhipuxkawniycha tani katalhima'nilhcha an Jesús, pero jantu tu'u ixtala'cha'aniniy yu jantu oxi. 56 Mu ixluwk'ani yu ixtalhimuk'ay yu jantu sawalh, pero tacha an ixtalhimuk'ay jantu wa tami ixtanajun. 57 Wachuncha ali'in tatayalh, talhimuk'alhcha yu jantu sawalh, tanajun:

58 ―Kitnan ik'alha'asmattawi tan najun: “Aklakt'ilhiya ani ay tajtan yu wa laka maka yawkanta, chi ixlila'at'utu wilhchan akla'oxicho'oya yu jantu wa laka maka yawkan.”

59 Pero masi chuncha jantu wa tami tacha an ixtalhimuk'ay. 60 Pus an tukancha xa'ay sacerdote japujatayalhi ixtan'ajnik'an, chi lhisakmiycha an Jesús, juniy:

―¿Jant'u t'u'u k'at'ija'alht'ayan? ¿Tisuncha tacha ani talhimuk'ayani?

61 Yucha jantu ja'alhtayanalh. An tukancha xa'ay sacerdote a'tam lhisakmipalh, juniy:

―¿Uxint'i yu Cristo, isTs'alh Dios?

62 Pus an Jesús alhtaylh juniy:

―Chun, kit'in. Chi kit'in yu ikminta juna wa tacha isTs'alh Lapanak akilala'ts'inawi akxni akpiktutawlanta an kimPay tan ch'alhkatnan, chi akxni akminanta an lakt'iyan laka jataputs'i.

63 Wachuncha an tukancha xa'ay sacerdote, la'lh'alhi an ixla'ch'it wa xliyu talh'amalhcha, chi najun:

―¿Tisu wa tiyuchacha ali ma'lhtask'iniyaw ali akintajunini? 64 Alha'asmat'at'itcha tacha an wa aya juniy Dios. ¿T'asuch'a nawnat'iti?

Pus ixchuxk'ani talakt'asa'olh, tanajun li ma kama'nikalhcha.

65 Tsukulhcha tala'achujwayi an ali'in, chi tala'puch'ilhcha, ixtalakasamaycha, ixtajuniy:

―¡K'alhajachicha tichini muk'anincha!

Chi an yu ixtajalhistaknan laka tajtan wachucha lo's lo's ixtala'xtisay.

66 An Pedro talaktsini ixt'awnachalh tan jalhi'ay, walh cha'alh pumatam t'aku ixma'tsuku an xa'ay tukan sacerdote, 67 pus la'ts'incha tan is'onwilh an Pedro, chi juniy:

―Uxint'i wach'u anch'a ixt'a'aklat'a'un an Jesús yu jamacha'a Nazaret.

68 Yucha najun ma jantu, najun:

―Jantu ijk'atsay t'uch'ini uniycha, kit'in jantu ikmispay.

Walh taxtulh an tan putanukanachalh, asmat'a t'asaycha an puyux. 69 Walh an t'aku a'tam sa' la'ts'impalayi an Pedro, pus jalakjuniycha an yu ancha ixtat'ajun:

―Ani wachu de yu'uncha.

70 Pero an Pedro a'tam nawpalay ma jantu sawalh. Pants'ik'ischa walh, an yu ancha ixtat'ajun a'tamcha tajumpalayi an Pedro:

―Chun sawalh, uxint'i de yu'uncha, mu uxint'i jamacha'a Galilea, ch'i wach'u ch'uni ch'iwiniy.

71 Pus akxni tsukulhcha wa aya najun, chi ixnajuncha li ma sawalh:

―Jantu ikmispayi an lapanak yu lhich'iwinat'it.

72 Walh t'asalhcha an puyux ixli'a't'uycha, wachuncha pastaklhicha an Pedro tacha an ixjunita an Jesús: “Jantuka' a't'uyi katit'asalh an puyux, a't'utucha k'anawna'a li jant'u k'imisp'ay.”

Pus sa'cha lhatapastaknani an Pedro, tsukulhcha alhun.