1 La'atam wilhchan wanajcha lhilhuwi ixjumpalhkanta, walh jantu tu'u yu kati'ukalh, pus an Jesús jajuniy an ixt'alhtanan:

2 ―Ijkamapayniya ani lapanakni, mu la'at'utucha wilhchani kintala'chinta chi jantu tu'u yu katita'ulh, 3 li wachunchacha ajkamala'achacho'oya ixcha'ak'an katala'awitijtayaya laka tij, mu ali'in ma'ati tamintachalh.

4 An ixt'alhtanan an Jesús tajuniy:

―¿Pero tanischa lay xamati kaja'inilh pan ani li jantu xamati wilhi?

5 Pus an Jesús jajuniy:

―¿Tasu a'xchuxcha pani lhit'ant'at'it?

Yu'uncha tajuniy:

―A'xtujun.

6 Pus wachuncha an Jesús jajuniy tacha an ts'anaks ixta'ayxto'nun li katalaktawilhka an lakaat'un, chi yucha xa'a'ilhcha an a'xtujun pan, chi xta'nilhcha lhimala'puchajuni an Dios chi la'ch'e'elhcha, xli'astan jaxta'nilhcha an ixt'alhtanan, chi yu'uncha tamala'pitsilhcha. 7 Wachu ixtalhi'anta lakats'uniy lakt'ikt'i jatanti, an Jesús wachu lhixta'palh lhimala'puchajun chi jamamala'pitsinilhcha wachu an ixt'alhtanan.

8 Ixchuxchak'ani talak'ulh chi talhikiklalhcha. Ixli'astan la'atujun kanastaja tapusakcho'olh yu wa lakt'ikt'icha xaxajni. 9 An yu talakwaylh lapanakni ka tacha la'at'at'i milh. Xli'astan an Jesús jala'axa'alalhcha an lapanakni chi talak'ancho'olhcha. 10 Chi an Jesús jat'atajulhcha laka barco an ixt'alhtanan, ta'alhcha xalakaat'un Dalmanuta.

11 Tala'cha'alh an fariseojnin an Jesús, tsukulhcha tat'alakikxtukuy, tajuniy ma kajamasunilh tu'u an lakt'iyan para li ma katakiklaka'ilh. 12 Pus an Jesús jama'aninilh la ixta'oxila'alhit, najun:

―¿Tasu li talakask'incha kajamasunikalh tu'u ani lapanakni? Chaway sawalh klajunaw jantu tu'u katijamasunikalh an yu chaway tat'ajun.

13 Pus tajupalhi an laka barco an Jesús, jamakawyawlhcha. An ixtapiktutamcha lakxkani alh.

14 Walh takaplhi li katalhi'alh pan, wa a'xtam pani ixtalhi'anta an laka barco. 15 Chi jajuniy an ixt'alhtanan an Jesús:

―K'ajalajk'ats'anant'iti li jantu katamatsaman an ixlamaskajank'an an fariseojnin chi an ixlamaskajan Herodes.

16 Pus yu'uncha ixtalalhisakmipaxaycha li sna xliyu li jantu tu'u ixtalhi'anta pan. 17 Chi mu jalhimacha'xaniycha an Jesús, pus jajuniy:

―¿Xliyu li jant'u lhit'ant'at pani lhilakch'iwininat'it? ¿Ch'unt'u lhimach'a'xayat'it, sawalhka lakt'ak'alha mijalhunutk'an? 18 Masi li lhit'awnat'iti mi la'chulhk'an, ¿jant'u jalak'awananat'it? Chi masi li lhit'awnat'iti mi a'ax'olhk'an, ¿jant'u ja'asmatnanat'it? ¿Jant'u p'ast'ak'at'iti 19 akxni an kla'puch'e'elh a'xkisi pan, chi ijkamawalh la'akisi milh lapanakni? ¿Tasu la'achuxcha kanastaja a'tsamcho'olh an xaxajni yu p'usakch'o'ot'iti?

―La'akawt'uy canasta, ―tajuniy.

20 ―Chi akxni ijkamawalh a'xtujun pan la'at'at'i milh lapanakni, ¿tasu la'achuxcha canastaja a'tsamcho'olh an xaxajni yu p'usakch'o'ot'iti?

―La'atujun canasta, ―tajuniy.

21 Pus an Jesús jajuniy:

―¿Ch'i t'asuch'a li jant'uch'a lay lhimach'a'xayat'iti?

22 Tacha'alhcha la'acha'an Betsaida an Jesús, walh talhicha'anilh pumatam la'lhtuluw lapanak. Tatapayniniycha li kalakpach'apalh. 23 Pus an Jesús ma'ch'apachalhi an yu wa la'lhtuluw, mala'xtinulhcha an la'acha'an. La'puchujwalhcha chi lakpuch'apalhcha, xli'astan lhisakmiycha li laycha tu'u la'ts'in. 24 Yucha jalakawanalh, najun:

―Wa tacha wa k'iwi ijkala'ts'in an lapanakni, pero talakjalhtanan.

25 Pus a'tam lakpuch'apapalhi an Jesús, oxicha malakawanilh, tala'pu'oxilhcha, ma'atcha ixlakacha'an chi oxicha ixjala'ts'in'ojoy. 26 Walh mala'achalhcha ixcha'a juniy:

―Jant'u k'ap'it'i an la'acha'an ch'i jant'u xamat'i ka'un.

27 An Jesús chi an ixt'alhtanan ta'alhcha an lakt'ikt'i la'acha'anaxni lhila'acha'an Cesarea de Filipo. Walh laka tijcha jalhisakmiycha an ixt'alhtanan an Jesús, jajuniy:

―¿An lapanakni tisi kit'incha tanajuni?

28 Yu'uncha ta'alhtaylh, tajuniy:

―Ali'in tanajun ma jama'paxanaj Juank'at'i, ali'in ma Eliask'at'i, chi ali'in tanajun ma xamaticha yu wachu lhichiwiniy ixchiwinti Dios.

29 Wa chuncha yucha jajuniy:

―¿Chi uxitnan, tisi kit'inch'a nawnat'iti?

An Pedro alhtaylh, juniy:

―Uxint'i Cristojk'at'i.

30 Pus an Jesús jajuniy:

―Jant'u xamat'i k'a'unit'it.

31 Tsukulhcha jajuniya li an isTs'alh Lapanak kastak ma'alh'ajnana'. Li jantu katitala'ts'imputulhi an laktatanin, chi an xalaj'ajin sacerdotejnin chi an xamaestrojnin lhamap'a'sin. Jajunilhi li katama'niya', pero li ixlila'at'utu wilhchan kala'awcho'oya'. 32 Ts'ajwi ixjajuniy. Walh an Pedro aylhi'alh tan wa ix'akstu an Jesús, chi tsukulhcha juniya li jantu chuni kanawlh. 33 Pero an Jesús tala'asp'itlhi chi sa'cha jala'ts'ini an ali'in ixt'alhtanan, pus la'a'aymalhcha an Pedro, junkan an Pedro:

―¡K'a'ost'i la ki'ukxlakapu'u Satanás!, mu uxint'i jant'u lhak'ap'up'ini yu ix'anu Dios wa yucha an ixjatapast'ak'atk'an lapanakni lhak'ap'up'in.

34 Wachuncha an Jesús, jaxa'alalhi an lapanakni chi an ixt'alhtanan, chi jajuniy:

―Li xamati kint'alhtana jumputun, kamakawlhcha yu wa ixjatapast'ak'atcha, kaxa'a'ilhcha ixcruz yu lay kapuma'nikalh chi akinch'a'o'alhcha. 35 Mu yu kama'alhtaxtuputuna ixjatsukunti, kama'ats'an'aya', pero yu kama'ats'an'aya ixjatsukunti kilakata chi ixlakata an ixchiwinti Dios, kama'alhtaxtuya'. 36 Jantu tani lhila'an masi wanajcha amaj ix'anu kajun'olh an lapanak an lakamunulhpa', li kama'ats'an'alh an ixjatsukunti. 37 ¿Tasucha lay kalhila'cha'ancho'oya ixjatsukunti? 38 Ani lapanakni yu chaway tat'ajun ta'ilhtuyi ixtala'alhink'an chi jantu ta'ilhtuyi yu sawalh. Yu kint'amaxanani kit'in chi an kinchiwinti, kit'in isTs'alh Lapanak wachu akt'amaxanana akxni akmina la ix'alhp'asninti an kimPay ali an ix'angelhnin yu la'stalan'an.