1 Jantu la'alhuw wilhchani ixtaxtuta an Jesús, xli'astan cha'ancho'olhcha la'acha'an Capernaúm, walh watukan lajk'atsakalhi li ma cha'ancho'otacha. 2 Pus watukan lhuwi tata'ayxto'lhi, jantucha ixtalhilayi masi wa jatalakxtutcha, chi ixjalhixa'alaycha an ixchiwinti Dios an Jesús. 3 Walh tichi yu'uncha ixt'at'ink'an lapanakni tach'ixlicha'anilh pumatam lapanak yu wa ixlakalhtukulunta. 4 Pero jantu lay ixtala'cha'ani waniy mu lhilhuw, pus ta'a'stilhukukulh lakats'uniya an cha'a'. Anchacha taputamaknulh la ixputamat an yu lakalhtukulunta. 5 Akxni jala'ts'ilhi li tajakiklaka'inin, juniy an yu lakalhtukulunta:

―Ikmala'mixiniyani mintala'alhini kints'alh.

6 Walh mu ancha ixtawilanalh an ali'in xamaestrojnin lhamap'a'sin, pus sa'cha ixtalhatapastaknan: 7 “¿Tasu li chunchacha najuni? Wa aya najun, wa Diosi lay mala'mixiy tala'alhin. ¿Tisiyuchacha lay kamala'mixipala tala'alhini?” 8 Wayu mu an Jesús ixjak'atsaaniya tani ixtapast'ak'acha, jajuniy:

―¿T'asu li ch'unch'ach'a jat'ap'ast'aknanat'iti? 9 ¿Tanyucha yu palay jantu lhima'anxkay ajkunilh: “Amintala'alhin ikmala'mixinincha”, u ajkunilh: “K'at'aycha k'asakt'icha amimputamat k'ap'inchicha”? 10 Chaway kit'in yu ikwalh isTs'alh Lapanak aklamasuniyawi li layi ikmala'mixiy tala'alhin ani lakamunulhpa'.

Junilh an yu lakalhtukulunta:

11 ―Chaway uxint'i ijkunan k'a'ost'aycha, k'asakt'icha amimputamat chi k'ap'inchicha mincha'a'. 12 Pus ostayalhcha an yu ixlakalhtukulunta, chi saklhicha an ixputamat, tala'ts'in'ojoycha, pus sawalhcha talhi'a'niy, tanajun:

―Jantu a'tam ixla'ts'intawi tacha ani. An Dios ay sawalh.

13 Xli'astan an Jesús ampalhi an ixpiktu lakxkan, anchacha ixjamap'a'siy mu lhuw lapanakni ixtala'cha'an. 14 Tan ixla'pust'ajun an Jesús la'ts'ilh an Leví, ists'alh Alfeo, sa' ixwilh tan mapalhlhi'ankan ixlakata tanlhun, pus juniy:

―Ak'int'ap'it'icha.

Walh t'a'alhcha. 15 Xli'astan an Jesús chi an ixt'alhtanan ixtat'awilanalhcha la ixmesa an Leví, la ixcha'a, ixluwk'an wachu ixtat'awilanalh an yu ixtalhach'inin tanlhun chi, an yu ixtalhit'ajun ixtala'alhink'an, mu wanaj lhilhuwi ixch'a'o'akanta an Jesús. 16 Pus an xamaestrojnin lhamap'a'sin chi an fariseojnin tala'ts'incha li tat'alakwajini an Jesús an yu talhach'inin tanlhun chi an yu talhit'ajun ixtala'alhink'an, pus jajunkan an ixt'alhtanan Jesús:

―¿Tasu li jat'alakwajincha an yu talhach'inin tanlhun chi an yu talhit'ajun ixtala'alhink'ani?

17 An Jesús asmatlhi, jajuniy:

―Yu oxi tat'ajun jantu tama'lhtask'iniya jak'uch'unu', yu tata'an'ay chun. Kit'in ikminta jat'asanini an yu talhit'ajun ixtala'alhink'an, jantu yu oxi tat'ajun.

18 An ixt'alhtanan Juan chi an fariseojnin ixtalhitask'ajayi ixwaytk'an a'tamin. Chi tala'alh an Jesús tajuniy:

―¿Tasu li an ixt'alhtanan Juan chi an fariseojnin talhitask'ajayi ixwaytk'an a'tamini, chi amint'alhtanan yu'uncha tawajini?

19 An Jesús jajuniy:

―¿Chu laycha jantu katitawaylh yu tat'ajun tan tama'xto'kan? Li anchaka tat'ayanalh an yu tama'xt'o'a jantu layi katitalhitask'ajalhcha ixwaytk'an. 20 Pero kamina wilhchani akxni an yu tama'xto'lhi jantucha ani katitsukulh. Akxni katalhitask'ajayacha ixwayk'an a'tamin. 21 Jantu xamati ts'ap'amuk'aniy yu sast'ika la'ch'it yu at'ilhcha la'ch'it, li chuncha, an yu sast'ika la'ch'it wa palay exa an yu at'ilhcha. 22 Chi jantu xamati mujuy yu sast'ika xaxkan uva laka at'ilh jaxt'a'an, li chuncha, an sast'i xaxkan uva laj'exa an jaxt'a'an, pus pu'ancha an xaxkan uva chi an jaxt'a'an talaj'exacha. Yu sast'ika xaxkan uva laka sast'i jaxt'a'ani kamujukalh.

23 La atam wilhchan akxni wa jastaknankan ixla'pust'ajun tan jach'ananankanta an Jesús, walh an ixt'alhtanan tsukulhcha ta'akatan'ex'iya an trigo. 24 Pus an fariseojnin tajuniy an Jesús:

―K'ajala'ts'i, ¿tasu li ta'ilhtuycha yu jantu makawkan akxni jantu tapatsakan wilhchani?

25 Yucha jajuniy:

―¿Jant'u a'tam p'unawt'at'iti tani lalhcha an David chi an yu ixtat'a'anta akxni tachawanalh? 26 Yucha tanulhi an la ixcha'a Dios akxni xa'ay sacerdote ixjunita an Abiatar, chi ulhi an jamatajtanilanti pan, walh jantu lay xamati ix'uy, wa yu'uncha an sacerdotejnin, walh an David wachu jat'a'ulhi an yu ixtat'a'anta. 27 Chi jajumpalay:

―An wilhchan akxni jantu tapatsakan, ilhtukalh ixlakata an lapanak, jantu ilhtukalh an lapanak ixlakata an wilhchan akxni jantu tapatsakan. 28 Xliyu kit'in yu ikwalh isTs'alh Lapanak ikch'alhkatnani masi akxni jantu tapatsakan wilhchan.