1 An Jesús jajuniy an ixt'alhtanan:

―Jantu layi jantucha kati'alilh yu kaputa'a'takalh, pero yu walhuncha ilhtuyi li xamati ka'ilhtulh tala'alhin, 2 yu ilhtuyi li kats'antijlalhi xapumatam ani xalakt'ikt'in, palay oxi kalhtuj ch'ipixtanukalh xachiwx palakskitin, chi kawarjcha maka'ankalh alamalh. 3 K'ajalajk'ats'anant'it.

’Li xamati mint'ala'ajun ilhtuniyan tu'u tala'alhin, kala'a'aymat'i, chi li astan najun, k'amala'mixinin. 4 Chi li tam wilhchan, a'tujuni tu'u yu jantu oxi ilhtunin, chi li a'tujuni la'cha'ancho'on junan: “Astan iknajun, jantucha chuni aktilalh”, k'amala'mixinin.

5 An ixpumakawt'uyk'an ixtat'alhtanan an Jesús, tajuniy:

―Jamach'alhkat, ali akilaxta'niwi jakiklaka'inti.

6 Pus an Jesús jajuniy:

―Li k'ajak'iklak'a'inint'it masi wa tacha an xatalhts'icha mostaza, layi k'a'una'it'it ani k'iw junkan sicómoro: “K'a'ost'i, an lakxkancha k'at'ayachi'”, walh kata'asmatniyan.

7 ’Li xamati yu uxitnan lhit'ajun pumatam ixma'tsuku yu anta jalhistakna mintorojk'an u anta mulhini t'un la minkuxtuk'an, akxni chincho'oycha, ¿ch'u sna unat'it: “K'at'anut'icha, k'at'a'ulhcha, k'awaycha?” 8 Li mu jantu, uxitnan unat: “K'ajamap'axancha oxi, ak'ila'oxinincha yu ak'uya chi ak'i'iniya'acha, ixli'astan k'awayna'acha wachu chi k'a'ot'a'acha wachu yu otp'ut'un akxni ikway'ojotacha kit'in p'ulhnaj.” 9 Chi wachu jantu xta'niya lhimala'puchajun an ixma'tsuku an yu lhinajun, li ilhtunilhcha yu lhijunilh. 10 Wanajcha chuni uxitnan, akxni ilht'ut'atcha yu talhijunan Dios, k'anawna'it: “Jantu oxi ma'tsukunini kitnan, mu an yu ik'ilhtuw wa xliyu kilhi'ilhtutk'an.”

11 Akxni ixti'ancha la'acha'an Jerusalén an Jesús, lhitapitsicha xalakaat'un Samaria chi Galileaja ixpula'pust'ajun. 12 Walh akxni cha'alh lakatam la'acha'an, taxajnichilh ixpumakawk'an lapanakni yu wanajcha ixtalakap'uch'i'ojota, wa ma'atcha sa' tatayachalh 13 chi ixtat'asajlaka'aniycha, ixtajuniy:

―¡Jesús, Maestro, klask'iniyaw ay lamapaynin!

14 Akxni jala'ts'ilh an Jesús jajuniy:

―K'ajak'it'alak'asunit'it an sacerdotejnin.

Walh akxni wa ixtita'anka, tatala'a'oxi'olhcha. 15 Pus xapumatam, la'ts'inkancha li tala'a'oxilhcha, tasp'itcho'ochalh, ixta'niycha lhimala'puchajuni an Dios, ixlipukilht'asaycha. 16 Tatso'ottatawlhnilhcha la ixlakapu an Jesús, tamuntitachalhcha, ixta'niycha lhimala'puchajun. Ani lapanak jamacha'a Samaria. 17 An Jesús najun:

―¿Chu jantu ixpumakawk'ani an yu tatala'a'oxilh, an ixpumanajatsik'an tanischa tat'ajuni? 18 ¿Jantucha xamati kak'uxamilh xta'nini lhimala'puchajun Dios, wa yucha anicha yu jantu ani jamacha'a'?

19 Pus an Jesús juniy an lapanak:

―K'at'aycha, k'ap'inch'o'ochicha; mu jak'iklak'a'inin p'us t'ak'uch'ut'icha.

20 An lapanakni yu ixjajunkan fariseojnin talhisakmilh an Jesús taniwanancha kachina an ixlich'alhkat Dios, yucha ja'alhtaylh jajuniy:

―An ixlich'alhkat Dios jantu katila'ts'inkalhi akxni kamina'. 21 Jantu katinawkalh: “¡Jo', k'ala'ts'int'itcha, anicha t'ajun!”, u “¡anucha t'awnachalh!” Mu an ixlich'alhkat Dios tat'a'aklat'awnancha.

22 Chi jajuniy an ixt'alhtanan:

―Kamina panch'e'exi akxni uxitnan akilala'ts'imputunawi kit'in yu ikwalh isTs'alh Lapanak, masi wa la'atamcha wilhchan, pero jantu akintilala'ts'iw. 23 Chi k'a'unk'ana'it: “¡Aniya t'ajun, u anu t'awnachalh! Pero jant'u k'ap'it'it, jant'u k'ajach'a'o'at'it.” 24 Mu akxni akmina kit'in yu ikwalh isTs'alh Lapanak, wa tacha akxni an jamakalipnini kalaya', limj jamakalipnini ixlitapiktutam an lakt'iyan chi sta ixtapiktutami makacha'an. 25 Pero p'ulhnaj akstak ma'alh'ajnana', jantu k'is akintitala'a'ilhi an yu chaway tat'ajun. 26 Tacha akxni an ixt'ajun Noeje katapasaya akxni kamina an isTs'alh Lapanak. 27 Akxni ixt'ajun an Noé, an lapanakni ixtalakwajin, ixtalaj'ot'a, chi ixtalat'atsukuy chi ixtalamat'atsukuy, sta wa akxni tajulhcha an laka ay barco an Noé, chi an lapanakni yu'uncha wanaj talakni'olhi an laka a'muxtut. 28 Wanajcha chun tacha tapasalh akxni ixt'ajun an Lot. Ixtalakwajin, ixtalaj'ot'a, ixtajatamawnan, ixtajast'anan, ixtajach'ananan chi ixtayajuy ixcha'ak'an. 29 Pero akxni taxtulhcha an la'acha'an Sodoma an Lot, an lakt'iyan tacha wa xkancha patajulh jikmi, wanaj jama'ni'olhi an lapanakni. 30 Chuncha katapasaya akxni kamina an isTs'alh Lapanak.

31 ’Akxni, yu uk'achalh la ix'a'sti ixcha'a, jantu kata'alhtajulhi ka'alh maxtunu ixlaktanlhun, chi yu t'awnachalh la ixkuxtu jantu katasp'itcho'ochalh. 32 K'ap'ast'akt'iti tacha putapasalh an ixt'iwi Lot. 33 Yu kama'alhtaxtuputuna ixjatsukunti, kama'ats'an'aya', chi yu kama'ats'an'aya, kama'alhtaxtuya'.

34 ’Klajunaw anchunu jatats'isni tan ixt'uyunk'an tamanalh la ixputamatk'an, an pumatam kalhi'ankana', an pumatam jantu. 35 Li ixt'uyunk'an t'akunin wa lakatam taskitit'ajun, an pumatam kalhi'ankana', chi an pumatam jantu. [ 36 Tan ixt'uyunk'an lapanakni tat'ajun laka kuxtu, an pumatam kalhi'ankana chi an pumatam jantu.]

37 Pus ta'alhtaylh an Jesús, tajuniy:

―¿Tanischa chuncha katapasaya'a, Jamach'alhkat?

Yucha jajuniy:

―Tan tamay tu'u yu nitacha, ancha tatawlachalh an ch'unin.