1 A'tamchacha akxni an Jesús ixpiktu an ay xalakxkan Genesaret ixt'ajun, an lapanakni wa ixtapa'asicho'oycha li ixta'asmatputun an ixchiwinti Dios. 2 Walh an Jesús jala'ts'ilh la'at'uy barco yu waniy ixpiktu an lakxkan ixtawilanalh, mu an yu ixtach'apayajuy jatanti ixtaputakutta, ixtala'ch'a'ay an ixpaxo'tank'an. 3 Pus putajulh la'atami an Jesús an barco, ma ix'anu Simón. Chi sk'inilhka lamapaynin li kastalhka mujulh palay an lakxkan. Chi sa'cha tawlhchalh, sta anchacha ixjamasuniyachalh an laka barco tacha an ts'anan ixlakyakalh. 4 Akxni chiwin'olhcha, juniy an Simón:

―Tan putalhmancha k'alhip'inchi', chi k'amutcha an mimpaxo'tank'an.

5 An Simón alhtaylh juniy:

―Maestro, tuntats'isnicha iktapatsaw, pero jantu lay tu'u ikch'apayawyaw, pero li uxint'ich'a na'un, akmuyacha an paxo'tan.

6 Walh akxni tamujulhcha, lhuw jatanti tama'alhilalh, ixla'ta'exacha an ixpaxo'tank'an. 7 Pus tatamakyawlaka'aniycha an yu lakatam laka barco ixtatajumananchalh, para li katamilhcha t'ala'a'tayjunin, pus tamilhcha. Tala'tsamalhi an la'at'uy barco, wa laycha tatalak'aknulh. 8 Akxni chunchacha la'ts'in an Simón Pedro, tatso'ottanilhcha an Jesús, juniy:

―Ak'ilaj'ost'i Jamach'alhkat Jesús, mu kit'in lhuwi kintala'alhin.

9 Wa xliyu an Simón chi an ali'in ixtalaktalhanancha li tacha an tach'apayawlhcha an jatanti. 10 An Jacobo chi an Juan, ists'alan Zebedeo yu ixjat'a'anta an Simón wachucha ixtalaktalhanan. Pero an Jesús juniy an Simón:

―Jant'u k'at'alhan, chaway tukan lapanaknicha k'ajama'alhilaya'a t'ach'a ixjama'alhilay jatantin.

11 Akxni talakmakutu'olhcha an ixbarcojk'an, chuxi talakmakaw'ula'olh, chi tat'a'alhcha an Jesús.

12 La'atam wilhchan akxni an Jesús ixt'ajun tanchun la'acha'an, la'cha'alh pumatam lapanak yu ixlakap'uch'i'ojota, an lapanak akxni la'ts'incha an Jesús tatso'ottanilhcha chi tamuntitachalhcha lakaat'un, tapayniniycha juniy:

―Jamach'alhkat, li sna ak'ink'uch'up'ut'u, ak'ink'uch'ut'ika'.

13 Pus lats'awalalhi ixmaka an Jesús, chi lakpach'apachalhcha, juniy:

―Chun, k'at'ala'a'oxit'icha.

Wa akxni watukan tala'a'oxilhi an lapanak. 14 Chi juniy li jantu xamati kajunilh, juniy:

―Wa k'ap'inchicha talakasunini an sacerdote, chi k'ama'axt'a'a'acha milha'ulan ixlakata li t'ala'a'oxit'icha, tacha lhinawlh a Moisés, para li katak'atsa'olhi an sacerdotejnin.

15 Pero ali ali ixmispakani an Jesús, chi lhilhuwi ixla'cha'ankan mu ixta'alha'asmatputun chi ixtalakask'in li kajalajk'uch'ulh. 16 Pero yucha ix'an tapaynini tan wa ix'akstu, tan jantu la'acha'an.

17 Tapasalh la'atam wilhchan akxni ixmasut'ajun an Jesús, ali'in fariseojnin chi an xamaestrojnin lhamap'a'sin ancha sa' ixtalakwilanalh, yu ixtalakmintachalh xala'acha'anaxni Galilea, chi Judea chi Jerusalén. Walh an ix'alhp'asninti an Dios ancha ixt'a'aklat'ajun an Jesús para li lay kajak'uch'unulh. 18 Wa chuncha tichi yu'uncha lapanakni talhicha'alh la ixputamat pumatam lapanak, yu wa ixlaklhtukulunta. Ixtama'anuputunachalhi an laka cha'a', la ix'ukxlakapu an Jesús, 19 pero jantu tala'cha'alhi tan kataputamaknulh, mu wanajcha lhilhuwi ixjunkanta, pus an ix'a'sti cha'a tatawk'alh, ta'a'stip'uxli lakats'uniya an ix'a'sti cha'a ancha taputamaknuchalh an ta'an'an la ixputamat, ixtan'ajnichak'an an lapanakni tamamalh, la ix'ukxlakapu an Jesús. 20 An Jesús mu jala'ts'incha li tajakiklaka'inin, pus juniy an yu ta'an'ay:

―Amigo, ikmala'mixini'oyani mintala'alhin.

21 Pus an xamaestrojnin lhamap'a'sin chi an fariseojnin tsukulhcha tajatapastaknan, tanajun: “¿Tisiyuchacha ani li wa lhila'ts'incha Diosi? Wa Diosi yu lay mala'mixiy tala'alhin.”

22 Pero mu an Jesús ixjak'atsaniya tacha an ixtajatapastaknan, pus jajuniy:

―¿Tasu li ch'unch'ach'a jat'ap'ast'aknanat'iti? 23 ¿Tampiyu yu palaycha wa las, aknawlh: “Ikmala'mixini'ojoncha mintala'alhin”, u aknawlh: “K'a'ost'aycha, k'ajalht'ancha”? 24 K'ak'ats'at'iti li kit'in yu ikwalh isTs'alh Lapanak layi akmala'mixiya tala'alhin ani lakaat'un.

La'alhi an yu lakalhtukulunta lapanak, juniy:

―Chaway uxint'i ijkunan, k'a'ost'aycha, k'asakt'icha amimputamat chi k'ap'inch'o'ochicha mincha'a'.

25 Wa akxni ostayalh an yu ixlakalhtukulunta, sakcho'olhcha an ixputamat, chi ancho'olhcha la ixcha'a'. Xta'nilhi'alhcha lhimala'puchajun an Dios, chi ixchuxk'ani tala'ts'ilh. 26 Pus sawalhcha ixtalaktalhanan chi oxicha ixtalhipast'ak'a an Dios. Laka ay ixtalhantik'an ixtanajun:

―Chaway la'ts'iw yu lhi'a'nin.

27 Ixli'astan tacha an laktapasalh, an Jesús alhcha, walh la'ts'ilh pumatam lapanak yu ixlaklhach'inin tanlhun an laka banco, Leví ixjunkan, sa' ixwilh tan an ixjach'inin, pus an Jesús juniy:

―Ak'int'ap'it'icha.

28 Yucha makaw'olhi an yu ix'ilhtuy, tayalh chi ch'a'o'alhcha.

29 Ixli'astan an Leví, an la ixcha'a ilhtunilh la'atam wayti an Jesús. Ixluwk'an an yu ixtalhach'inin tanlhun ancha ixtama'wilanalh chi ali'incha lapanakni wachu ancha ixtama'wilanalh laka mesa. 30 An xamaestrojnin lhamap'a'sin chi an fariseojnin kalaks kalakscha ixtaxa'alayi an ixt'alhtanan an Jesús, ixjajunkan:

―¿Tasu li jat'alakwaynatcha chi jat'alaj'ot'atcha an yu talaklhach'inin tanlhun chi an ma'lhta'alhinini?

31 An Jesús ja'alhtaylh jajuniy:

―Yu oxi tat'ajun jantu tama'lhtask'iniya jak'uch'unu', an ta'an'anin chun. 32 Kit'in jantu ikminta jat'asanini yu jantu tu'u ixtala'alhink'an, kit'in ikminta jat'asanini yu talhit'ajun ixtala'alhink'an para li katamakawlhcha.

33 Wa chuncha yu'uncha tajuniy:

―¿Tasu li an ixt'alhtanan Juan chi an ixt'alhtanank'an fariseojnin sawalh tatapayniy chi sawalh talhitask'ajayi ixwatkani? Amint'alhtanan talakwajin chi ta'ot'a li tu'u'.

34 An Jesús jajuniy:

―¿Ch'u laych'a k'aja'ilht'uya'it li katalhitask'ajalhi ixwayk'an yu jat'asanikanta tan tama'xto'kan, li ancha jat'a'aklat'ajun an ts'alh yu tama'xt'o'a? 35 Kachina wilhchani akxni an ts'alh an yu tama'xt'o'a kama'osukana' pus akxni an yu ixtalakwajin wachucha katalhitask'ajaya ixwaytk'an.

36 Wachu jajumpalh la'atam pulhamacha'xan:

―Jantu xamati ex'iy sast'i la'ch'it chi lhila'ts'ap'ancha yu at'ilhcha. Li xamati chuncha ilhtuy, jantu oxi t'atasuy an la'ch'it, chi an sast'i la'ch'it exa an yu at'ilhcha. 37 Chi jantu xamati pumujuy yu sast'ika xaxkan uva yu laj'at'ilhcha jaxt'a'an, mu an sast'i xaxkan uva tan'exa an jaxt'a'an, pus pu'an'ojoy, chi an jaxt'a'an ts'an'aycha. 38 Yu sast'ika xaxkan an uva, yu sast'ika wachu jaxt'a'ani pumujukan, chuncha an xaxkan uva chi an jaxt'a'an jantu tani talay. 39 Chi jantu xamati yu ot'a an yu xama'ancha xaxkan uva watukan ka'otputumpalhi an yu wa sast'ika', mu najun: “Palay oxi an yu xama'ancha.”