1 ’Ani yu iklajunaw sawalh, yu jantu la xamalhticha putanuyachalh an la ixkurralhk'an an borregojnin yu lakatami putanuyachalh, wa ja'alhawna'. 2 Pero yu la xamalhticha putanuyachalh, yucha yu jalhist'ak'a an borregojnin. 3 An yu jalhistaknan laka malhticha yucha mati'aniycha an yu jalhist'ak'a ixborregojnin chi la ixta'a'utchak'ani jamapa'a'uy la'atamin, pus ta'alhmispaycha, chi jamaxtuycha. 4 Chi akxni tataxtu'ojoycha, jatap'ulhniycha, pus an borregojnin tach'a'o'aycha mu ta'alhmispay. 5 Pero yu jantu tamispay jantu tach'a'o'ay, wa talakats'alhniy mu jantu ta'alhmispay.

6 An Jesús chuncha jalhimalakxtunilh, pero yu'uncha jantu talhimacha'xanilh.

7 Pus a'tam jajumpalhi an Jesús, jajuniy:

―Ani iklajunaw yucha sawalh, kit'ini ixmalhtichak'an an borregojnin. 8 Akxni jantuka' xakmin, ixchuxk'an an yu p'ulhnaj takilachilh wa ja'alhawnan, pero an borregojnin jantu ta'alha'asmatlhi. 9 Kit'in, ikmalhticha, yu kit'ini kimputanuy kata'alhtaxtuya'. Katanuya chi kataxtuya chi kala'cha'ana jats'in.

10 ’An ja'alhawna yucha wa mintacha ja'alhawana', chi minta jama'nini', chi minta jalakt'ilhiyni'. Pero kit'in ikminta para li k'alhits'uk'ut jatsukunti, chi li lhuwi k'alhits'uk'ut jatsukunti. 11 Kit'ini yu oxi ijkalhist'ak'a an borregojnin. Yu oxi jalhist'ak'a an borregojnin lhima'axt'a'a ixjatsukunti. 12 Pero li yu wa mapalhnikancha tapatsay, akxni la'ts'in min an ma'tili jamakajuncha an borregojnin chi jats'alaycha, mu jantu yu yu jalhist'ak'a sawalh chi mu jantu ixnawin. An ma'tili ja'uycha an borregojnin chi tatalaktilhacha. 13 Anchunu lapanak jats'alay mu yucha wa yucha an ixtalhajacha lhakapu'an, jantu yu an borregojnin sawalhi jalhakapu'an.

14 ’Kit'ini yu oxi ijkalhist'ak'a an borregojnin, chi ijkamispayi yu kinawin, chi yu'uncha kintamispay, 15 tacha kimispay an kimPay chi kit'in ikmispay wachu'. Kit'in ijkalhima'axt'a'a kijatsukunti an borregojnin. 16 Atumpaj ijkalhit'awpalay ali kiborregojnin yu jantu ani tatanumanalh ani laka kurralh. Yu'uncha wachu ajkalhimina chi akinta'asmatniya kinchiwinti, wa lakatamcha katatsuku'oya chi wa pumatami yu kajalhist'ak'a'.

17 ’An kimPay xliyu kilhimapayniy, mu kit'in ikma'axt'a'a an kijatsukunti para li ajkama'lhtayanancho'olh. 18 Jantu xamati kimaxtuniy an kijatsukunti, wa ki'akstucha ikma'axt'a'a. Ikt'acha'ani li akma'axta'lhi chi li akla'a'icho'olh. Ani, yucha an kimPayi chuncha kilhijunilh.

19 An judiojnin a'tam tatala'apitsipalhi akxni chunchacha ta'alha'asmatlhi. 20 Ixluwk'ani yu yu'uncha ixtanajun:

―Wa loko chi wa lakpach'apata makxkay'un, ¿tasu li takiklaka'iycha?

21 Pero ali'in ixtanajun:

―Jantu xamati yu wa lakpach'apata makxkay'un chuncha kachiwinilh. ¿Chu sna layi an makxkay'un kajamalakawanilh yu wa la'la'lhtulu'un?

22 An la'acha'an Jerusalén ixk'atanit'awkan, ixlakata yu ixpupastakkan an ay ixtajtank'an. Ixpaku lhik'asnini ixjunita. 23 Chi an Jesús an laka tajtani ix'aklat'ajun, an lhila'ixmalhticha Salomón. 24 Walh an judiojnin tala'atanchanulh chi tajuniy:

―¿Tasu wa tiwanancha chuncha akilalhilatsukuyaw li jantu oxi kilajunaw li sna uxint'i Cristojk'at'i? Li uxint'i Cristojk'at'i ixla'ts'awalanticha akilajuniw.

25 An Jesús jajuniy:

―Mu iklajunawcha, pero jantu kilakiklaka'iyaw. An tanlhun an yu iklak'ilhtuy la ixta'a'ut an kimPay, yuchacha masuy. 26 Pero uxitnan jant'u k'iklak'a'iyat'it, mu uxitnan jantu kiborregojnin. 27 An kiborregojnin yu'uncha kinta'alhmispay, chi ijkamispay chi kintach'a'o'ay. 28 Kit'in ijkaxta'niy jatsukunti yu jantu a'tam katimin'olh, chi jantu a'tam katitanilh, chi jantu xamati akintijamaxtunilh. 29 An kimPay yucha jantu xamati ixt'achun, yucha yu kijaxta'nilh an borregojnin chi jantu xamati katijama'xa'axtulh an kimPay. 30 An kimPay chi kit'in wa la'atami ijkuntaw.

31 Wa chuncha an judiojnin ixtalakat'alhmaputumpalaycha, ixtalaksak'acha chiwx. 32 Pero an Jesús jajuniy:

―Lhuwcha tanlhun yu laj'oxi tu'u iklamasuniw yu ixnawin an kimPay. ¿Tanyucha yu akilalhilakat'alhmayawi?

33 An judiojnin tajuniy:

―Jantu xliyu li aktilalhilakat'alhmaw li laj'oxi tanlhun ilht'uy, aklalakat'alhmayaw mu wa aya uniya an Dios. Wachu wa lapanakk'at'i, ch'i uxint'i na'un li Diosk'at'i.

34 An Jesús jajuniy:

―¿Chu jantu ts'o'muk'akanta an la milhamap'a'sink'an tan najun?: “Kit'ini iknajun, uxitnan diosnin.” 35 Li an Dios, diosnini jajunilh an yu takilhichiwinchilh ixchiwinti, pus k'atsayawi li an tan chuncha ts'o'muk'akanta jantu layi jantucha katikiklaka'iw. 36 Chi li an Dios kisakxtulh chi kimakmilhcha ani lakamunulhpa, ¿t'asu li nawnatcha li wa aya ijkuniycha, li iknajun li kit'in isTs'alh Diosi? 37 Li jantu yu ik'ilhtuy an tapatsat tacha an ilhtuy kimPay, jantu akilakiklaka'iw. 38 Pero li chuncha ik'ilhtuy, masi jantu akilakiklaka'iw, yucha an yu ik'ilhtuycha k'ak'iklak'a'it, para li wa xawa'a'tamcha k'ak'ats'at li an kimPay kinput'ajun chi kit'in yucha ikput'ajun.

39 A'tam ixtach'apayawputumpalay, pero an Jesús tama'a'osli.

40 Ampalhcha ixtapiktutam an ayxkan tan junkan Jordán, tan ixlip'ulhnaj ixjama'paxanan an Juan, anchacha tamakawchalh. 41 Ixluwk'ani ixtala'cha'an, chi ixtanajun:

―Chun sawalh, masi an Juan jantu tu'u masulh yu la'lhi'a'nin, pero tacha an lhichiwinilh ani lapanak chun sawalh.

42 Ixluwk'ani ancha takiklaka'ilh an Jesús.