1 An Jesús jama'ayxto'olhi an ixpumakawt'uyk'an ixt'alhtanan chi ja'ilhtulhcha li lay katatamakxtuya tanlhun lakmakxkay'un chi li layi katak'uch'uya wa tuchicha ta'an'at. 2 Jamala'achalhcha li kata'alh lhichiwinin an ixlich'alhkat Dios chi li katak'uch'ulh an ta'an'anin. 3 Jajuniy:

―Jant'u t'u'u k'alhip'it'it para laka tij, jant'u k'alhip'it'iti minpalikk'an, chi mibolsajk'an, chi pan, chi tumin, chi alht'uy mila'ch'itk'an. 4 Wa t'anch'unch'a k'ach'ip'ina'it laka cha'a wa anch'ach'a k'at'awla'it, sta akxni k'ap'inch'o'oya'itcha. 5 Chi wa tanchuncha la'acha'an jant'u la'a'ik'anat'it, k'at'axt'ut'it, chi k'alakch'ank'alhap'uxk'ant'iti an po'xmi para li katak'atsaalhi li jantu oxi tacha an talay.

6 Pus yu'uncha tataxtunilhcha ta lakachux an la'acha'anaxni, ixtalhichiwiniycha an laj'oxi chiwinti chi ixtajak'uch'ununcha.

7 An rey Herodes k'atsaalhi tacha an ixlaktapasay, pus jantucha ixlimacha'xay mu ali'in ixtalaknajun li ma yucha an Juancha la'awcho'olh, 8 ali'in ixtalaknajun ma yucha an Eliascha talakasucho'olh, chi ali'in ixtalaknajun ma wa xatichicha an yu ixtalhichiwiniy ixchiwinti Diosi la'awcho'olh. 9 Pero an Herodes najun:

―An Juan kit'ini iklhinawlh li ka'a'cha'xkalh, ¿tisiyuchacha an yu lhichiwinkani?

Pus ixmispaputuncha.

10 Akxni tala'cha'ancho'olhcha an ixt'alhtanan an Jesús tajuniycha tuchini ta'ilhtulhcha. Yucha ja'aylhi'alhcha tan wa ix'akstuk'an tan wa jasa'nik'a lhila'acha'an Betsaida. 11 Pero akxni an lapanakni tak'atsaalh, tach'a'o'alh, pus tala'cha'alhi an Jesús, yucha jala'a'ilh, tsukulhcha jalhixa'alayi an ixlich'alhkat Dios chi ixjak'uch'uycha an yu wa ixtata'an'ay.

12 Akxni ixta'oxat'ajuncha tala'cha'alhcha an ixpumakawt'uyk'an ixt'alhtanan an Jesús, tajuniy:

―K'ajamala'ach'ach'o'ocha an lapanakni para li kata'alhcha puxkawnini tanchuncha katajastaknana chi para li kata'alhcha puxkawnini an la'acha'anaxni u masi tan wa jalhi'ay yu kata'uya', an tan waniy laklhitamakajun, mu ani jantu tu'u alin.

13 An Jesús jajuniy:

―K'ajaxt'a'nitcha uxitnani yu kata'uya'.

Yu'uncha ta'alhtaylh:

―Wa a'xkisi pan chi ma'at'uy jatanti iklhit'awnaw, ka wanaj ak'aw jatamawninini yu kata'ulh tacha an ta'ayxto'nun.

14 Tacha la'akisi mil lapanakni ixta'ayxto'nun. An Jesús jajuniy an ixt'alhtanan:

―K'aja'unitka li katalaktawilhka', t'up'uxamkawincha katalaktawilh kilhmaktamin.

15 Pus chunchacha ta'ilhtulh. 16 Chi an Jesús xa'a'ilhcha an a'xkisi pan chi an ma'at'uy jatanti, tala'st'alhcha an lakt'iyan, xta'lhicha lhimala'puchajun chi la'ch'e'elhcha, jala'xta'nilhcha an ixt'alhtanan para li katamala'pitsilhcha. 17 Pus ixchuxk'ancha talak'ulh, talhikiklalhcha. Chi an yu tucha lay ta'o'olh xaxajni tamach'ixtamicho'olh la'akawt'uy canasta.

18 A'tamchacha akxni ixtapaynit'ajun wa ix'akstu an Jesús, jajuniy an ixt'alhtanan mu ancha ixtat'a'aklat'ajun:

―¿Tisi kit'incha tanajun an lapanakni?

19 Yu'uncha tajuniy:

―Ali'in tanajun ma Jama'paxanaj Juank'at'i, ali'in ma Eliask'at'i, chi ali'in tanajun ma xamati yu an ma'anchacha ixtalhichiwiniy ixchiwinti Diosi la'awcho'olh.

20 Pus yucha jajuniy:

―¿Chi uxitnan tisi kit'inch'a nawnat'iti?

An Pedro juniy:

―Uxint'i ixCristo Dios.

21 An Jesús sawalhcha jajuniy li jantu k'is xamati katajunilh. 22 Chi jajuniy:

―Kit'in yu ikwalh isTs'alh Lapanak akstak ma'alh'ajnana', chi jantu akintitala'ts'imputulhi an laktatanincha chi an xalaj'ajin sacerdotejnin chi an xamaestrojnin lhamap'a'sin. Akintama'niya pero ixlila'at'utu wilhchan akla'awcho'oya'.

23 Chi tan ixchuxchak'an jajuniy:

―Li xamati kint'alhtana jumputun, kamakawlhcha yu wa ixjatapast'ak'atcha, kaxa'a'ilhcha ixcruz yu lay kapuma'nikalh chi akinch'a'o'alhcha. 24 Mu yu kama'alhtaxtuputuna ixjatsukunti, kama'ats'an'aya', pero yu kama'ats'an'aya ixjatsukunti kilakata, kama'alhtaxtuya'. 25 ¿Tasipi lhila'ancha masi an lapanak wanajcha ix'anu kajun'olh an lakamunulhpa', li wa akstu lakt'ilhi'ulakancha chi wa akstu ma'ats'an'akancha? 26 Yu kint'amaxanan chi t'amaxanani an kinchiwinti wachu akt'amaxanana akxni akmina tacha Rey, la ixmakalip'at an kimPay chi la ixmakalip'atk'an an la'stalan'a ix'angelhnin. 27 Pero klajunaw an ali'in yu ani tat'ajun jantu katitanilhi li jantuka' tala'ts'ini an ixlich'alhkat Dios.

28 Ixli'astan katacha la'atsajincha wilhchan la'pusli chuncha ixjalhixa'alata an Jesús, jat'a'alhcha an Pedro chi Juan chi an Jacobo tanchun a'stitawk'a, alhcha tapaynini'. 29 Akxni ixtapaynit'ajuncha, an ix'ukxpu tapaxalhcha, chi an ixla'ch'it wa sut'ut'ucha walh chi wa xlimjnik'acha. 30 Chi tatalakasulhcha ixt'uyunk'an lapanakni yu ixtat'achiwiniy. Yu'uncha an Moisés chi an Elías. 31 Wa xlimjcha ixjunita ixtuntala'acho'ok'an, ixtalhit'alakchiwiniycha an Jesús li ka'anacha, mu wa k'ischa ists'an'aniy yu kamuktaxtuya an la'acha'an Jerusalén. 32 Pus an Pedro chi an yu ixtat'a'anta masi sawalhcha ixtalaklhtataputun talhitayanilh, tala'ts'ilhi li an Jesús ay, wa xlimjnik'acha ixjunita chi an ixt'uyunk'an an yu ixjat'achiwiniy. 33 Akxni ixtita'ancho'oycha an yu ixjat'achiwiniy an Jesús, an Pedro juniy an Jesús:

―Maestro, ¡oxi li ani ikt'awnaw! Akyawyaw a'at'utu mulht'a'a, a'atam mi'anucha, a'atam ix'anucha Moisés chi a'atam ix'anucha Elías.

Jantu ixk'atsay tani ixnawt'ajuncha an Pedro. 34 Chunchaka ixnawt'ajun, ta'alhtajulh la'atam jataputs'i, jala'atanchanulhcha, pus ixtalaktalhanancha akxni ixjala'atanchanutacha an jataputs'i. 35 Wa chuncha an laka jataputs'i chiwinkalhcha, nawkan:

―Yucha aniya yu iksakxtuta kinTs'alh, yuch'a k'a'asmatnit'it.

36 Akxni chunchacha naw'okalh, an Jesús wa ix'akstucha tala'ts'incho'olh. Chi yu'uncha jantu k'is talaknawlh, alhcha panch'e'ex akxni chuncha tapasachalh jantu xamati ixtajuniy tacha an tala'ts'ilh.

37 Tunkunchalh, akxni tata'alhtajucho'olhcha an a'stitawk'a, lhuw lapanaki talakatastuklhi. 38 Ancha ixma'anta pumatam lapanak p'ascha xa'alay an Jesús, juniy:

―Maestro, iktapaynisk'iniyan li k'ala'ts'ika an kints'alh, wa ix'akstu kints'alh, 39 walh chi wa lakpach'apapalay makxkay'un, wa la'a'ijcha tsukuy t'asay chi p'ascha lakchikixa, wa xut'ut'ucha a'pupuy stakcha lhitama'chapuy chi jantu makawputun. 40 Ijkatapaynisk'inilhcha amint'alhtanan li akintak'uch'unilhka', pero jantu lay tak'uch'uy.

41 An Jesús alhtaylh najun:

―¡Yu ch'away t'awnat jant'u jak'iklak'a'ininat'it, wa t'ani lap'ut'unatcha layat'itcha! ¿Tasu wanancha wa aktilat'a'aklatsukuyawi? ¿Tasu wanancha wa aktilalhilhitayaniyawi? K'alhit'a amints'alh.

42 Akxni stalhcha la'alhi an ts'alh an Jesús, an makxkay'un ma'talh, p'ascha lakchikixli. Pero an Jesús la'a'aymalhi an makxkay'un pus ta'oxilhcha an ts'alh chi ma'axta'nicho'olhcha an ixpay. 43 Sawalhcha ixtalhi'a'niya ixchuxk'an li an Dios ay.

Chunchaka ixtalhi'a'nit'ajun tacha an ixlak'ilhtuy an Jesús, yucha jajuniy an ixt'alhtanan:

44 ―Oxi kata'akatutanun ani chiwinti yu aklajunaw: kit'in yu ikwalh isTs'alh Lapanak akima'axta'kana la ixmakak'an an lapanakni.

45 Pero yu'uncha jantu talhimacha'xanilhi tuchini ixjajuniycha, mu lhima'anxkayi para yu'uncha kaxtalhimacha'xalh, chi jantucha talhisakmiputulh, mu ixtatalhanajlay.

46 Wa chuncha tsukulhcha talalhisakmipaxay tichini palaycha xa'ay kajuna yu yu'uncha. 47 Chi mu an Jesús ixjak'atsaniya tani ixtajatapastaknancha la ixjalhunutk'an, xa'a'ilh pumatam jas'at'a, la ixpa'xticha yawlh. 48 Chi jajuniy:

―Watichicha yu la'a'iya ani jas'at'a la kinta'a'ut, kit'ini kila'a'iy, chi yu kila'a'iy, yucha la'a'iy an yu kimakmintalh; xliyu yu palay wa xalakat'ikt'i yu chux uxitnan, yucha yu palay xa'ay.

49 Pus an Juan alhtaylh juniy:

―Maestro, ikla'ts'inaw pumatam lapanak yu ixjak'uch'uyi la minta'a'ut an yu wa talakpach'apay makxkay'un, pero jantucha ikmakawniw mu jantu kintach'a'o'ayan.

50 An Jesús juniy:

―Jantu k'ala'a'aymat'it, mu yu jantu tani kinta'ilhtuyan, kintat'a'anan.

51 Akxni waniycha ixchint'ajun panch'e'ex para li an Jesús ka'anacha lakt'iyan, wachunchacha t'ak'alh lhi'ilhtulh ixtak'atsan li ka'anacha la'acha'an Jerusalén. 52 Jamala'achalhcha lapanakni p'ulhnaj yu ta'alh puxkawninin tan kacha'ana', lakatam xala'acha'an Samariajcha tacha'alh, 53 pero an yu ancha jamacha'an jantu tala'a'ilh, mu ixtak'atsayi li Jerusaleni ka'ana an Jesús. 54 Pus akxni tak'atsaalhi an Jacobo chi an Juan yu ixt'alhtanan an Jesús, tajuniy:

―Jamach'alhkat Jesús, ¿na'uni li akma'alhtajuwi jikmi an lakt'iyan para li katala'xaw'olh?

55 Pero an Jesús yucha jalaj'aymalh, [jajuniy:

―Uxitnan jant'u k'ats'ayat tuchi takuwinch'a lhit'awnat. 56 Kit'in yu ikwalh isTs'alh Lapanak ikminta jama'alhtaxtunu an ixjatsukuntik'an lapanakni, jantu ikminta jama'nini'.]

Chi ta'alhcha lakatam la'acha'an.

57 Akxni laka tijcha ixtat'ajun, pumatam juniy:

―Jamach'alhkat Jesús, wa t'anch'unch'a k'ap'ina'a akt'a'anan.

58 An Jesús alhtaylh:

―An zorrajnin talhit'ajuni ixcha'ak'an, chi an ts'o'on talhit'ajuni ixpamaj'ank'an. Pero kit'in yu ikwalh isTs'alh Lapanak jantu inta ikmast'ak'ay ki'a'tsulh.

59 Chi pumatam jumpalay:

―Ak'inch'a'o'acha.

Yucha juniy:

―Jamach'alhkat, kachajcha p'ulhnaj ikti'an maknunu an kimpay.

60 An Jesús juniy:

―K'amak'awcha, kachajcha tamaknulhi ixjaninink'an an janinin, uxint'i k'ap'inchicha lhichiwiniy an ixchiwinti Dios.

61 Chi pumatam wachu najun:

―Akch'a'o'ayani, Jamach'alhkat, pero kachajcha p'ulhnaj ikti'an jamak'atsaanini an yu ta ijkalhila'ts'in an la kincha'a'.

62 An Jesús juniy:

―Jantu xamati li akxni ma'lhts'anch'apatacha yu kapupuja an t'un la ix'a'lhch'acha kalaka'alh, yu chuncha lay, jantu lhitapalayi an la ixlich'alhkat Dios.