Da 16. Psalm.
Di Hofning Fumm Glawvicha
En Psalm fumm Dawfit.
1 Hald mich aus di kfoah, oh Gott;
ich du mei fadrauwa in dich.
2 Ich habb ksawt zumm Hah, “Du bisht mei Hah;
unni dich havvich nix goodes.”
3 So veit es di saylicha uf di eaht ohgayt,
si sinn hallich un sinn miah oahrich kfellich.
4 Di dreebsawl funn selli es anri gettah nohch gayn,
zayld graysah un graysah vadda.
Ich zayl kenn bloot opfahra zu selli gettah,
adda iahra nayma uf mei leftz nemma.
5 Da Hah is mei dayl funn di eahbshaft.
Du veisht miah vi zu gay,
un haldsht mei dayl fa mich.
6 Es land es zu miah kfalla is, is miah leeblich;
ich habb geviss en goodi eahbshaft.
7 Ich lohb da Hah es miah roht gebt,
even deich di nacht dutt mei hatz mich lanna.
8 Ich setz da Hah immah fannich mich.
Veil eah an mei rechtsi hand bleibt,
dann fall ich nee nett vekk.
9 Fasell froit mei hatz sich, un mei sayl is froh,
even mei leib haldsht du aus di kfoah.
10 Fa du zaylsht mich nett ivvah-gevva zu di veld funn di dohda,
adda dei Heilichah fazeahra lossa.
11 Du veisht miah da vayk zumm layva;
bei diah sei, macht mei frayt foll,
un an dei rechtsi hand sinn blesiahra fa'immah.