148
Tounah vasi keil avati lat isen Iahova
1 !Rehehati lat isen Iahova!
!Kami koa miro en out nesa
mihehati lat isen Iahova!
2 Anatin, kami angelo keil, mihehati lati,
kami koa mimul mivae en usite onen, mihehou lat isen.
3 Meteiai ka avati, milhehati lati.
Hitu keil, mihehou lat isen.
4 Tounah keil koa mimul en teilang, mihesakin isen hehina nesa.
Mahmah keil, mihetie lat hetetamenien onen.
5 Kami vasi, mihehati lat isen Iahova,
veni mumon kami vasi ral min ren.
6 Anatin, navong kei meng kati, kami miva miro kat en out kati onami,
ka misakras mivali hakot keil koa Ahi sani min kami.
7 Kami vasi koa miro en out netan,
ral min tounah vasi keil koa amoul en huinev ten atas,
mihehati lat isen Iahova.
8 Ahil koa vil ka voulul koa musel,
ous koa mus ka eang koa muhuh keih,
kami vasi koa mimul milong kat ren,
mihehati lat isen Iahova.
9 Hou keil ka vatihou keil, mihehati lat isen Ahi,
hetal min vatiai keil koa amul en out teim ka koakeil emun amul en eivorohus.
10 Buluk ka sipsip keil koa amah ka tirendan keil emun ten eivorohus, mihehou lat isen,
hetal min tounah sav keil koa amul akekelau ka amuka.
11 Asuv houlu keil ka meatin savsav keil, mihehouhou min Ahi,
hetal min avat keil ka hetetamen sav keil emun ten out netan.
12 Meatin hau ka ahin hau keil, mihehati lat isen,
hetal min ulmatu ka tovuli keil, ka titi ehon ka atouli keil emun.
13 Tounah vasi keil mihehou lat isen Iahova
veni isen enges marite mok mulin eis savsav vasi keil.
Anatin, isen vi hetetamen imok en out netan ka en out nesa emun.
14 Ahi mul san keihoen min meatin keil onen
keke akilea avahati lat isen.
Kei mul lei kat revi me-Isrel keil veni envatien onen mul en keil.
!Sakini, rehehati lat isen Iahova!