145
Hisien ten masmasien va min Ahi
Asuv houlu Deved mutisi
1 Keik kovi Ahi onak ka asuv houlu ten moulien onak.
Navouhou minuk ka navati lat isom lisenges.
2 En avong vasi, namasmasuk,
ka navou lat isom lises ka lisenges.
3 Iahova, keik kovi hetetamen imok, ka mal enges keke masan masmasien vahat minuk.
Keik komariso mok ka meatin keil asakras availea vasin keihoen onom.
4 Asa koa komumoni ven meatin keil, keil ihitehiteni min titae keil.
Anatin, keil iselus usil sakien keil onom koa amariso mok.
5 Keil iselus usil muohien ten hetetamenien onom ka sakien keil onom koa amormoreite,
ka inau nindem usil more umen keil onom.
6 Keil iselus usil mari umen keil onom koa arie lat keihoen onom,
ka nihit lat sakien keil onom koa avi hetetamen imok.
7 Tahosien onom koa marite houmon keil isi keil ka ihit usili min mesav keil,
ka isau usil maluen onom hetal min sien.
8 Iahova, envatien onom mariso ka komul korie lat enmahisien min meatin keil.
Keik korvurohtei vakalah, ka kovilelau en envatien.
9 Iahova, komumoni tahos min meatin vasi keil,
ka korie lat enmahisien min koakeil komumon keil.
10 O Iahova, tounah vasi keil koa komumoni isan masmasien hehat minuk.
Ka koakeil amusiluk, keil ihati lat isom.
11 Keil iselus usil losilkatien onom koa mariso mok,
ka ihit usil keihoen onom.
12 Keil umoni hemukonek keke meatin vasi keil ilea sakien keil koa mul rie lat keihoen onom.
Anatin, keil ilea suk keke losilkatien onom mariso mok.
13 Losilkatien onom hel lisenges,
ka kihi asuv houlu onen meatin keil heha vio … hervustei.
Iahova, keik komum vasin hatkatien keil onom,
ka korie lat envatien onom ka en sakien keil onom.
14 Iahova, keik komul kokataun koakeil avotini keih en moulien one,
ka korali lat koakeil keihoen one tovuol emun.
15 Meten meatin keil amul alele vat venuk keke kovalosil kat keil.
Ka komul kosan anien min keil en avong koa mal.
16 Tounah vasi koa amoul en out netan,
amul akur asa koa e vati ka en hem.
17 Iahova, sakien keil onom mal revi,
ka umen keil onom rie lat enmahisien onom.
18 Keik komul vesesal ven koakeil avis minuk.
Anatin, koro vesesal ven koakeil avis minuk ka en tine.
19 Koakeil avouhou minuk, komul kosan asa koa e vati.
Keik komul kolong hisoen one ka kumai komutut moulien one.
20 Iahova, keik kolei kat revi koakeil e vatuk,
ka min koakeil amum tisa, ku lin keil.
21 Iahova, nimasmasuk lisenges.
Ka tounah vasi keil ten out netan ihati lat isom lises ka lisenges.