25
Ahi mumon hatkatien takeih ral min Aesak
Senesis 25:19-34; 26:1-6
19 Koanik tunien onen Aesak, natin Ebraham. 20 Aesak, sua onen hanumau elu (40) navong retalihe ral min Rebekah, natnahin Betuel (koan Aramea ten out Mesopotemia) ka ahinali Leban. 21 Aesak ro ral min Rebekah ka kei sakras vakur tivava. Sakini Aesak vis min Iahova en usite onen, Iahova long hisien onen ka sakin Rebekah meas. 22 Ka en vangen, maeh keilu lumul ien ka lumul lukumkum neim. Sakini mama onealu long mahien houlu. Ven koanek, Rebekah mundemi vit, “?Vensa nalong mahien houlu mukok?” Ka va vis min Ahi ven aneite teni.
23 Ka Iahova viteni mini vit,
“Ehon elu lumul en vangom.
Tai koa hekatau hemai hemarite mok helin koa helamu.
Anatin, koa helamu hel en hen koa katau. ✡ Rom 9:12
Ka luhemai luhehi mari tata ten mari vangi meatin elu,
ka vangi meatin elu enek koa kikur keilu, luhetisa min keilu.
Ka koakeil ikistal ika en koa katau ikeih imok isulin onen koa mulamu.”
24 Avong mal vinvin Rebekah vakur tivava, ka kur maeh keilu koa luvi meahos. 25 Koa mulamu, amuven vilhili moul ka vasi aven, sakini luling isen ‘Esao’ koa aneite teni vi ‘amuven houlu.’ 26 Koa katauni, navong avasi, vuli kat vasehen tunali, sakini luling isen ‘Siekob’ koa aneite teni vi ‘meatin koa vuli kat vasehen.’* Isen Siekob, aneite tamun teni vi ‘meatin tasakluvosien.’ Ka Aesak, sua onen hanumau etel (60) navong ahin onen kur maeh keilu enek.
27 Navong ehon keilu lumoul lumai lumariso, Esao vi meatin talauien koa en vati mok vato en eivorohus. Ka Siekob vi tiraeng ka rotos teim. 28 Aesak, envatien onen mul en Esao veni en vati mok val van vuseri koa Esao muasi. Ka Rebekah, envatien onen mul en Siekob.
29 En avong tai, Siekob ros teim ka mul kukon sup bin. Ka Esao ka en eivorohus, mai amai kati houlu. 30 Sakini viteni min Siekob vit, “!Amai katnau vareis! !San tei sup tahilhili keisom maani!” Ven koanek, aling isen tamun vi ‘Edom’ koa aneite teni vi ‘vilhili.’ 31 Siekob vit risi mini vit, “Nakilea nisan tei minuk munak keik kisani minau vulum ten moeite.”† En sakien onen Siu keil, moei ehon ten famle tai hekur marite en tounah keil onen tata onen navong mat. Natnali sav keil ikuri hehi havivi vuo ihi meatin toumien enges onen koa vi moeite.
32 Esao vit, “Tahosis, kuri. ?Veni munak amai heat vini inau nimat, vuluk ten moeite hekataunau hemukave?”
33 Siekob vit risi mini vit, “Helamu, kumon hatkatien keke keik kisa lat vulum ten moeite minau.” Sakini, Esao maeni ka mumoni suvali.✡ Hib 12:16 34 Katau suk, Siekob san sup ka veret mini. Kei kanian ka mun hati oai tai, evus, mea va. Mukos, Esao mundem maen vulin kati ten moeite.