4
Ken mu vini tunali Ebel
Senesis 4:1-12,25-26
1 Evus, Adam ro ral min ahin onen ka kei meas en titiali tai. Avong muli, ka kur titiali tai ka ling isen vi ‘Ken’ koa aneite teni vi ‘nakuri’ veni viteni vit, “Ven kataunien onen Iahova, inau nakur ehon tai.” 2 Katau suk, Iv meas eris. Ka avong mai vinvin, kur titiali tamun, ka ling isen vi ‘Ebel.’
Navong lumoul lumai lumarite, Ebel mai vi meatin koa mul lei kat sipsip keil, ka Ken mai vi meatin koa mum en ah. 3 Sua vahis muli ka en avong tai, Ken vit vasan ui umen onen min Iahova. Sakini lah anien tei koa luhi, ka sani vahi sanien votut onen ten masmasien min Iahova. 4 Evus, Ebel emun kur ui umen onen koa vi moeite ten sipsip tai esen, muasi mat, ka san usiven keil tetahos vahi sanien votut onen ten masmasien vina min Ahi. Ka Iahova lele tahos en Ebel ka sanien votut onen.✡ Hib 11:4 5 Ka en Ken ka sanien votut onen, lei seseini. Sakini, Ken tin tisa ka vurohien sakin nan langlango. 6 Evus, Iahova viteni min Ken vit, “?Vensa komul kovuroh mukonek? ?Vensa nam langlango? 7 Munak komumon sakien koa mal, kimai kimal en metok. Ka munak komumon sakien koa tisa, tisaen mul suai vapurunuk suval tirendan tisa tai. Tisaen enek vit vahi hetetamen en moulien onom, ka keik esuk, kuasi heha netan ka kimai kihi hetetamen eni.”
8 Evus, Ken viteni min tunali vit, “Lovamea ran out ekek, lovoual lovaha nah.” Ka navong lurokol out enek, Ken viles min tunali ka muasi mat.✡ Mat 23:35; Luk 11:51; 1Sion 3:12
9 Evus, Iahova vis Ken vit, “?Tumali Ebel kave?”
Ka Ken vit risi mini vit, “Nareingeingeni. ?Inau keke nil nilei kat tuak onak?”
10 Ka Iahova viteni mini vit, “?Ken, komumon sa? ?Korraengontei? !Ran tumali mul murang minau ran atan vit kihinat asa koa komumoni!✡ Hib 12:24 11 Sakini, sesendaen hel enuk keke atan hersantei mun anien minuk, veni mun ran tumali koa komu vini. 12 Navong kiluh vis etai tounah, atan hersan kestei ui umen onom. Ka keik, lises kilohosai ran meatin sav keil ka out tato revi ien onom hetovuol.”
25 Sua vahis muli, Adam ro ral min ahin onen ka Iv meas eris ka kur titaealu tamun koa meahos. Ling isen vi ‘Set’ koa aneite teni vi ‘sani’ veni viteni vit, “Ahi san ris titiali tamun vakur vulin Ebel, koa Ken muasi mat.” 26 Navong Set mai mariso, kur ahin tai. Ka navong ro ral mini, ahin onen kur natnali tai ka ling isen ‘Inos.’ En hati avong enek, meatin keil avita netan min Ahi ka avise rohtoh en ‘Iahova,’* ‘Inau NAVI’(Eks 3:14) vi eis kati onen Ahi. Ka ven houhouen one, meatin keil avise Ahi en ‘Iahova’ koa aneite teni vi Asuv. isen kati koa vi votut.
Set, moeite onen vi Inos.
Inos, moeite onen vi Kenan.
Kenan, moeite onen vi Mahalalel.
Mahalalel, moeite onen vi Sered.
Sered, moeite onen vi Inok.
Inok, moeite onen vi Metuselah.
Metuselah, moeite onen vi Lamek.
Lamek, moeite onen vi Noah.
Ka Noah, natnali etel,
Sem, Ham ka Sevet.
Meatin keil enek aka en vatiamal onen Adam ka moulien one tetaveah. Keil akur titae houlu mok ka avilelau en out vasi. Ka houlu en keil armusiltei mun Ahi.