2
Selkatien usil navong meatin keil umai uva netan min Ahi
1 Timoti, ek vati mok keke lises, kami mihesan hisien keil min Ahi koa ten hiramien ka ten masmasien. Ka mihehis emun ven meatin sav keil: ✡ Efes 6:18; Plp 4:6 2 koakeil avi asuv houlu ka koakeil avi hetetamen koa alosil kat ir. Hesakini, rokilea rovato en tahosien ka en tomat vatal min meatin sav keil, ka rokilea rovaha netan min Ahi ka sakien orer housil rendemien onen. 3 Vati hisien keil enek tahos ka Ahi koa mutut ir si veni. ✡ 1Tim 1:1; 4:10 4 Kei en vati voutut meatin vasi keil ka sakin keil ilea hihiseien ten anatinien onen koa mukonek: ✡ Esek 18:23; 2Pit 3:9
5 Ahi, kei tanges;
ka meatin tanges mul lah ruain meatin keil ten out netan avamai en tomat vatal Ahi,
isen Iesu Kristo.✡ Rom 3:29-30; 10:12; Hib 12:24
6 Kei enges san kei mat vahul lat meatin vasi keil ran matien. ✡ Kal 1:4; 2:20; Taet 2:14
Ka navong kei vinat ir, mul rie lati keke avong mal koa Ahi en vat meatin vasi keil avakur moulien hau. 7 Ven koanek, Ahi sila inau nasuval eiloheh tai. !Naviteni anatin, narluvostei! Anatin, kei sila nau keke namul navitehiten more longlongien onen ka navisein koakeil arvitei Siu en sise ten demkatien koa vi anatin. ✡ Umen 9:15; Kal 2:7-8; 1Tim 1:11
8 Sakini, en avong vasi, navong misukul en out tas, ek vat meatin keil onen Ahi avahis ka avasan he hehina nesa vatie lati keke asan moulien one min Ahi. Anavurohtei ka anasel kututtei en keil. 9 Usil vati rendemien enek, ahin keil anandemtei houlu usil eisin one. Anamosan entei keil en hilie vuo tounah koa mul en ralinge ka hire, vuo anavuttei keil en eisin koa mani teni vina nesa. Vuo. Ek vati keke keil isin revi keil en sakien ten merauen ka houhouen. ✡ 1Pit 3:3-5 10 Ahin keil imosan en keil en umen tetahos hevinvin en ahin keil koa avit avousil Ahi. ✡ 1Tim 5:10 11 Navong amo keil amul avihisei, ahin keil anavertei, ikur hihiseien keil ka ilong kat keil en sakien ten merauen. ✡ 1Kor 14:34 12 Narmaentei ahin keil avahisein amo keil vuo avamai avahi avat en meahos keil. Ahin keil ito raeng hetal min houhouen en avong tahihiseien. 13 Veni Ahi mumon Adam mulamu, ka Iv katau suk. ✡ Sen 1:27; 2:7,22; 1Kor 11:8-9 14 Ka rovitei Adam koa mot en luvosien, ahin keke mot eni ka rali vas mengkatien onen Ahi varei. ✡ Sen 3:6,13; 2Kor 11:3 15 Ka Ahi houtut moulien onen ahin keil navong keil akur titiali keil, munak moulien one mul rie lat demkatien, envatien, merauen, ka sakien keil koa mal en meten.