Garesia
ihirnong Por oh brak atip ohe meng oh
Mama meng moh Por orhor brak mar Garesia mong ma Hanipyah orhe nita hat pati bap ihirnong adarhetipmur.
Por oh ama Garesia mongnong rih orhor sus Jisas ohwi inahatin hatin hanwa dahatin ohe da meng oh pot indipmur. Porpatin ama pati kuuhan ihir kat tit Arpin Hanipyah orhorwi inahatin hatin han ma hapat dahatpamur. Ihat dahat patin Por oh mandam wan teinong saporhan Juda hat pati bap ihir apris ihirnong Gur Juda nure pohon sawa mengnong amram dindeiyahanoh Got oh gurnong Yah han bapmur naporpatmur potperhan Por oh ire giporipti mengnong oh amrapat Es. Hanipyah Jisas orhorwi inahatin hatin hanwa dahaya ohe pe ohwi Got oh nuhurnong Yah han bapmur naporpat ma hapat ha dahatingwe rim mameng moh brak mar adarhetipmur.
1
1 Noh Got ohe meng pot pisapat han Por noh mama brak dei ohmur. Noh mama mihat tamrein sapat moh tit han tit Gin go mama moh tamrein sashenmur napora kis naham na nadarhetipmur. Jisas Krais ohsi; Jisas ohnong ma pamsuhup han at Got ohsi itarhe taman Go meng pot pisona napora kis naham nadarhetpamur. 2 Nohsi; Jisas ohe nita ihirsi nuhur mama brak mar Garesia aptei aptei sios gurnong mama nadarheriya ohmur.
3-4 At Gotsi; ama Hanipyah Jisas Krais ihitnong Gutagute damdapat orhor yah matpera ma dahapti da ohsi yah mar manap ham yah hat paten dasi mat paptenmur por gure paten meng oh nadahandeipatmur. Noh Krais oh dire at Got ohe danongwi dimara dire er gap hirmar namdatinmat haputip ma hapat. Hirmat namdama kakdah mama gin ma er hat pati ohe er nang oh natpat napapatin gatmar arpit namdatinmat haputip ma hapat rim gure paten meng oh nadahandeipatmur. 5 At Got oh Krais ohnong imat darhetipo rim ihan dir ohnong dipdipwi armi mar papten hanmur. Arpinwa.
Gur yot menghe dindeipri ritip ohe meng oh
6 Got oh Jisas orhe damdapat yah matpora daham ma haputip ohe pe oh orhor gurnong namburpatmur. Imat ma namburpat danong oh gur kapkapwi mandama wan mengnong Moh yah menghe dahama dindeiptio rim noh da dokdok sarpatmur. 7 Gur wan mengnong amram ma dindeipti oh Oh yah meng napanggeitin menghe daham dindeipti orhor na napanggeitin mengnong dindeiptimur. Ihir Krais ohe yah meng ohe boknong oh na napanggeitin er meng oh dip mar yah mengnong er mar gurnong da ban naham er mat naporiptimur. 8 Nuhur titdo enser ihir titdo nure yah meng ma napotpa meng oh mandapti wan meng tit naporiyahanoh ama han oh irat has teinong eimat ha sonohmur. 9 Nohe ma ri oh it ritiprohmur. Tit han tit aprisa gure yah meng ma am nahatpa meng oh mandama wan meng tit naporhanoh ama han oh irat has teinong eimat ha sonohmur.
10 Nohe ma ripat meng moh hanip ihir ha amam nahengwe rimda da Got oh ha amam nahenoh rim noh giripatda. Noh hanip ihirnong gapamtinmat giripatda. Basra. Noh Got oh ha amam nahenoh rim giripatmur. Noh hanip ihir nohnong ha amam nahengwe dahahhanoh Krais ohe danongwi ham noh yah hat atamreindiprohda. Basra. Na ihtiprohmur. Noh hanip ire atamreipatin nohnong ha amam nahatingwe daham na tamreipat ohoh ihan noh Krais ohe danongwi hat patim orhe atamreipatmur.
Got oh Por ohnong ma ambutip ohe meng oh
11 Nohe taptem gur dahatinmur. Nohe yah meng ma napotip meng oh hanip diradire damdapathe na napotipmur. 12 Noh suhur ham saporhan meng am nahayao be meng naporiyao nahatperhan am ham meng na napotipmur. Na napotipmura; Jisas Krais ohwi nohe kinteinong meng oh pitap matporhan ama pitap matip meng oh napotipmur.
13 Noh rih Juda nuranure pohon danong dimar ma ihat susuh oh gur amram am hat patimur. Nohe ma ihat sasuh oh Jisas ohe nita ihir ha timbas hatingwe rim noh kasip ham ihirnong sut pisasuhmur. 14 Ihama noh Juda nuranure pohon mengnong am ham dimtin ohe da oh noh han pohon han ihir hatin hapat norhorsi tap san ihirnong oh norhe hrepnong mara nohri hat sasuhmur. Nuranure pohon meng oh isip hat ha sonoh rim nohri han ham kasip hat patesuhmur. 15 Noh ihat sasuh orhor em uh na nit patin orhor Got orhe damdapat Moh norhe han matiprawa dahatipmur. Gahan orhe damdapat yah matpora ma dahapat da ohsi orhe han nahatipmur. 16 Ma nahatip oh Got orhe damdapat Gin norhe brer ohe da oh noh pinggitpora. Pinggirit oh am hama ama da ohsi wan han bap ihirnong meng pot ha pisonoh dahama orhe brer ohe da oh namgim am nahatipmur. Am nahatporhan noh am hama hanip ihirnonghe ti na dahamtipmur. 17 Kopen kis nahatir han noh Jerusarem ap mutuhnonghe sus Jisas ohe rih kis matporhan tamreishe han ihirnong noh ti na wamtipmur. Ti na wamara Arebia mongnong pipmur. Susa atei patdapat gahan it Damaskas apteinong sus indipmur.
18 Patin gahan krismas yitir birhitporhan noh Pita ohsi mengitporo rim Jerusarem apteinong pipmur. Susa ohsi ma indip oh tan kinhei dah ohwi indipmur. 19 Ama ihat indip ohhe Jisas ohe atamreishe han ihirnong kat han ihirnong na wamtipmur. Jisas ohe nap Jemis ohnongwi wamtipmur. 20 Noh Got ohe kintei ohoh ihan arpinnap meng napormur.
21 Pita ohsi tan kinhei dah patin gahan susa Siria mongo Sirisia mongo oh indipmur. 22 Atei patin Judia mong ma pati han Jisas ohe danong hat ma pati sios ihir nohnong na wanahat patina. 23 Mengwi Er nahasuh han oh da tamburkera Jisas ohe yah meng oh ha timbas hatinoh daham ma sut pisasuh meng oh gahan it orhor ameng orhor pot pisapatmuro ritperhan ihir amratpamur. 24 Amrama Got orhor imat ma hapat daham Got ohnong armi matpamur.